Við hesum bjóðar Sláið Ring teimum, ið ynskja at luttaka á ISLEK 2025, til fund
á Havstovuni týskvøldið 26. november kl. 19:30, Nóatún 1
ISLEK 2025 verður 14.-20 juli 2025 í Úlfarsárdal, Reykjavík. Á fundinum ætla vit at kanna, hvussu nógv og hvørji ynskja at luttaka og at finna onkran at samskipa føroysku luttøkuna, tí hvørgin av nordlekumboðunum fara at luttaka og eingin úr nevndini í Sláið Ring.
Lesið meiri um ISLEK 2025 á https://thjoddans.is/islek-2025/
Leygardagin og -kvøldið 28. september 2024 verður árliga tiltakið hjá Sláið Ring í Norðurlandahúsinum. Á skránni verður: verkstovur við dansispølum, fyrilestur við Andreu Opielka og føroyskur dansur – tilmelding krevst til verkstovurnar, meðan fyrilesturin og dansurin um kvøldið eru almenn.
Skráin hendan dagin er:
14:00-17:00 Verkstovur við dansispølum við Kristiani Jacobsen og Annu Birnu B. Restorff. Her sleppa luttakararnir at royna seg við bæði kendum dansispølum og meiri forkunnigum dansispølum. Verkstovurnar eru ætlaðar øllum – bæði fólki uttan royndir og meiri royndum dansarum. Kostnaður 100 krónur (nátturði íroknaður), tilmelding á sr@sr.fo ella tlf. 292563.
17:15-18:15 Fyrilestur við heitinum “Danse- og sanglege på Færøerne – oprindelse, udbredelse, nutidig tradition” við Andreu Opielka. Andrea Opielka hevur granskað í føroyskum dansi og føroyskum dansispølum, og hevur skrivað ph.d.-ritgerð um føroysk dansispøl.
18:15-18:45 Møguleiki at keypa sær ábit frá matstaðnum SYSTRUM. Best er, um maturin verður bílagdur áðrenn fyrilesturin byrjar, tí so gongur skjótari at borðreiða 🙂 Luttakarar á verkstovunum fáa nátturðaábit sum part av tilmeldingini.
19:00-21:00 Føroyskur dansur. Á skrá eru:
Fyrilesturin og dansurin um kvøldið eru almenn og ókeypis. Verkstovurnar um dagin krevja tilmelding og kostaðurin er kr. 100.
Vikuskiftið 20. til 22. september 2024 verður legan “Ung í Dansi” í skúlanum í Funningi. Legan er fyri ung í aldrinum 12 til 30 ár. Niðanfyri er kunning um leguna.
Skrá:
Fríggjakvøld:
Dyrnar lata upp kl 19.
Náttverði verður settur á borði.
Hugni, spøl og dansur gjøgnum kvøldið.
Leygardagur:
Kl. 9: Morgunmatur
Kl. 11: Útferð
Hugni og spøl
Kl. 18: Døgurði
Kl. 19: Aðalfundur hjá Ung í Dansi
Kl. 21: Almennur føroyskur dansur
Sunnudagur:
Kl. 9: Morgunmatur
Kl. 11: Kirkjugongd til tey, sum vilja
Hugni og dansur
Rudda av og heim
Pakkilisti:
Soviposi/dýna og koddi
Toiletgreiðir (tannbust osv.)
Skógvar ið eru hóskandi úti
Inniskógvar
Eyka klæðir
Vælkomin at taka borðspøl við. Góðgæti og alt hvat ið skal nýtast til hugna. Gloymið ikki “ja” hattin!!!
Vikuskiftið 20.- 22. septembur 2024 verður skipað fyri tiltakinum Ung í Dansi í Funningi. Her møtast ung í aldrinum 12 til 30 ár at dansa føroyskan dans saman. Hetta er afturvendandi tiltak, ið Ung í Dansi, ungdómsfelagið hjá Sláið Ring, skipar fyri á hvørjum ári.
Í ár verður legan hildin í skúlanum í Funningi, har vit møtast til eitt vikuskifti við nógvum dansi, spølum og hugna. Vit fara onkran túr og eisini kemur onkur at fortelja eitt sindur um bygdina og um eitthvørt viðvíkjandi føroyskum dansi.
Aðalfundur hjá Ung í Dansi verður leygarkvøldið 21. septembur og felagið skipar eisini fyri almennum føroyskum dansi í Dansistovuni seinni hetta leygarkvøldið, har øll eru hjartaliga vælkomin.
Tiltakið er rúsfrítt og ókeypis!
Øll í aldrinum 12 til 30 ár eru vælkomin at tekna seg við at skriva eini privatboð til Jón Róa Høgnesen á Facebook, á tlf. 276301, ella við at skriva ein teldupost á jonroij@gmail.com
Seinasta freist at tekna seg er týsdagin 17. septembur 2024. Nærri kunning viðvíkjandi ferðing og skrá til leguna kemur seinni á sr.fo og á facebook síðuni Ung í Dansi.
15 fótatraðkarar leitaðu sær til Odense um vikuskiftið, har Miðgarðsormurin skipaði fyri dansistevnu. Fótatraðk, Álaborg og Ung í Dansi luttóku, umframt onnur dansifólk. Ferðin hjá Fótatraðk byrjaði á Hovedbanegården leygardagin, har vit øll fóru við toki til Odense. Eftir check-inn gekk leiðin í snotuliga Norðuratlantshúsið, har Miðgarðsormurin hevði gjørt klárt til búgvið borð og eitt gott dansikvøld. Borðreitt varð við føroyskum smyrjibreyði og onkrum at sløkkja tostan við. Upphitingin til dansin byrjaði við eini váðaspurnarkapping, har slagið skuldi standa. Váðafúsu dansararnir skuldu gita, hvussu ofta “fruntur” bleiv nevnt í fruntatátti, hvussu nósarnir hjá kópakonuni itu og kvæði lýst við kensluteknum:
🧍♂️🛶🏝️🛌🔥🏃🏼♂️🏃🏼♂️🏃🏼♂️🤺🏊♂️🏊♂️🏊♂️🪦🪦🏝️🥱🙎🏼♂️👀🪓🪦?
Borðhaldið var stutt og gott. Mett og væl sett vóru fólk klár at dansa. Miðgarðsormurin legði fyri við Føroyingar, sum her nú koma saman og Flóvin Bænadiktsson. Fótatraðk skipaði Harra Pætur og Elinborg. Álaborg skipaði Brestis kvæði. Síðan var orðið frítt. Ung som gomul vóru fús at skipa, og dansurin gekk uttan slit til langt út á náttina. Summi valdu at fara heim at bukka sær beinini, meðan onnur leitaðu sær víðari í býin eftir góða dansin og hildu á til snimma á morgni. Øll komu tó heimaftur og náddu tokið aftur til Keypmannahavnar sunnumorgun. Vit takka Miðgarðsorminum fyri eitt sera gott tiltak og góðan dans í Odense. Vit gleða okkum til næstu dansistevnu ☺️
Fótatraðk
Klaksvíkar Dansifelag, Leikum Fagurt og Stígum Fast avgjørdu at fara ferð til Ålborg. Tveir av okkara ungu limum eru í lestrarørindum í Ålborg, og mettu vit, at tað hevði verið ein áhugaverdur túrur, at farið og vitjað teir og dansifelagið Magnus Heinason. Sum avrátt so gjørt.
Tann 1. februar løgdu vit, 50 fólk í tali, leiðina avstað. Ein góð helvt var úr Sandoynni, umboðandi Leikum Fagurt og Stígum Fast og ein lítil helvt úr Klaksvíkar Dansifelagi. Ferðin niður gekk væl og eftir ein busstúr á tveir og ein hálvan tíma úr Billund til Ålborg, steðgaði bussurin mitt í býnum, uttan fyri Cabinn Hotel, har vit skuldu búleikast næstu dagarnar.
Nevndin í Magnus Heinason stóð fyri okkum við stórum blíðskapi og smyrjibreyði. Eftir at vit høvdu heilsast, og fólk vóru komin uppá pláss, fóru vit upp á gólv. Fólkini, sum ráddu fyri borgum á hotellinum, vóru so beinasom at loyva okkum at brúka kantinuna at dansa og hugna okkum í. Vit tóku saman eina løtu og fóru síðan til songar. Tey, sum orkaðu, fóru ein kvøldartúr at hyggja seg um, áðrenn tey løgdu seg.
Fríggjadagurin var settur av til at læra býin at kenna. Fleiri nýttu høvi at støkka inn á gólvið í onkrum av handlunum, meðan onnur vitjaðu merkisstøð í býnum. Lagið var gott, og fólk gleddu seg til kvøldið, tá ið vit skuldu møtast við dansifelagnum Magnusi Heinasyni og føroyingafelagnum í Aalborg til eina hugnaløtu við fyrilestrum, sangi og dansi.
Klokkan 18:00 koma vit inn í Skipper Clement skolen har vit skuldu møtast. Suppa stóð fyri okkum og stórur blíðskapur. Hendrik Egholm greiddi gestunum frá um dansispøl og dansilag. Hann brúkti upptøkurnar hjá Egil Bakka sum útgangsstøði fyri sínari frásøgn.
Síðani slapp Jónleif Johannesen framat. Hann helt fyrilestur um at fáa føroyska dansin undir fót og um leiklutin hjá skiparanum. Síðani var farið uppá gólv.
Tað sást á luttakarunum, at teimum dámdu væl at treða føroyska dansin saman við
gestunum úr Føroyum. Ikki so ofta at dansurin gongur lystiliga við fleiri enn 70 fólki í
ringinum í Ålborg.
Eftir hetta mentanarkvøld settu vit kósina aftur á hotellið. Enn eina ferð var høvið nýtt til at fara uppá gólv. Nú vikuskifti var, vóru eisini nøkur, sum vildu uppliva Aalborg á náttartíð. Tey so gjørdu, og lótu væl at.
Leygarmorgunin klokkan 10:00 fóru vit at vitja Budolfikirkjuna, sum er dómkirkjan í Aalborg og minsta dómkirkja í Danmark. Men flott var kirkjan og hartil søgurík. Í dómkirkjuni framførdu vit føroyska sálmin “Tú gavst mær, o Harri, her livilig kor”, og ein part av donsku brúðarvísuni. Áhoyrararnir fingu eina serliga uppliving har gomlu sálmaløgini á føroyskum og gøtudonskum fyltu dómkirkjuna.
Eftir hetta greiddi ferðaleiðaran Carsten, maður Lisbeth Solmunde, okkum frá mongum áhugaverdum í miðbýnum og endaðu hesa útferð inni í Klosturkirkjuni, har føroysk guðstænasta verður hildin hvønn mánaða. Presturin, Lisbeth Solmunde, greiddi okkum væl frá um virksemið og um kirkjuna. Eisini sungu vit “Harra Guð títt dýra navn og æra” við føroyska sálmalagnum. Ein sera áhugaverdur dagur.
Klokkan 18:00 var veitsla. Um 90 fólk vóru í veitsluni. Gestir vóru komnir úr øllum landinum at hugna sær saman við okkum. Hølið var framúr vælegnað og maturin góður. Gott lag var á fólki, og sangurin gekk lystiliga. Røður vóru hildnar, sum bæði vóru skemtiligar og mentanarríkar.
Borðhaldið var stutt og gott. Klokkan 21:30 fóru vit uppá gólv. Dansifelagið í Aalborg Magnus Heinason legði fyri við vísu við sama navni. Frederik Barfod (1811-96), danskur søgumaður, yrkti hesa vísu um Magnus Heinason, og Símun av Skarði týddi hana. Vísan stóð í Ungu Føroyum desember 1910. Lagið var Stærke Tidrik.
Eftir hetta átti Klaksvikar Dansifelag tørn. Teir kvóðu Kong Sverke. Sandoyingarnir kvóðu síðani Brúsajøkil. Eftir hetta var orðið frítt og dansurin gekk so lystiliga. Ein góð samanrenning av vísum og kvæðum. Okkurt kent men eisini var okkurt meiri forkunnugt á gólvi og ringurin slitnaði ikki fyrr enn kl. 02:30. Fólk vóru á einum máli um, at veitslan var framúr.
Sunnudagin var aftur útferð og framførsla á skránni. Kl. 13:00 settu vit kósina móti Lindholm Høje, sum er ein elligomul búseting við tilhoyrandi museum. Vit fingu góða frágreiðing frá ferðaleiðara og, sum avrátt var, tóku vit saman, so gestirnir, sum vitjaðu Lindhom Høje hendan dagin, eisini fingu innlit í, hvussu tey, sum her lógu undir grønu torvu, høvdu hugnað sær í gomlum døgum.
Eitt Museum, sum avgjørt er eina vitjan verd.
Fólk fóru tíðliga til songar sunnukvøldið, men áðrenn tað høvdu vit eina hugnaløtu við sangi og spurnarkapping eftir sama leisti, sum vælumtókta spurnarkappingin í KVF hevur.
Mánamorgunin kl. 4:00 fóru vit úr Ålborg. Takksom fyri eina góða ferð. Vertir okkara skulu hava stórt rós uppiborið fyri blíðskap og fyriskipan. Ferðin heim gekk væl, og tíðliga
seinnapartin vóru vit heima aftur.
Ein sera væleydnaður túrur, sum styrkti vinaløg og samansjóðaði feløgini saman og hvør
sær.
Einaferð í heyst boðaði Sláið Ring frá, at ætlanin var at kvøða øll trý Sjúrðarkvæðini uttan steðg. Tiltakið skuldi vera leygardagin tann 27. januar 2024 í Sjónleikarhúsinum í Havn. Hetta ljóðaði áhugavert.
Tað verður kvøðið nógv runt um í landinum, mest í dansifeløgum, men stór kvæðir hava tað ikki so gott. Tey eru ov long til eitt vanligt dansikvøld, og tí detta tey burturímillum, og kanska duga færri og færri tey. Onkur long kvæðir og tættir sleppa tó upp í part, eitt nú Jákup á Møn, Grettiskvæði og Gøtuskeggar, men tey flestu longu kvæðini eru ongantíð á gólvi, og tí er vandi fyri, at tey verða gloymd.
Sjálvur dugi eg Regin smið hampiliga væl og nakað út í Brynhildartátt, men ikki eitt orð av Høgnatátti. Nú skuldi Høgnatáttur lærast so frægt, sum tað bar til. Metodan var at skriva Høgnatátt av, tó ikki í ta hondskrivaðu kvæðabókina, men í telduna. Tað arbeiði var ikki til onga nyttu. Minni enn so. Ikki minst málsliga áhugavert fyri ein gamlan lærara.
So upprann dagurin, tá ið Sjúrðarkvæði – allir tríggir tættirnir – skuldi kvøðast. Beint eftir klokkan 16 bjóðaði Gunnar fyri Sláið Ring vælkomið og hevði nøkur praktisk ráð, eitt nú at fólk kundu fara upp í køkin at fáa sær kaffi og kaku, tá ið tað kravdist. Gunnar bað okkum ikki práta í salinum, tí kvøðingin fór at verða tikin upp.
Eftir at Jón Rói sum ljóðroynd hevði skipað ”Føroyingar, sum her nú koma saman,” byrjaði Óli á Geilini Regin smið, sum hann kvað á sín hábærsliga og týðiliga máta, so hvørt orð hoyrdist. Tað hevur nógv at siga – ikki minst í stórum dansi. Eftir at Óli hevði endað 131. ørindi: ”… so skal taka upp annan tátt / og víðari leggja í minni,” var Jóhannis í Miðvági klárur við Brynhildartátti.
Jóhannis byrjaði og kvað niðurlagið eitt sindur øðrvísi enn Óli, so tað var eitt rættiligt skifti: virkaði sum eitt annað lag. Og so er stílurin hjá Jóhannisi meira dramatiskur, og hann hoyrist eisini væl. Brynhildartáttur er nakað av tí vakrasta og besta vit eiga, verður sagt, og har eru nógv vøkur og hugtakandi ørindir. Eitt dømi: “Brynhild situr á Hildarfjalli / mitt í faðir síns veldi / ljómin skein av akslagrein, / tað var sum at líta at eldi.”
Tað dugdu kanska ikki so nógv við, tá ið vit vóru komin út um helvtina, men tað bilti ikki petti, tí skiparin var treystur og tryggur, so tað bar væl til at lurta og fylgja við í søguni. Og tað er ein dygd í føroyskum dansi: at lurta! Og væl varð lurtað, líka til ørindi 238, tá ið skiparin kvað ”…so skal taka upp triðja tátt / og víðari leggja í minni.”
”Guðrun situr í Júkagørðum, / sorgina ber so tunga, / hon lovast ongum edilingi / eftir Sjúrð hin unga.” Soleiðis byrjar Høgnatáttur, triði og longsti táttur av Sjúrðakvæði. Tað var heimasandsmaðurin Kjartan Atlason, sum skipaði. Kjartan skipaði væl – í stíli ímillum Óla og Jóhannis. Hann dugdi kvæðið út í odd og egg, og tað kann ikki vera hvørsmansføri, tí kvæðið er nokkso fløkt við nógvum persónum – og langt.
Mann hevði kanska roknað við, at tað fór at tynnast við fólki, tí nú høvdi vit kvøðið so leingi og vorðin móð, men tað var so eiðasørt. Tá ið vit vóru komin út um helvtina, vóru tað 65-70 fólk í ringinum (eg taldi), og soleiðis var, til Kjartan kvað 254. ørindi: ”Høgni gisti sína móður / síðla dags á kvøldi, / síðan reið hann haðan burt / til kongin í Danaveldi.”
Hetta var ein megnardansur við hátíðardámi. At tað var byrjað so tíðliga ein seinnapart, gjørdi sítt til, at tiltakið var so væleydnað. Meginfelagið og øll, sum gingu á odda, eiga stóra takk fyri. Vónandi verður okkurt líknandi tiltak eina aðra ferð um ikki ov langa tíð.
Á Glyvrum, tann 31.januar 2024.
Jens Dalsgaard
Í sambandi við at Vága dansifelag, vegna Sláið Ring, skipar fyri landsdansistevnuni 2024 vilja vit fegin bjóða øllum dansifeløgunum og dansiáhugaðum til stevnuna.
Stevnan verður í ítróttahøllini á Giljanesi tann 11. mai 2024.
Luttøkugjaldið er 300 kr. fyri hvønn, men ung undir 30 ár, sum hava goldið limagjald til Ung í dansi, gjalda 100 kr.
Tilmeldingarfreistin er í seinasta lagi 26. apríl 2024. Tilmeldingarnar fara fram hjá dansifeløgunum hvør sær, og síðani melda dansifeløgini til við telduposti til vagadansifelag@ymail.com, og gjaldið fyri luttøku flyta dansifeløgini samlað inn á konto hjá fyriskiparunum.
Íroknað luttøkugjaldið er: Matskrá við trimum rættum, eitt glas av onkrum drekkandi og durasnapsur. Skonkt verður sjálvandi undir borðhaldinum. Barr verður á staðnum, so møguligt verður at keypa drykkivørur fyri sámuligan prís. Náttmatur er eisini íroknaður.
Skráin fyri dagin er hendan:
Er okkurt at spyrja um, ella er okkurt tit ivast í eru tit vælkomin at seta tykkum í samband við okkum.
Vegna Vága dansifelag
Anna Sunadóttir Hansen
Skráin er løgd til barnadansistevnuna í Hósvík 3. februar.
Nú nærkast í stórum at vit aftur hittast til barnadansistevnu. Í ár verður hon í Hósvík, og knapt 400 hava meldað seg til stevnuna. Niðanfyri sæst dagsskráin fyri teir 4 bólkarnar, og samlaða kvæðaskráin.
Útferðin er í ár til Hvalastøðina við Áir, har starvsfólk á Tjóðsavninum fer at greiða okkum frá. Veðurvánirnar eru eitt sindur so-sum-so, so minnist til at hava passandi klæði við til útferðina (nakað av gongd verður ta løtuna).
Vit gleða okkum at síggja tykkum.
Norðstreymoyar Dansifelag.
Regin, Brynhild og Høgni – sama dag
Leygardagin 27. januar 2024 kl. 16:00 skipar Sláið Ring fyri einum seinnaparti og kvøldi, har allir tríggir tættirnir Regin, Brynhild og Høgni í Sjúrðar kvæði verða kvøðnir. Óli Reinert á Geilini úr Tøkum Lætt fer at skipa Regin smið, Jóhannis Joensen úr Vága dansifelagi fer at skipa Brynhildar tátt og Kjartan Atlason úr Dansifelagnum í Havn fer at skipa Høgna tátt.
Tiltakið er alment, og øll eru vælkomin, men fyri at meta um mongd av nátturða heita vit á fólk um at boða frá luttøku (sí niðanfyri).
Teksturin til allar tríggjar tættirnar er at finna her: https://tinyurl.com/2xdeh3ve
Dansað verður á síðupallinum í Sjónleikarhúsinum, byrjað verður kl. 16:00, og dansað verður út í eitt. Møguleiki er at fáa sær ein steðg og hvíla seg í “Áarstovu”, tað er køkurin í ovara enda á Sjónleikarhúsinum, har vit eisini ganga inn. Her verður eisini ein drekkamunnur at fáa, meðan dansað verður.
Uml. kl. 20:30 – aftaná allir tríggir tættirnir eru kvødnir – verður ein nátturðabiti við smurdum breyði.
Tiltakið er ókeypis, men fyri at hava hóming av, hvussu nógv breyð skal bíleggjast, heita vit á luttakarar at siga frá luttøku antin í felag gjøgnum sítt dansifelag ella við telduposti til sr@sr.fo.
