Category: Tíðindi

Endiliga sluppu vit aftur at dansa sum vanligt. Tí hava øll dansihugað fólk longst eftir hetta seinasta hálvaannað árið, nú koronafarsóttin hevur gjørt tað heilt ómøguligt at dansa føroyskan dans. Smílini vóru eisini hjartalig og gleðin stór, nú fólk úr øllum feløgum í landinum og úr Fótatraðk, uml. 370 í tali, hittust aftur. Dansifelagið í Havn og Tøkum Lætt skipaðu fyri stevnuni í felag.

Fyrsta landsdansistevnan var vesturi í Vágum í 1983, og hendan, sum er tann 14. í røðini, er tann triðja í høvuðsstaðnum. Hinar vóru í 1989 og í 2001. Tað eru bert 2 ár síðani, at stevnan var á Eiði, hóast tað vanliga hevur verið tŕy ár millum stevnurnar. Orsøkin er, at norðurlendska dansistevnan ”Havleikur”, skal vera í Havn 12.-17. juli 2022. Tað hevði verið ov mikið, at havt tvey so stór tiltøk fyri somu fólk sama summar, og tí bleiv landsdansistevnan hesaferð framskundað eitt ár.

Ein landsdansistevna er ein stór veitsla, sum byrjar við setan og síðani er borðhald við góðum mati. Av fyrstan tíð var ætlanin at seta stevnuna á Vaglinum, men tíverri tók Voxbotn seg framum, so tað bleiv av ongum. Kanska gott tað sama, tí tað fór at regna, so Heðin Mortensen, borgarstjóri, setti stevnuna inni í ”Dansifrøi”, har borðhaldið eisini var.

Nokk av góðum mati frá Magna Garðalíð og hansara fólki. Tað var sjálvtøka, og tað gongur væl skjótari enn servering við føtum.

Á dansistevnuni á Eiði fyri trimum árum síðani gjørdu vit fyrstu ferð tað, at nakrar fáar ordiligar røður vórðu hildnar, heldur enn at umboð fyri hvørt felag segði nøkur orð. So sera skilagott. Á hesari stevnuni talaðu bert Gunnar Restorff, formaður í Sláið Ring, og Hanus Kamban undir borðhaldinum. Hesum skulu vit halda fast í. Sá røðuna hjá Hanusi aftur í Dimmu, sum kom 28. august. Gott, tí vit mugu onkuntíð gera vart við, at vit eru til. Tórður Mikkelsen frá Kringvarpinum var eisini á stevnu, og nøkur brot, har hann prátaði við fólk, hava verið at sæð í sjónvarpinum.

Á umboðsráðsfundi hjá Sláið Ring 1.mai umrøddu vit m.a. ymiskt, sum hoyrir landsdansistevnuni til. M.a. bleiv nógv tosað um dansileistin, sum hevur verið brúktur á øllum stevnum frammanundan hesari. Skjótt var semja um, at royna okkurt annað, tí tað er so troyttandi at bíða alla náttina eftir tørni hjá teimum feløgum, sum er seinast á skránni. Skotið varð upp, at fáa feløg at kasta saman um at kvøða, so planlagda skráin var skjótari frá hondini. Eg haldi, at hugskoti var gott, men at vit kortini fingu ov fá forkunnug kvæði og vísur, tá av tornaði. Tað eigur at vera okkurt av slíkum, tá vit samla elituna í føroyskum dansi. Hetta mugu vit gera okkurt við til næstu stevnu. Vit í Eysturoyar dansifelag kvóðu ”Jákup á Møn” saman við Klaksvíkar dansifelagi. Joen Carl Danielsen og Jóngerð Midjord skipaðu. Á landsdansistevnu fyri 20 árum síðan skipaði Joen Carl ”Kong Hans” í Sjónleikarhúsinum.

Eitt annað gott hugskot frá umboðsráðsfundinum var at lata fólk undir 30 ár sleppa á stevnu fyri kr. 100, meðan hini betaltu 300. Eini 50 fólk undir 30 ár vóru á stevnu. Hetta betala vit í Sláið Ring fegin. Tað er okkara størsta ábyrgd at seta við.

Eg kann ikki lata vera við at nevna Andreu Opielka, sum so fegin kemur til Føroya á landsdansistevnu ferð eftir ferð. Hon hoyrir til hjá okkum nú og hevur givið okkum frálíku bókina um dansispøl.

Eftir ætlan verður landsdansistevna aftur um uml. trý ár, várið 2024 í Vágum.

Norðskáli, septembur 2021,
Kathrina Hansen

»Ung í Dansi« fara at hittast til dans í Kvívík leygarkvøldið 9. oktober 2021. Vit møtast kl. 18 og fáa guidaðan søguligan rundtúr í bygdini. Síðani fáa vit góða fiskasuppu til nátturða áðrenn vit fara oman í Frøishøllina til almennan dans uml. kl. 21. Tiltakið er ókeypis fyri limir í Ung í Dansi, men neyðugt er at tilmelda seg við at skriva eini persónlig boð til Elmu Næs Mortansdóttir antin á facebook ella við telduposti á elma.naes.mortan@gmail.com í seinasta lagi mikudagin 6/10-21

Hugnakvøld við føroyskum dansi 29. oktober 2021

29. oktober 2021 skipar Klaksvíkar dansifelag fyri hugnakvøldi við føroyskum dansi. Tiltakið verður kl. 21.00 – 01.00 í Skálanum, Bøgøta 11, 700 Klaksvík.

Hugnakvøldið byrjar við sangløtu og hugleiðingum. Jóanes Johannesen spælir á harmoniku og frásøgufólk verða:

Ásbjørn Lómaklett, uppvaksin á Syðradali,

Jóngerð Midjord, uppvaksin í Haraldssundi

Jónleif Johannesen, uppvaksin í Dali.

Evnið, hugleitt verður um, er: Bygdin, kvæðini og dansurin.

Tey trý frásøgufólkini eru øll sera áhugað í kvæðamentan okkara og royndir skiparar.

Kostnaðurin fyri tiltakið er 150 kr., og tilmeldingarfreistin er 25. oktober 2021.

Tilmeldingin fer fram hjá Jónleifi Johannesen á telefon 742200 ella við at senda teldupost til: jonleif.johannesen@skulin.fo

Klaksvíkar dansifelag

Nú nærkast, at vit fara til Mikladals

Her kemur ein vegleiðandi skrá.

Fríggjadagur 10. septembur

Vit møtast øll kl. 18:10 við lendingina hjá Sam í Klaksvík, og vit sigla kl. 18:30. Ein bussur bíðar eftir okkum í Syðradali og koyrir okkum víðari til Mikladals. Vit gista í Avhaldshúsinum í Mikladali. Har eru madrassur at sova á, so bert er neyðugt at hava soviposa við. Tá vit koma til Mikladals fáa vit okkurt at eta og so er hugni á skránni.

Leygardagur 11. septembur

Morgunmatur er kl. 9:00, og síðani er ætlanin, at vit fara gongutúr út á Kallin við ferðaleiðara. Vit smyrja matpakka og hava matpakkar við. Klokkan 17 er døgurði og eftir døgurða er aðalfundur. Um kvøldið verður almennur dansur.

Sunnudagur 12. septembur

Vit eta morgunmat, rigga av og møguleiki er at fara í kirkju kl. 12. Bussurin koyrir 13.55 úr Mikladali og báturin fer kl. 14:20 aftur til Klaksvíkar.

Tey, ið ikki hava fart norð til Klaksvíkar kunnu skriva til nevndina – so finna vit eitt pláss til tykkum í einum bili.

At hava við

• Soviposa
• Heit klæðir
• Góðar gangiskógvar

Vikuskiftið 10. til 12. septembur 2021 verður skipað fyri tiltakinum Ung í Dansi í Mikladali. Her møtast ung í aldrinum 12 til 30 ár at dansa føroyskan dans saman. Tað er ungdómsfelagið í Sláið Ring – Ung í Dansi – ið skipar fyri. Hetta hevur verið afturvendandi tiltak í fleiri ár, føroyskum dansi at frama. Vit møtast sum vanligt til eitt vikuskifti við nógvum dansi, spølum og hugna sum heild. Vit fara onkran túr og eisini kemur onkur at fortelja um eitthvørt viðvíkjandi føroyskum dansi.

Tiltakið er rúsfrítt og ókeypis!

Tit kunnu tekna tykkum, við at skriva eini privatboð til Inga B. Davidsen á Facebook, ella við at skriva ein teldupost til ingi.b.davidsen@gmail.com

Vit síggjast – um, nakrir spurningar eru, so spyrjið endiliga!

Seinasta freist at tekna seg er 6. september 2021. Nærri kunning viðv. ferðing o.ø. kemur seinni á sr.fo. Eisini verður aðalfundurin hjá felagnum Ung í Dansi leygarkvøldið 11. september 2021 í Mikladali.

Aðalfundurin hjá Ung í Dansi verður í Avhaldshúsinum í Mikladali leygarkvøldið 11. september 2021 kl. 18:00 saman við tiltakinum “Ung í Dansi”, ið er í Mikladali vikuskiftið 10.-12. september 2021.

Skrá sambært lógum felagsins:

1. Val av orðstýrara og fundarskrivara
2. Ársfrágreiðing
3. Framløga av grannskoðaðum roknskapi til góðkenningar
4. Viðgerð av innkomnum málum.
5. Nevndar- og varalimir verða valdir
6. Val av grannskoðara
7. Ymiskt

Til øll limafeløgini og umboðsráðslimirnar

Við hesum verður boðað frá, at aðalfundurin hjá Sláið Ring verður 

leygardagin 11. septembur 2021 kl. 12:00 í U407 á 4. hædd í Sjóvinnuhúsinum á Vestaru bryggju í Havn.  

Fundarskráin verður sambært lógum felagsins, og harumframt hava feløgini møguleika at senda uppskot um mál, ið tey vilja hava viðgjørd.

Mál frá feløgum
Mál, ið feløg vilja hava til viðgerðar á aðalfundinum skulu vera nevndini í hendi í seinasta lagi leygardagin 28. august 2021.

Fundarskrá til ársaðalfundin
1. Val av orðstýrara og fundarskrivara.
2. Ársfrágreiðing.
3. Framløga av grannskoðaðum roknskapi til góðkenningar.
4. Viðgerð av innkomnum málum.
5. Ásetan av limagjaldi fyri komandi árið.
6. Val av nevnd og tiltakslimum.
7. Val av grannskoðara.
8. Ymiskt.

Skrá fyri aðalfundin og nærri kunning verður send fyrst í september. 

Nólsoy, hin 14. august 2021
Gunnar Restorff, fm
Sláið Ring

Nú vit í dansifelagnum á Látrinum hendan seinasta veturin ikki hava hitst á Látrinum so ofta, sum vit plaga, gjørdu vit av, at dansifelagið skuldi gera eina útferð – eina samansjóðandi útferð.

Hin 19. juni var kósin sett móti Klaksvíkini, har ið Sam bíðaði eftir at føra okkum yvir í Kalsoynna.

Vit fóru av Eiði við bussi hendan leygarmorgunin og steðgaðu so á vegnum eftir teimum, ið ikki búgva á Eiði.

Tá ið vit komu í Kalsoynna, fóru vit við rutuni til Mikladals, har ið vit høvdu bílagt okkum morgunmat á Eðge, ið er ein hugnalig café. Her fingu vit ein frálíkan morgunmat, og blíðskapurin var stórur. Eisini fingu vit høvið at royna tað nýggja gólvið í kjallaranum á Eðge. Tá ið man sum dansifelag er í Mikladali, so var tað so líka til, at tað var eitt brot úr Kópakvæðnum, ið var tikið á gólvinum har.

Aftaná dansin gekk leiðin oman at heilsa uppá Kópakonuna. Tað vóru tó ikki øll, ið hættaðu sær oman allar trappurnar, men øll tey, ið fóru oman, komu eisini heil niðan aftur. Eyðun Eliasen var komin til Mikladals at vera frásøgumaður, og hann fortaldi nógv áhugavert. M.a. fingu vit at vita hvar Sunnanágarðurin, ið nevndur er í Kópakvæðnum, var. Vit hoyrdu um Marjunar Hav, og vitjaðu eisini smiðjuna og kirkjuna. Sum so ofta tá ið gott fólk er komið saman, rann tíðin undan okkum, tí bussurin, ið skuldi koyra okkum til Trøllanesar, bíðaði. So hóast vit sikkurt kundu gingið í Mikladali ein tíma longur, fóru vit ein túr til Trøllanesar.

Á Trøllanesi nýttu fólk løtuna til at spáka og hyggja seg um. Onkur keypti sær eina kjøtpylsu o.a. Her er høgt bæði omanfyri og niðanfyri. Høgt upp í fjøllini og oman á lendingina. Hendan dagin var dýrdarveður, men mann kann ímynda sær, hvussu tað er um veturin, tá brimið stendur í grasið. Av Trøllanesi var farið við rutuni til Húsar, har vit skuldu njóta ein góðan bita frá Hannebeth og Magna Garðalíð.

Tá ið vit vóru mett og vælsett, var enn ein løta, til rutan koyrdi til Syðradals, so vit fóru oman í kirkjuna, har Elin Syderbø greiddi frá. M.a. sóu vit messuaklarnar, ið hoyra til kirkjuna. Kirkjan var høg og ljós, og Elin helt, at fyrimyndin mundi vera Nidarosdomen.
Summi úr ferðalagnum valdu at fáa sær ein góðan gongutúr, og fóru til gongu til Syðradals.

Óansæð um man gekk ella fór við rutuni, so komu vit øll umborð aftur á Sam, ið nú førdi okkum til Klaksvíkar, har bussurin bíðaði okkum.

Vit høvdu ein sera góðan og hugnaligan dag í Kalsoynni. Slíkir dagar styrkja um felagskensluna og eru góðir at taka fram aftur úr minninum.

Hildur K. Sørensen
Dansifelagið á Látrinum

Í sambandi við at Tøkum Lætt og Danisfelagið í Havn, vegna Sláið Ring, skipa fyri landsdansistevnu 21-08-2021 vilja vit fegin bjóða øllum dansifeløgunum og dansiáhugaðum til stevnuna.

Stevnan verður í Havn tann 21-08-2021 í Sjónleikarhúsinum og í Dansifrøi.

Luttøkugjaldið er kr. 300 fyri hvønn, men í eini roynd at seta ung fólk við er avgjørt, at fólk undir 30 ár rinda kr. 100 hvør.

Tilmeldingarfreistin er skjótast gjørligt og í seinasta lagi 08-08-2021. Tilmeldingarnar fara fram hjá dansifeløgunum hvør sær, og síðani melda dansifeløgini til við telduposti til birgirdjurhuus@gmail.com, og gjaldið fyri luttøku flyta dansifeløgini samlað inn á konto hjá fyriskiparunum.

Íroknað luttøkugjaldið er:
Døgurði og omaná, vín, øl ella sodavatn (1 stk. pr. høvd) og durasnapsur. Skonkt verður sjálvandi undir borðhaldinum. Barr verður í báðum støðum so møguligt verður at keypa drykkivørur fyri sámuligan prís. Náttmatur er eisini íroknaður og bussar innanhýsis í Havn til og frá Sjónleikarhúsinum.

Skráin fyri dagin er hendan:

• Kl. 17:00 møtast vit í Dansifrøi, har stevnan verður sett.
• Borðhaldið byrjar kl. 18:00 í Dansifrøi.
• Eftir borðhaldið fara øll oman í Sjónleikarhúsið har dansurin byrjar kl. 21:30
• Um miðnátt verður nátt-matur at fáa, og dansurin heldur áfram.

Kvæðini, ið eru sett á skrá, eru hesi: Brestis kvæði, Viljormur Kornus, Hoyberatátturin, Kópa kvæði, Jákup á Møn, Huldugentan, Ungdómsvísan.

Viðvíkandi koronasmittufyribyrging:

• Fólk, sum hava sjúkueyðkenni ella eru sett í sóttarhald, mugu sjálvandi ikki møta.
• Heitt verður á øll, ið ikki eru liðugt koppsett, um at hava eina negativa test frá hósdegnum 19. august ella fríggjadegnum 20. august 2021. Liðugt koppsettur merkir, at tað eru minst 8 dagar síðani seinna prikið.
• Fyri fólk, ið hava verið uttanlands seinastu 14 dagarnar, er fylgjandi galdandi:
  • Liðugt koppsett (t.v.s minst 8 dagar síðani seinna prikið): negativt svar skal vera komið frá testini við komu.
  • Ikki liðugt koppsett: negativt svar skal vera komið frá testini 4. dag eftir komu.
  • Harumframt heita vit á øll, ið hava verið uttanlands seinastu 14 dagarnar, um at hava eina negativa test frá hósdegnum 19. august ella fríggjadegnum 20. august 2021

Vit vóna at síggja mong fólk til stevnuna, og heita á feløgini um at reka dúgliga so at vit fáa ein so góðan dag sum til ber.

Er okkurt at spyrja um, ella er okkurt tit ivast í eru tit vælkomin at seta tykkum í samband við okkum.

Vegna Tøkum Lætt og Dansifelagið í Havn

Andreas Sigurstein, ajs@olivant.fo
Birgir Djurhuus, birgirdjurhuus@gmail.com