Summarleiren og NORDLEK 2024 fyri ung í aldrinum 15 til 26 ár.
Ert tú í aldrinum 15 til 26 ár, so kanst tú nú tekna teg til summarleguna og NORDLEK 2024.
Vit flúgva beinleiðis við Atlantsflogi úr Føroyum til Oslo mikudagin 10. juli 2024 kl. 08:00 og heimaftur sunnudagin 21. juli 2024 kl. 16:35.
Mikudag 10.07 til fríggjadag 12.07 ferðast vit í suðurnoregi og síggja ymiskt og fara at vísa fram dans v.m. Ætlanin er m.a. at vitja Setesdalen og Kristiansand.
Fríggjadag 12.07 til týsdagin 16.07 verður summarlegan fyri norðurlendsk ung nærindis Arendal.
Týsdagin 16.07 til leygarkvøldið 20.07 verður sjálv høvuðsstevnan í Arendal.
Tey ungu gista saman á skúla.
Øll ferðin er púra rúsfrí! Luttakarar skulu sjálvir tekna ferðatrygging.
Egingjaldið fyri flogferð, ferðing í Noregi, útferð, gisting og mat verður kr. 3.500 fyri hvønn luttakara, og tá er stuðul á á leið 4.000-5.000 drigin frá. Krav er harumframt, at luttakarar eru limir í Ung í Dansi árið 2024, og luttakararnir skulu vera virknir í fyrireikingunum um várið 2024 (læra seg neyðug kvæði, dansir v.m.).
Luttakaratalið úr Føroyum er avmarkað til 20 ung, og tí sleppa bert tey fyrstu 20, sum melda til, við. Skrivið teldupost til sr@sr.fo, har tit upplýsa
- fornavn,
- eftirnavn,
- føðingardato,
- fullan bústað,
- telefonnummar
- teldupost
Við tilmelding verður goldið kr. 500 í depositum inn á konto nr. 9181-1564368 í Betri Banka. Í seinasta lagi 1. mai 2024 skal restin, kr. 3.000, gjaldast.
