Kvæðaferð við Norrønu 21. – 24.
august 2016 til Danmarkar.

Tríggjar
ferðir hevur Sláið Ring saman við Smyril Line skipað fyri kvæðaferð  við Norrønu. Í maj 2012 og 2014 var kvæðaferð
til Íslands, og skipið lá á Seydisfirði 1½ døgn. Eg var við í 2012. Hesaferð
sigldu vit til Hirtshals og heimaftur. Tað hevði hóvað okkum í Sláið Ring betri
at siglt til Íslands, har skipið kann liggja við kaj 1½ samdøgur, tí tað ber
als ikki til at dansa føroyskan dans, um skipið livir bara eitt lítið vet. Men
tað var av besta veðri báðar vegir – skipið rørdist ikki, so vit kundu dansa
alt, sum vit orkaðu.

Uml. 130
fólk vóru við á kvæðaferðini – Jómsvíkingar og Sumbiar dansifelag væl umboðaði.
Kann ikki lata vera við at smílast, tá eg hugsi um hesi fólkini, sum hittast
til føroyskan dans. Veit hvaðani, tey eru og fái gott prát við tey, men teirra
kristna navn kenni eg ikki. Nógv av hinum ferðafólkunum umborð, komu eisini inn
í Saga Café at lurta og dansa.

Rasmus
Joensen, sum hevur verið formaður í Sláið Ring í áravís, byrjaði at orða við
Smyril  Line um kvæðaferð einaferð í 2010.
Hetta saman við einum skrivi í bløðunum frá Levi Niclasen í Hvalba førdi til
fyrstu kvæðaferðina, sum var so væleydnað, at hetta sjálvandi skuldi gerast
aftur.

Nøkur
kvæðir/vísur verða sett á skránna frammanundan og onkur verður biðin at halda
fyrilestur ella hava hugleiðingar um hesi. Til allar tríggjar kvæðaferðirnar
hava vit biðið fólk, sum hava dansað frá barni av, um at fortelja frá  góðum løtum í dansi. Hesi høvdu øll gjørt sær
stóran ómak. Eg haldi, at teir, sum vóru bidnir at skipa, tóku uppgávuna upp á
sama máta sum tey, sum skipa á landsdansistevnu.

Forkunnuga
og sera vakra  yrkingin “Kópakonan” hjá
Hans Andriasi Djurhuus bleiv eisini lisin upp týsdagin. Ivaleyst hevur hann –
eins og Kvívíks-Jógvan, sum yrkti Kópakvæði – fingið íblástur frá søgnini við
sama heiti, sum kom á prent í Færøsk Anthologi hjá V.U.Hammershaimb í 1891.

Stuttligt at
hava kapping við spurningum úr kvæðum og vísum. Til tey bæði innleiðandi
umførini vóru trý lið við trimum fólkum hvørja ferð. Tvey lið komu í finaluna,
sum var seinnapartin mikudagin. Tey trý á vinnaraliðnum vunnu ein jólatúr við
Norrønu í part, meðan hini fingu eitt vikuskiftið á deplinum í Skálavík í part.
Góðir vinningar frá Smyril Line.

Vit bæði
duga og tíma at syngja, og sangurin gekk so lystilga aftur við harmonikum.
Trivaligt sangheftið var gjørt til ferðina. Mikudagin spældi Jóanes so
hugaliga, at harmonikan gekk sundur og 
Ásmund, sum er gamal bilmekanikari, mátti fáa hana samanaftur.

Tað er
stórarbeiði, at skipað fyri slíkum tiltaki. Rasmus hevur lagt ótrúliga orku í
hesar tríggjar kvæðaferðirnar – hvussu nógvar tímar, hann hevur brúkt, veit
bara hann sjálvur. Lønin fyri slíkt verður ikki goldin í krónum, men tá
tiltakið eydnast væl  – og tað eydnaðist
sera væl hesaferð – so er tíðin væl brúkt. Lønin er góður dansur og glað
væluppløgd fólk.

Ein góður
máti at fjálga um dansin og leggja gerandisdagin frá sær uppá.

Eg vóni, at
vit gera kvæðaferð aftur um nøkur ár.

Kathrina,
Eysturoyar dansifealg.

 

 

Vága Dansifelag, Álandsferð 28. juni –  4. juli 2016.

 

 

Vága Dansifelag hevur samarbeiði við dansifeløg úr hesum
londum:  Norra, Svøríki, Danmark, Finnlandi
og Álandi.

Vit hava dansað saman við hesum dansifeløgum við 2 og 3 ára
millumbili síðan 1981, og hesaferð gekk leiðin til Álands.

 

Skráin hjá okkum var:

 

Dansa inn: Ormurin Langi, Brestis Kvæði ella Harra Pætur
og Elinborg.

Det Røde Guldbånd

Sandoyadans

Slippudans ella bandadans

Ríða Ediling

Dansa út: Okkurt av tí omanfyri

 

 

Týsdagur, 28.06.2016

Fóru út á flogvøllin, áðrenn klokkan 7:30, tí vit í Vága
Dansifelag skuldu flúgva til Kastrup á veg til Álands á norðurlendska
dansistevnu. Alt gekk upp á stás, men dagurin var langur. Bussur avheintaði
okkum í Arlanda, kom við okkum umborð á ferjuna og koyrdi okkum líka til
Øvernæsgården í Mariehamn, har vit skuldu gista komandi dagarnar. Umborð á ferjuni
ávegis til Álands fingu vit góðan døgurða. Vit sigldu í tveir og ein hálvan
tíma og komu upp á pláss á Øvernæsgården klokkan hálvgum tólv um kvøldið. Har
tók Maiken Poulsen Englund móti okkum saman við limum úr álendska
dansifelagnum. Eftir at hava hugnað okkum eina løtu, fóru vit til songar um
tveytíðina. Tíðarmunurin er tveir tímar, so tað var ikki so seint eftir okkara
klokku.

 

 

Mikudagur, 29.06.2016

Sera gott veður í morgun. Vit hava etið morgunmat og hvílt
okkum aftan á strævna dagin í gjár. Veðrið gjørdist bara betri og betri út á
dagin og um kvøldið. Hava verið inni í miðbýnum í nakrar tímar mitt í dag. Frá
klokkan 17 til 20 vóru vit øll gestir hjá Guðrun Gudmundsen, sum býr í Álandi.
Einastandandi góð løta við góðum grillmati, dansi og framvegis góðum veðri.

 

Hósdagur, 30.06.2016

Frá klokkan 7:30 til 9:00 var morgunmatur á
Øvernæsgården.

Fyrrapartin vísti Maiken Poulsen Englund, sum eisini býr
í Álandi, okkum runt í Álandi. Vit koyrdu við bussi. Maiken fortaldi mangt og
hvat um Áland og samanbar við føroysk viðurskifti. Sjálvstýrið hjá Álandi kann
ikki samanberast við sjálvstýrið í Føroyum. Í Álandi verður alt stýrt úr Finnlandi.
Áland kom undir Finnland í 1809. Maiken var sera greið og vitandi. 

Vit fóru til kirkjuna, sum Maiken er deknur í. Tað er ein
ógvuliga gomul kirkja – vøkur og rúmlig. Aftaná fóru vit á eina cafe, sum eitur
Uffe på Berget og ótu álendskar pannukøkur. Vit fóru eisini til eina gamla
borg, men vit høvdu eingi atgongumerki, so vit gingu bara rundan um borgina.
Har var eitt savn av gomlum amboðum og húsum, sum vit hugdu inn í – sera
hugnaligt.

Síðan skiftu vit í føroysk klæði inni í býnum og fóru at
dansa á einum ellisheimi. Tað var ógvuliga stuttligt og alt gekk sera væl.
Síðani gingu vit runt í býnum í føroyskum klæðum – heilsaðu upp á Mariu Alexandrovnu,
keisarinnu – ein standmynd, sum álendingar hava fingið frá russum. Um kvøldið
grillaðu vit pyslur á Øvernæsgården saman við hinum norðurlendsku dansifeløgunum.

 Seinni hugnaðu vit
okkum niðri í fjøruni og høvdu tað sera stuttligt.

 

Fríggjadagur, 01.07.2016

Frá klokkan 7:30 til 9:00 var morgunmatur á Øvernæsgården,
men summi svóvu leingi og ótu ikki fyrr enn inni í býnum klokkan 11:00.

Frá klokkan 9 um morgunin og til umleið 11 var venjing í
eini fimleikarhøll. Maiken vísti okkum eisini runt í býnum. Veðrið var gott, og
vit fóru til eitt savn við modellum av gamla Mariehamn býi. Klokkan 15:30 til
17:30 var workshop á UNCAN. Har kundi man fara til vísusang, norðurlendskan
fólkadans og svenska polska.

Vit í Vága Dansifelag vóru ikki til nakra workshop, men í
staðin fóru vit inn á sjófartssavnið í Mariehamn. Har var nógv áhugavert at
síggja, so har steðgaðu vit eina góða løtu. Tá vit komu út aftur var so lítil
tíð eftir, til vit skuldu umborð á Pommern, so vit settu okkum á cafeina
uttanfyri og fingu okkum kaffi og kaku. Tað var nokk so kølið, so arbeiðfólkini
á cafeini komu við reyðum teppum, sum vit kundu balla okkum í – deiligt. Vit
sótu har og sóu oman á Pommern. Tað er eitt ógvuliga stórt stálseglskip, sum
hevur siglt á øllum heimsins høvum við farmi. Tá klokkan nærkaðist 18, byrjaðu
fólk at koma og stilla seg í kø.  Tá køin
var minkað eitt sindur,  fóru vit eisini
í køina. Umborð á Pommern var borðreitt við rækjum – royktum og kókaðum rækjum við
ymiskum afturvið. Rækjurnar smakkaðu óføra væl – serliga tær royktu. Tá vit
høvdu etið, fóru vit upp á dekkið. Har spældu spælimenn enskan sjómanstónleik
(shanties), og fólk stóðu og lurtaðu. So fóru vit upp á gólv. Edvard skipaði
Ormin Langa og tá kom lív í. Vit fingu góðan dans. Onkur onnur vísa varð eisini
tikin afturat, og tað bleiv ógvuliga væl dámt. Føroyski dansurin fekk lív í, og
fólk dansaðu eisini dúgliga til sjómanstónleikin.

 

Leygardagur, 02.07.2016

Henda dagin fóru vit í bussi inn í býin, tí vit vóru í
føroyskum klæðum. Vit skuldu eta á eini matstovu klokkan 11:00. Klokkan 13:00
dansaðu vit á torginum í Mariehamn. Aftaná dansin fóru vit so í skrúðgongu
gjøgnum býin og møttu hinum dansifeløgunum ymsa staðni á vegnum, og tey komu
upp í skrúðgonguna, sum endaði í Miramarparkini. Tað var gott veður og ein
ógvuliga hugnalig løta við góðum kórsangi. Seinni fóru vit heimaftur at rigga
okkum til fínan festdøgurða á Mariepark hotell. Hølið á hotellinum var ógvuliga
hugnaligt. Vit vóru umleið 150 fólk. Álendska dansifelagið hevði sett ymsisk
fløgg á borðini, so fólk kundu blandast, og tað riggaði hampuliga væl. Vit sótu
saman við finnlendingum, sindur strævi at snakka, men tað gekk. Vit høvdu tað
hugnaligt – tó har var onkur, sum einki dugdi uttan finskt, men so máttu onkur
finni, sum dugdi enskt, umseta til finskt.

 

 

 

Sunnudagur, 03.07.2016

Vit vóru niðri á havnaøkinum henda dagin. Keyptu ymisk
smáting í SALT, ein handil við heimagjørdum tingum. Við síðuna av hølinum SALT
vóru ymisk støð, har man kundi keypa sær okkurt at eta. Summi fóru at keypa sær
tvíflís og onnur keyptu kaffi og vaflur. Aftaná fór helvtin at svimja í
stásiligu svimjuhøllini, meðan hin helvtin fór inn í býin at njóta tað góða veðrið.
Guðrun Gudmundsen koyrdi, sum so ofta. Vit fóru eisini heim at hvíla okkum,
áðrenn vit um kvøldið fóru út at eta á matstovuni Indigo saman við Guðrun
Gudmundsen og hennara. Góður dagur.

 

Mánadagur, 04.07.2016

Avstaðfaradagurin. Møttu við bussin klokkan 06:15 og koyrdu
við bussinum oman til ferjuna, sum sigldi okkum til Stockholm. Bussurin fylgdi
við til Arlanda. Fingu góðan morgunmat umborð. Sigldu í umleið tveir og ein
hálvan tíma. Í Arlanda høvdu vit góða tíð. Frá Arlanda flugu vit til Kastrup,
bíðaðu umleið tveir tímar í Kastrup og flugu so víðari í Vágar og vóru her
umleið klokkan 20. Ein langur ferðingardagur, men alt hevði gingið væl, og enn
ein góð dansiferð var komin at enda.

Vága Dansifelag takkar 
fyriskiparunum í Álandi so hjartaliga, serliga takka vit Maiken Poulsen
Englund og Guðruni Gudmundsen.

 

 

Skrivað hevur

Anna Elisa Jacobsen

 

NÁM hevur lagt stóra kvæðasavnið Føroya kvæði – Corpus Carminum
Færoensium – stytt CCF út á heimasíðuna hjá Snar.
Á heimasíðuni sr.fo, – undir yvirskriftini kvæði – ber til at finna leinkjuna til Føroya kvæði.

 

Eysturoyar
dansifelag á noregsferð 4-13. juli 2016………………….

Í februar 2013 hevði eg fyrstu ferð samband við leikaringen
Rakne gjøgnum teldupost frá Hilde Magnset, sum tá var í ferðanevndini hjá felagnum.
Tey ynsktu at uppliva ólavsøku og vildu eisini fegin hava samband við eitt
dansifelag, sum vildi taka sær av teimum nakrar dagar umframt ólavsøkuna.
Okkara nevnd avgørdi – tíbetur – at siga ja til at taka ímóti teimum. Tey
vitjaðu okkum frá 24 – 28 juli 2014. Tey plaga at bjóða til endurvitjan árið
eftir, at  tey hava verið á ferð. Í fjør
kom teldudpostur við hjartaligari innbjóðing  um at fáa okkum til teirra “ så de kunne gjøre
lidt til gjengæld”, sum tað stendur í brævinum. Nú vit eru afturkomin í øllum
góðum, mugu vit ásanna, at vit hava fingið aftur við “renter og renters renter”
, meðan vit vóru hjá teimum frá 4-10 juli. Vænti ikki nakrantíð aftur at
uppliva so hjartaligan blíðskap, sum hesar dagarnar.

Hetta er triðja uttanlandsferðin hjá Eysturoyar dansifelag seinnu
árini. Til  Agdenes við Tróndheimsfjørðin
2008 og til Stockholm 2011 sigldu vit við Norrønu og høvdu buss við heimanífrá.
Hesaferð valdu vit at flúgva og komu aftur umvegis Bergen, har vit gistu
tríggjar nætur.

Tríggjar ferðir blivu vit øll boðin heim til fólk. Beinanvegin
mánadagin 4. juli, tá vit høvdu tjekkað inn á hotellinum , sum lá tætt við
Gardermoen flogvøll, blivu vit boðin heim til Tove og Helge, sum búðu “i
gåafstand” frá hotellinum. Har var dekkað upp við fínum porcelenið til okkara
og eini 20 frá Rakne, sum  ynsktu okkum
vælkomin á vitjan. Bæði norska og føroyska flaggið vóru vundin á stong fyri
okkum, vit sungu “Millom bakkar og berg” við borðið, og so kvóðu vit Sinklar á
terassuni, áðrenn vit fóru heim í song.

Dagin eftir koyrdu vit runt í nærumhvørvinum við bussi og
blivu boðin til matna um middagsleiti á Lodding garði heima hjá Grethe og Knut
Ljøgodt, sum er formaður hjá felagnum. Grethe, sum er listakvinna, hevur eitt
savn í stabbúrinum á garðinum.  Vit kvóðu
Gudbrandskvæðið á Raknehaugen, sum verður hildin at vera ein kongagrøv.

Mikudagin fóru vit til Eidsvoll, har sum norska grunlógin
bleiv undirskrivað tann 17. mai 1814 – aftaná eitt seks vikur langt  orðaskifti. Hesin dagurin verður enn
hátíðarhildin á hvørjum ári sum tjóðardagur Noregs. Stór uppliving at síggja
borðið, har norska grundlógin bleiv undirskrivað á sinni og ikki minni
ríkissalin, har teir 112 eidsvollmenninir skiftu orð – har hevur helst brotið í
bæði borð, áðrenn tað bleiv til “ Enig og tro, til Dovre falder”. Um kvøldið
blivu vit fyri triðju ferð boðin heim til fólk – hesaferð til grillfest í eini
maskinhøll á garðinum hjá Guri og Karsten. Aftaná dansaðu vit føroyskan dans og
norskar dansir afturvið harmoniku. Louis Houmann setti punktum fyri kvøldið við
sanginum hjá J.H.O. Djurhuus , “Kúrir tú lítli songfuglur mín.”

Hósdagin fóru vit til Oslo við toki saman við eini 15 fólkum
frá “Rakne”. Á Bygdøy sóu vit Fram hjá Fridtjof Nansen, sum gjørdist fyrsti
sendimaður Noregs í London, tá landið var blivið sjálvstøðugt í 1905. Eisini
sóu vit Ra II og KonTiki, sum Thor Heyerdahl sigldi um Kyrrahavið við fyri at
prógva, at fólkini á kyrrahavsoyggjunum kunnu vera komin úr Suðuramerika.  Hesir menninir hava havt eitt ótrúligt áræði.
Eisini vitjaðu vit Vikingeskibsmuseet. So náddu vit ikki meir enn túr niðan til
“Slottet”, sum stóð í gerð frá 1820-1849 og sum upprunaliga var ætlað til
summarbústað hjá svenska konginum, sum tá eisini var kongur í Noregi. Á veg
aftur til tokið gingu vit eftir Karl Johans gate og sóu stórtingsbygningin.

Fríggjadagin sóu vit ein gamlan stórgarð, sum varð gjørdur
til savn 1908, tí ongin arvingur var at taka við garðinum. Í erva var stórur
gildisskáli, sum heilt vist hevði riggað væl til eina rimmar dansinátt. Vit
høvdu latið okkum í føroysk klæðir heimanífrá og dansaðu dansispøl á einum
palli uttanfyri. Vit vitjaðu eisini Udnes kirkju, sum liggur har, sum áirnar Glomma
og Vorma koma saman. Hetta tí man tá í tíðini ferðaðist eftir áunum fyri at
koma í kirkju.

Leygardagin kl. 11.00 upptraðkaðu vit við føroyskum dansi og
Rakne við fólkadansi á torginum í Jessheim. Bert spell, at so fá vóru komin at
hyggja. Eina løtu aftaná, at vit vóru komin aftur á hotellið, var heglingur og
torusláttur. Um kvøldið var veitsla saman við Rakne .

Sunnumorgunin komu eini 10 av teimun norsku  á hotellið at biðja farvæl, áðrenn vit fóru
við bussi til Gardermoen á veg til Bergen. Vit bjóðaðu teimum at koma aftur til
Føroya at vitja okkum – eg vóni, at
tey taka av.

Vit búðu væl á hotel Admiralen mitt í Bergen. Týsdagin 12. juli
fóru øll siglitúr á Sognefjørðinum fyri dagin og heimaftur við
Flåmsbananum.  Restina av tíðini í Bergen
var ongin skrá – fólk tóku sær av løttum og gjørdu, sum tey vildu.

Mikukvøldið komu 20 fólk heimaftur við Atlantsflog, meðan
hini 5 vóru eftir – onkur fór til arbeiðis í Noregi og onkur til Danmarkar at
vitja familju.

Tað er gott fyri felagið at gera slíkar ferðir av og til.
Vit minnast tær allar við gleði restina av lívinum.

Kathrina, Eysturoyar dansifelag.

 

Leygardagin  21. maj skipaði Klaksvíkar dansifelag fyri
landsdansistevnu – nr. 12 í røðini. Hetta er aðru ferð, at stevnan er í
Klaksvík – fyrru ferð var í 1998.

Tað viðraði
av tí allarbesta. Millum kl. 16.00 og 16.30 seinnapartin steðgaðu fleiri stórir
bussar fullir av  glaðum dansifólki í
føroyskum klæðum  í miðbýnum í Klaksvík,
tí stevnan skuldi setast kl. 16.30 í 
Vágstúni. Bjørn Kalsø, sum er fyrrverandi landsstýrismaður í mentamálum,
sett i stevnuna við sera góðari røðu.

Tá stevnan
var sett, fóru øll hesi uml. 400 fólkini í skrúðgongu til borðhald í
badmintonhøllini – Heini Mohr, formaður í Klaksvíkar dansifelag gekk fremstur
við Merkinum. Onga aðrastaðni í landinum eru umstøðurnar so góðar til slíkt,
sum í Klaksvík, tí allir stórir bygningar liggja tætt saman í miðbýnum, so tað
er skjótt at ganga ímillum hølini. Tí ivist eg ikki í, at norðurlendska
barnadansistevnan “Barnlek”, sum verður í Klaksvík í juli 2017,  er løgd á rætta stað. Tá koma  væntandi eini 700 fólk higar frá hinum
norðanlondunum.  Vit ótu í
badmintonhøllini og dansaðu í Skálanum, sum Klaksvíkar dansifelag eigur.

Maturin frá
mastovuni “Viljin” á Húsum smakkaði sera væl. Høvuðsrætturin varð settur á
sjálvtøkuborð. Tað royndu vit  fyrstu
ferð á landsdansistevnuni í Runavík í maj 2013. Tað styttir munandi um
borðhaldi, sum kanska bleiv nakað drúgt hesaferð – hesum eiga vit at læra av
til næstu landsdansistevnu.

Feðgarnir úr
Dali vóru óførir – Jóanes, sum bleiv 65 ár henda sama dag,  man vera glaðasti harmonikuspælari í verðini
og so skipaði hann eisini Finnbogarímu fyri dansifeløgini Stígum Fast og Leikum
Fagurt. Deiligt kvæði og deiligt lag. Sonurin Jónleif stýrdi borðhaldinum við
hepnari hond, og hevur eisini yrkt frálíka sangin, sum vit fingu á leysum blað
undir borðhaldinum. Yvirskriftin á greinini er úr hesum sangi.

Eg og fleiri
við mær vóru ivasom, tá vit sóu kvæðaskránna og hildu tað vera møtimikið við
fleiri longum – eisini heilt ókendum – kvæðum. Men væl gekk. Og sum Heini Mohr eisini
segði , “ nær skulu vit annars kvøða tey?” Tað er ein heiður, at verða biðin at
skipa til eina landsdansistevnu. Vit í Eysturoyar dansifelag prógvaðu
saman  við Tøkum Lætt, at tað ber væl
til, at tvey feløg taka eitt langt kvæði í felag  – eisini við tveimum skiparum, sum brúka  hvør sítt lag. Uppskotið hjá Hendrikki Egholm,
sum er formaður hjá Leikum Fagurt á Sandi, um at lata feløgini skiftast at
kvøða aðruhvørja stevnu, er eisini vert at hugsa um til næstu ferð. Velja vit
tað, verður planlagda kvøðingin minkað niður í helvt, og so kundi dansurin
hildið fram, sum vanligt – tað hevði verið stuttligt at roynt  tað á eini landsdansistevnu. Væl vita vit, at
tey, sum læra seg forkunnug, long kvæðir, hava brúkt eitt ótal av tímum til at
terpa, frá tí at tey byrjaðu at læra seg og til tey hætta sær at skipa. Sjálvandi
mugu tey sleppa at kvøða hesi kvæðini onkuntíð – tað skylda vit teimum. Annars
endar tað við, at vit bara kvøða nøkur fá kvæðir uppí saman  – tað verður turrisligt eftir mínum tykki. Eg
haldi eisini, at vit heilt tilvitað skulu hava nakrar danskar vísur til
landsdansistevnu. Hesaferð kvóðu vit bara Hafburd Konge.

Kann ikki
lata vera við at nevna  Andreu Opielka,
sum hevur skrivað bók um føroysku dansispølini. Hon kemur so fegin á stevnu við
Fótatraðk. Ótrúligt, at ein útlendingur kann blíva so bitin av føroyskum dansi,
og hon kvøður eisini dúgliga við.

Til líknandi
tiltøk við so nógvum fólki eru altíð nakrir 
duravørar/vaktir – tað hava vit ikki í føroyskum dansi og tað er heldur
ikki neyðugt. Tað kunnu vit gott loyva okkum at vera errin av.

Enn vita vit
ikki, hvar landsdansistevnan verður í 2019. Tað fara vit umrøða á komandi
aðalfundi.

 

Norðskáli,
juni 2016 – Kathrina

Í samband við norðoyastevnuna, skipar Klaksvíkar
Dansifelag fyri almennum føroyskum dansi,
fríggjakvøldið 03.juni kl.23 í
Skálanum.

Kostnaður 50 kr.

Møtið fjølment.

–
Nevndin

Myndin er tikin í Hørpuni í Reykavík í sambandi við at børn úr Klaksvíkar dansifelag vóru partur av framførsluni:
Veiða vind. Tey kvóðu brot úr Ólavur Riddararós.

 

Barnadansistevnan hjá Sláið Ring og
Jómsvíkingum  30. apríl  2016  –  at
seta við….

Árliga
landsdansistevnan fyri børn – tann 13. í  røðini – varð hesaferð hildin vesturi á
Eiðinum í Vági. VB-húsið og ítróttarhøllin vóru karmur um stevnuna, sum
Jómsvíkingar skipaðu fyri. Gott samstarv við strandferðsluna gjørdi, at Smyril
sigldi suður á Vág henda leygarmorgunin.

Fyrsta
landsbarnastevnan var á Háskúlanum í Havn 2004. Síðani hevur hon verið á
hvørjum ári  – lokalu dansifeløgini hava
skifst um at skipa fyri saman við Sláið Ring, sum betalir alla stevnuna – bæði
mat, ferðing og gisting.

17 ára gamla
Kala Vilhelm setti stevnuna. Eg kendi meg sjálva aftur, tá hon fortaldi, at
hennara javnaldrar hildu hana vera eitt sindur undarliga, tí hon tímir at dansa
og læra seg kvæðir. Vónandi verður hesin hugurin verandi líka sterkur, so Kala
blívur við at dansa. Vónandi eru fleiri ung við henni, sum eisini velja
føroyskan dans sum sítt besta frítíðarítriv. Tað er fyritreytin fyri, at
dansurin kann vera livandi í Føroyum.

Tá stevnan
verður hildin norðanfjørðs, verður byrjað kl. 10.00 og givist uml. kl. 15.00.
Men í Suðri mugu vit vera, til Smyril siglir aftur, so tíðin har suðuri bleiv
væl longri enn hesar fimm tímarnar, men so bleiv bara so mikið meir dansað.
Dansiskráin fyri stevnuna var lítið barnavinarlig – har var mest av ordiligum
kvæðum, men av tí at tíðin bleiv so long har suðuri, fingu vit kvøðið alt tað
smáa kortini. Vit stóðu øll í einari rúgvu á gólvinum í VB-húsinum, tá dansurin
byrjaði, so eg hugsaði, at hetta fór at vera líka fløkjasligt, sum dansurin á
Vaglinum á Ólavsøku. Munurin er bara, at hesi fólkini duga at bera seg at í
føroyskum dansi og vilja hava góðan føroyskan dans, so tað var bara ein løta,
so dansaðu øll somul – 400-500 fólk – við sama stevi.

Maturin var
góður, køkur, kaffi, te, saft og frukt var at fáa allan dagin. Og milliónbúffur
og skrúur til øll um døgurðatíð.

Útferðir eru
fastur táttur á hvørjari barnadansistevnu. Hesaferð fór okkurt felag gongutúr í
Vági, onkur til Porkeris og vit frá Eysturoyar dansifelag vóru so heppin, at
vit sluppu á bygdasavnið Í Sumba. Har sóu vit stóra samling av fuglum – 122 í
tali, gamlar bindi- og seymimaskinur, eitt vaflijarn, sum ikki var til
elektrisitet, men skuldi leggjast á heita plátu o.m.a.

Vit valdu at
fara heilt vestur á Eiðið við nøkrum børnum, har tey fingu eitt sindur at vita
um jarðfrøði.

Tá vit komu
aftur í VB-húsið, var framvegis nakað at bíða eftir bussinum, sum skuldi koyra
okkum aftur til Smyril á Krambatanga, so vit fóru aftur at dansa í gongini.

“Kann verða,
eg sleppi næstu ferð, tí eg mennist í hvørjum.
Nei, ongastaðni so stuttligt er at liva, sum í Føroyum.”
Her er tað land, sum mær hóvar.

Var seinasta
ørindi, sum bleiv kvøðið á barnadansistevnuni í Vági.
Sanniliga ein góður dagur fyri føroyskan dans.

Kathrina,
Eysturoyar dansifelag.

 

Broytingar

• 30. apríl: Broyting á leið 7: Leygardagi…n 30. apríl siglir Smyril av Havnini kl. 07:00 og suður á Vág. Fráferðin kl. 09:30 av Krambatanga verður flutt til kl. 09:45 úr Vági. Siglt og koyrt verður sambært galdandi ferðaætlan restina av degnum.

Barnalandsdansistevnan 2016

Skrá yvir hvussu kvøðast skal:

Feløg Fyrsta umfar Annað umfar

1. Jómsvíkingar	Ormurin Langi (20 ørindir	Flóvin Bænadiktson
2 Vága Dansifelag	Einar Suðuroyingur	Leivs kvæði (23 ørindir) Eg var boðin í Brúðleyp
3.Eysturoyar Dansifelag	Mallebro	Tølini
4. Tvøroyrar Dansifelag	Sigmundskvæði (y)
5. Leikum Fagurt	Kall og Svein ungi
6. Sumbiar Dansifelag	Bjerget	Huldugentan
7. Havnar Dansifelag	Brestis kvæði
8. Klaksvíkar Dansifeløg	Stolt Signhild
9. Tøkum Lætt	Kongadótturin í Nólsoy
10. Frítíðarskúlin á Velbastað	Hørpuríma (39 ørindir)
11. Suðuroyar N. Dansifelag	Ólavur Riddararós
12. Dansifelagið á Látrinum

Tíðin her suðuri verður so long, at nógv annað kann kvøðast…