Category: Tíðindi

Barnlek – norðurlendsk  barnadansistevna í Klaksvík 6-9. Juli 2017

Í seks ár
hava vit vitað, at Sláið Ring í 2017 skuldi skipa fyri norðurlendsku
barnadansistevnuni Barnlek saman við Klaksvíkar dansifelag og Klaksvíkar
kommunu. Tá stevnan, sum verður hildin triðja hvørt ár, var í Skive í Danmark í
2011, heitti leiðslan í Nordlek á Sláið Ring um at hava stevnuna í Føroyum í
2017. Fimm fólk hava mannað stevnunevndina, Rasmus Joensen, sum hevur verið
formaður í landsfelagnum Sláið Ring í nógv ár, Trygvi Samuelsen og Maria
Kristiansdóttir úr Norðstreymoyar dansifelag, sum hava umboðað Føroyar í
Nordlek í nógv ár, og so Brynjálvur Sigurðsson og Birna Jacobsen fyri
Klaksvíkar dansifelag. Tey hava øll arbeitt av øllum alvi í meir enn eitt ár.

Nógv er at
gera til eina slíka stevnu. Hølir skullu fáast til gisting, dans, at eta í, verkstovur
o.a. Søkjast skal um fíggjarligan stuðul úr ymiskum grunnum. Øll kunning, sum
verður løgd á heimasíðuna skal týðast til finskt, tí ikki allir finnarnir, sum
koma, skilja norðurlendskt. Fleiri 100 luftmadrassur skulu vera tøkar. Neyðugt
er at gera skeltir, so útlendingarnir – teir flestu hava ongantíð verið í
Føroyum áður – kunnu finna í býnum. Setan og endahátíð skulu fyrskipast.
Samarittar er eitt krav á slíkum stevnum. Og ikki minst er neyðugt at finna ein
kokk, sum kann gera mat til 600-700 fólk í fleiri dagar. Umframt nógv annað.

Veðrið kann
– sum vit øll vita – bæði bjarga og forkoma einum slíkum tiltaki. Vit vóru sera
heppin í so máta. Loyvi mær at siga, at tað var gott, at tað fór at regna, so
vit máttu brúka plan-b og seta stevnuna inni í badmintonhøllini. Tí alt tiltakið
hevði verið ov langt burtur frá áskoðarunum, um stevnan bleiv sett á
fótbóltsvøllinum í Djúpumýru, sum ætlað. Fríggjadagurin var so framúr til veður,
so dansurin runt í býnum riggaði av tí besta. Tað bleiv aftur neyðugt at brúka
plan-b til dansin í býnum leyðardagin.

Stevnan
byrjaði hósdagin 6. juli, men fyrstu útlendingarnir komu longu sunnudagin 3.
juli. Limir úr Klaksvíkar dansifelag  tóku ímóti teimum og vístu teimum til rættis.

Í summar
hava miðlarnir gjørt sera nógv burturúr bæði Oyggjaleikum og føroyskari luttøku
í altjóða hondbóltskapping. Fyri ikki at tala um stór nøvn, sum vera kunngjørd
til allar hesar tónleikafestivalarnar. Alt gott um tað. Haldi kortini, at
Barnlek 2017 kundi fingið størri pláss í miðlunum. Tí hóast vit, sum dansa,
ongan kappast við og onki heiðursmerki vinna, so eru vit minst líka góð umboð
fyri okkara kæra Føroyland, og líka glað og errin fara vit við Merkinum. Tað
merkist best, tá ein slík stevna verður sett og fløggini verða borin inn – tað
rørir hjartastreingirnar hvørja ferð. Ikki 
bara hjá okkum føroyingum, men øllum hinum londunum eisini, og tað er
ein stórur heiður – og ábyrgd – at verða biðin at bera flaggið. Tað eru altíð
tvey, sum fylgjast við hvørjum flaggið – merkismaðurin ber flaggið og
flaggvaktin fylgist við honum. Hesin siður er helst komin, áðrenn eitt flagg
bleiv merkið fyri eina tjóð. Í gomlum  døgum var eitt flagg stavnhald, tá ein herur
fór í kríggj, og um flaggið fall til jarðar, hevði tú tapt. Tí skuldi flaggvakt
fylgjast við merkismanninum og taka flaggið, um merkismaðurin fall frá.

Havi fleiri
ferðir verið uttanlands og dansað  – bæði
á Nordlek og við Eysturoyar dansifelag. Á slíkum ferðum fara vit fleiri ferðir
í føroysk klæðir – sjálvandi, og tá blíva vit so ómetaliga sjónlig – nógv
sjónligari, enn vit geva okkum far um, tí ein tjóðbúni er so serligur.

Hvørja ferð
eg síggi ein tjóðbúna – føroyskan ella útlendskan – hugsi eg um øll tey ymisku
sløgini av hondarbeiði, sum mugu gerast, áðrenn liðugt er. Um vit taka føroysk
klæðir, so skal bindast, vevast, broderast, seymast, bregdast, virkast og
tøvast. Og so skal silvuri pussast, áðrenn klárt er at lata seg í. Onkur omma
ella mamma hevur totast at fáa liðugt og onkur gleðist um at sleppa í eini
klæðir, sum abbi ella omma hevur átt.

Aftur til Barnlek
2017.

Klaksvíkar
kommuna hevur verið okkum beinasom. Umframt at lata okkum skúlar til gisting,
ítróttarhallirnar til mat og dans, kundu  luttakararnir á Barnlek svimja ókeypis í
svimjihøllini, nakað sum teir vóru sera glaðir fyri. Klaksvíkin er óivað besta
stað í landinum til slíkt tiltak, tí hallir og skúlar eru í einum trunka, og
tað er stuttur vegur til alt.

Maturin er
eitt stórmál á slíkari stevnu. Avtalað bleiv gjørd við Viljan v/Magna Garðalíð
á Húsum, sum hevur fingið sær flytbaran køk, um at matgerða til stevnuna. Tað
skal nógvur matur gerast til 600 fólk tríggjar ferðir um dagin hvønn dag í fleiri
dagar, so stóri pottur má útá hvønn dag. Men ikki bara tað. Hugsast skal eisini
um vegetarar, og tey, sum stríðast við ovurviðkvæmi, mugu siga frá, so kokkurin
kann gera mat, sum tey kunnu eta.

Tað krevur
góða manning at fáa slíka stevnu at bera til, og ikki ber til hava lønt fólk
til alt. Uml. 300 postar skuldu mannast við sjálvbodnari arbeiðsmegi, sum fyri
tað mesta kom frá dansifeløgunum, men eisini nógv fólk úr norðoyggjum, sum onki
hava við dansin at gera, tóku ein hond í. Stóra takk skulu tit øll hava, tí
annars var ikki møguligt at hava stevnuna. Men tíbetur er onnur løn til enn
tann, sum verður  goldin  í pengum. Tað er eisini stuttligt, at vera
við, tí væl bar til at fara í býin at hyggja at dansinum bæði fríggjadagin og
leygardagin ímillum arbeiðsuppgávurnar og soleiðis vera eitt sindur á stevnu
samstundis. Og hvør veit, um ikki okkara sjálvbodni innsatsur, tá av tornar,
kann avgera, um føroyskum dansi og fólkadansinum í okkara grannalondum, verður
lív lagað, tá vit, sum nú eru hálvgomul, tagna.

Verkstovur
er fastur táttur á stevnum, sum hesari. Amanda, Durita og Lina úr Klaksvíkar
dansifelagi stóðu fyri hesum partinum. Tað ræður um at finna upp á okkurt, sum
børnini ikki uppliva aðrastaðni, so tær valdu at lata børnini sleppa at tøva
ull og fara á seiðaberg á Kósabrúnni – tað eru tey neyvan sloppin
aðrastaðni.  Formaðurin í Klaksvíkar
dansifelag Heini Mohr og aðrir hjálptu til á Kósabrúnni.

Okkurt má
vera til tey hálvvaksnu, har tey fáa frið fyri smábørnum og vaksnum. Í Skálanum
bleiv salurin innrættaður við sofum og øðrum, har tey dansaðu nakað út á
náttina.

Uml. 570 fólk
vóru meldað til stevnuna – 420 útlendingar og 150 føroyingar, sum høvdu valt at
búgva á skúlum – eisini tey í Klaksvík, sum saktans kundu búð heima. Fólkadansarar
eru glaðir amatørar og bæði føroysku og útlendsku børnini hava vant dúgliga til
Barnlek. Her í Føroyum ber saktans til at samla børnini nakrar ferðir at dansa.
So lætt er tað ikki t.d. í Finnlandi ella Grønlandi. Tí máttu tey fáa eitt høli
til venjing, so tey kundu dansa seg saman, tá tey vóru komin til Føroya. 

Barnlek var
hildið fyrstu fer í Falun í Svøríki í 1982. Føroyingar vóru við á fyrsta sinni
í Ringsted í 1998. Føroyski hópurin ta ferðina taldi 80 fólk úr Sumba,
Norðstreymi, Eysturoynni og av Sandi. Barnlek verður aftur í 2020 á Gøteborg-
leiðini í Svøríki. Fólkadansurin hevur tann stóra fyrimun, at onki aldursmark
er, og tað ger heldur onki, um onkur dansar skeivt. Tað, sum um ræður á
Barnlek, er at fáa dansigleðina í børnini – onki annað. Heilt smá børn dansaðu
eisini við til framsýningina – eg legði serliga merki til tvær danskar
smágentur uml. 3 og 5 ára gamlar, sum helst vóru systrar. Gleðin lýsti av
teimum. Vit mugu fyri Guds skyld ikki rætta uppá so smá børn – tað kann koma
seinni. Tey skulu bara sleppa at vera glað. Føroyskur dansur/fólkadansur kann
eisini vera pallurin hjá teimum, sum ikki duga ella tíma bólt ella aðra
kapping. Vit skylda teimum at gera eitt stað, har tey kunnu brúka síni evnir og
sleppa at umboða sítt land, hóast tey ikki kappast og vinna heiðursmerkir.
Soleiðis seta vit við, og tað er neyðugt, um dansurin skal yvirliva.

Nú fáast vit
við at rigga av. Tað er altíð gott at koma í gott orð, og vit kunnu koma
dansinum í gott orð – ikki bara við at dansa – men eisini við at ganga væl um,
har vit eru – t.d. nú í Klaksvík. Taka væl upp eftir okkum, gjalda rokningar
til tíðina osv.

Kann ikki lata
vera við at nevna ungu fólkini í Klaksvíkar dansifelag. Tey hava verið ófør til
Barnlek 2017. Stóra takk fyri.

Eg vóni, at
vit kunnu fara til Svøríkis um trý ár við fittum hópi av føroyskum børnum.

Vegna Sláið
Ring, Kathrina Hansen.

Dansiferð í Skúvoy 10. juni 2017.

Fornminnafelagið
í Skúvoy byrjaði fyri nøkrum árum síðani at bjóða einum dansifelag til Skúvoyar
at dansa hvørt ár í juni mánað. Fyrstu ferð var í 2013, tá sumbingar blivu  bodnir. Í ár fingu vit í Eysturoyar
dansifelag høvi til at gera dansiferð til Skúvoyar.  Óført av so fáum fólkum – umleið 20 fólk liva
gerandisdagin í Skúgvi. Anna Maria, sum hevur dansað við okkum í nógv ár, er
slektað úr Skúgvi. Vit báðar fóru suður fríggjakvøld, so vit stóðu á lendingini
fyri hinum 30, tá tey komu við Sildberanum seinnapartin leygardagin.  Vit báðar fóru ein túr norð á Dal fríggjakvøldið,
so nú havi eg sæð Rannvátoft og Tróndarstein.

Síðani blivu
øll – gestir og vertir – boðin til góðan drekkmunn í skúlanum, sum stendur
ovast í bygdini. Bygdarráðsformaðurin Harry Jensen beyð vælkomin vegna
fornminnafelagið. Vit fingu at vita, hvar vit skuldu gista og skránna fyri
restina av túrinum.

Vit í
Eysturoyar dansifelag lærdu okkum kvæðið “Gøtuskeggjar” til dansistevnuna í
Klaksvík í fjør. Okkara Andras skipaði fyrru helvt og Óli í Tøkum Lætt
seinnu.  Tá fólkið var komið upp á land
leygardagin, fingu vit bæði Hans – meðan vit hugdu niðan í bygdina –  eitt prát um, hvar tað mundi vera, at Sjúrður
Tollakson leyp út av, tá hann skuldi flýggja úr Skúvoy undan Leivi Øssuron. Sjúrður
hevði fyri Tórð lága borið fram bønarorð til Turid megineinkjuna.

Tað er nakað
heilt serligt – og undarligt eisini – at koma til tey støðini, har hendingarnar
í kvæðunum hava gingið fyri seg. Tað eru feðgarnir báðir Jens Christian
Djurhuus (1773-1853) og sonur hansara Jens Hendrich Djurhuus(1799-1892), sum
hava yrkt kvæðini, sum siga frá hendingunum um Sigmund, Tór, Brestir, Beinir,
Trónd í Gøtu og øll hini. Skúvoyggin er nevnd í teimum flestu av hesum kvæðum. Ein
heilt serlig kensla at ganga í Skúvoy hendan dagin og ímynda sær fólkini og
tilburðirnar, sum fóru fram her fyri meir enn 1000 árum síðani.

Dansurin
byrjaði í skúlanum kl. 21.00. Tá høvdu øll fingið døgurða. Áðrenn vit fóru at
dansa takkaðu Louis og Jóna fyri okkum.  Skiparar eiga vit nógvar í Eysturoyar
dansifelag og øll góvu sítt íkast – Andras, Høgni, Anfinn, Kathrina, Louis,
Dia, Jóannes og Hans. Ormurin, sum Anfinn og Louis skipaðu í felag, hevur
ongantíð gingið betri. Sjey ára gamli Sverri, sum var yngstur á liðnum hjá
okkum, bað okkum kvøða “Veturin kom við kulda og kava”. Sjálvandi gjørdu vit
tað, og nakrar barnasangir afturat.

Tað má vera
eitt øðiligt knoss at liva á útoyggj. At hugsa sær , hvussu øll vøra skuldi
fáast niðan í bygdina, áðrenn vegurin kom og tað bar til at koyra. Tá mátti alt
fáast niðan gjøgnum trappurnar. Og so loyva vit okkum at knarra her á
meginøkinum.

Sunnudagin
kl. 12.00 hittust vit aftur til kirkjugongd – tað hoyrir við til eina góða
dansiferð. Allir tríggir kirkjutænararnir – klokkari, organistur og deknur – vóru
við í dansinum um náttina, so tað var, sum tað eigur at vera.

Seinnapartin
hittust vit aftur niðri á lendingini at biðja skúvoyingum farvæl og takka fyri
hjartaligan blíðskap. Eg haldi, at øll, sum høvdu riggað til , vóru komin á
støðna at biðja farvæl.  Ein dansiferð –
her í Føroyum ella til útlandið – er altíð góð, bæði fyri einstaklingin,
felagið og dansin.

Kathrina.

Tilmeldingarskjal
til øll hjálparfólk til Barnlek 2017

Í dag er hesin telduposturin sendur til
øll limafeløgini í Sláið Ring:

Hey góðu dansifeløg.

Nú royna vit enn
einaferð at fáa fatur á hjálparfólkum til Barnlek 2017.

Vit heita á øll
dansifeløg um at finna so nógv hjálparfólk sum yvirhøvur tilber frá hvørjum
felagi.

Vit hava fingið
høvuðspersónar til tær ymisku uppgávurnar, og nú mangla vit bert at fáa sett
navn á øll hjálparfólkini sum skulu hjálpa til.

Tað skulu vera 50 til
60 hjálparfólk tá stevnudagarnir eru, men í alt eru tað uml. 300 arbeiðs-vaktir
um hvørt hjálparfólk tekur ein heilan dag hvør. Eisini er brúk fyri
hjálparfólki áðrenn og eftir stevnudagarnar.

Skulu
ábyrgdarpersónarnir fáa tíð at gera eitt arbeiðsskema klárt áðrenn stevnan
byrjar, skulu vit fáa tilmeldingarskjalið aftur áðrenn 15.06.2017

Vinarliga 

Birna og Brynjálvur

—————

Eitt stutt ískoyti

Arbeiðsøkini eru hesi: Servering, vakt, náttarvakt, reingerð, áðrenn-
og eftir stevnuna.

Eisini verður heitt á fólk, sum ikki hava ávíst ynski, um at tekna seg
sum hjálparfólk, so vil leiðslan seta tey har, sum brúk er fyri teimum.


Hesir persónarnir hava ábyrgdina av ávísu
økjunum

Fyri Servering Ann Marie Petersen. Tlf
226929. Mail: amji1989@gmail.com

Fyri Vaktir og náttarvaktir Danny Osberg
Højsted. Tlf 218914. Mail: danosbhoj@outlook.com

Fyri Reingerð Jan Simonsen. Tlf 234291.
Mail: janm.simonsen@outlook.com

Fyri Áðrenn og eftir stevnuna Birna
Jacobsen og Brynjálvur Sigurðsson. 226375 / 214523. Mail: barnlek@sr.fo

Fyri Hjálparfólk Birna Jacobsen og
Brynjálvur Sigurðsson. 226375 / 214523. Mail: barnlek@sr.fo

Tit, ið vilja hjálpa til, vinarliga setið tykkum í samband
við felag tykkara og gerið eina avtalu. Tað er umráðandi, at upplýst verður
navn, telefon nr. og/ella teldupostur og arbeiðsøki.

Hey tit øll

Fundur verður í hølunum hjá Effo á
Óðinshædd 3 í Havn, leygardagin, 20. mai, kl. 12. Fundurin er lagdur soleiðis,
at øll kunnu koma aftur og fram sama dag, óansæð hvar í landinum, tit búgva.

Hesin fundur verður ein kunnandi
fundur, har vit koma at útgreina allar uppgávur, ið hjálparfólkini koma at taka
sær av, meðan Barnlek er. Hetta er m.a. vaktarhald, reingerð, køkshjálp og
servering.

Somuleiðis er ætlanin við hesum
fundi, at vit fáa endaliga greiðu á, hvørji hjálparfólkini verða. Tískil er
sera umráðandi, at boðini um hendan fundin, fara víða um í tykkara feløgum.
Brúk er fyri øllum kreftum, men helst skulu vit hava fólk yvir 16 ár. Einki
ovara aldursmark er, øll eru vælkomin at veita eina hjálpandi hond.

Øll, ið hava hug at hjálpa til, eiga
at koma við til fundin, soleiðis at allar uppgávur kunnu verða útlutaðar og
møguligir spurningar svaraðir og ivamál avgreidd.

Vit gleða okkum at síggja tykkum
øll.

Vinaliga

Vegna Barnlek 2017

Brynjálvur og Birna

“Upp á stovugólv” í Dali 18.februar

Í 2015 bleiv
felagið “Ung í dansi “, sum er felag fyri ung millum 16 og 30 ár, sett á stovn.
Tey eru 17. felagið í landsfelagnum Sláið Ring. Í fleiri ár frammanundan høvdu
ungdómar við áhuga fyri føroyskum dansi verið á legu ymsastaðni í Føroyum eina
ferð um árið. Eisini hava tey verið á ungdómslegum uttanlands í samband við
Nordlek nakrar ferðir. Síðani “Ung í dansi” var stovnað, hava vit  ótolnast eitt sindur eftir, at tey fóru at
skipa fyri onkrum tiltaki, og longi er tað, ið væl skal vera. Tað, sum tey
funnu uppá, var heilt nýtt í føroyskum dansi. Tey valdu at fara inn í privathús
hjá fólkum, sum hava fingið kvæðamentan og dans inn við móðurmjólkini.  Væl valt – bæði bygd og fólk. Tiltakið
kallaðu tey “Upp á stovugólv.” Tey, sum høvdu meldað til, blivu koyrd í
tríggjar bólkar, sum so gingu millum húsini.

Tiltakið var
í Dali, har Vilhelmina Larsen, og systkinabørnini  Borghild Ellefsen og Jóanes Johannesen –
uppvaksin í Dali – lótu okkum koma inn í sítt heim, har tey søgdu frá hvør
sínum kvæði, sum tey øll trý duga at skipa. Vit vóru 11 fólk, sum fylgdust hús
úr húsi, uml. ein tíma í hvørjum.  “Á
Deild” hjá Vilhelminu, sum er ættað av Trøð í Skálavík – abbadóttir
kvæðakempuna Trónda á Trøð – hoyrdu vit  um “ Fuglakvæðið eldra”, sum  hevur lag og niðurlag, sum eg ongantíð havi
hoyrt. Kvæðið er gamalt, so yrkjarin er ókendur. Vit kvóðu tey 28 ørindini við
pappíri í hond, tí bara Vilhelmina og dóttirin Helga dugdu.

So komu vit
í Stórhús til Jóanes. Á myndini situr hann og sigur frá um Stórhús – sítt
barnaheim – har fólk hava búð aftur til 1741, kanska longri. Svarti komfýrurin
á myndini er frá 1892 og har rúmast 9 breyð í senn. Fyrstu ferð, eg var í
Stórhúsi, var í 1982 og hagar eri eg komin javnan síðani. Eri sera takksom
fyri, at eg kom at kenna foreldrini hjá Jóanesi 
– Leoniu og Jens Ludvík, skila- og mentafólk bæði. Vit sluppu at síggja
eina bók við kvæðum, sum Jóanes sjálvur hevur skrivað við hond frá ungum av.
Hann fortaldi okkum eisini, at tá Jóannes í Króki(1794-1869) gekk bygd úr bygd
og skrivaði kvæðir upp, fekk hann tvey kvæðir úr Dali – bæði úr Stórhúsi. Tey
vóru “Kappin Illugi” og “Drósin á Girtlandi”.

Jóanes hevði
valt sær kvæðið “Eingríms synir” at fortelja um. Fyrru ferð landsdansistevnan var
í Sandoynni í 1992, byrjaði dansurin við hesum kvæði, sum Jóanes sjálvur
skipaði. Tað er lætt at læra, tí nógv ørindir eru, sum koma fyri í øðrum kvæðum
eisini og lagið er gott. Kvæðið  er um
eina fríggjaraferð, sum endar við blóðigum bardaga. Tað ber til at lurta eftir
tí á heimasíðuni hjá Eysturoyar dansifelag, har Jens Ludvík – pápi Jóanes  – skipar. Jóanes og synirnir hava eisini
skipað tað onkuntíð í Sjónleikarhúsinum.

Borghild er
uppvaksin í Oyrargarði í Dali, men eigur saman við manninum húsini “ á Brænum”,
ið eru elstu hús í Dali. Hagar blivu vit boðin inn til “Upp á stovugólv” at
hoyra um kvæðið “ Stríðið í Tyrnisdal “ ella “Angankár”, sum tað eisini verður
nevnt. Sjúrður Sigmundarson, sum vit kenna frá Sjúrðarkvæðunum, verður nevndur
í hesum kvæði. Fleiri ørindir kenna vit aftur úr Hjalgrímskvæði. Vit kvóðu ikki
sjálvi inni hjá Borghild, men sluppu ístaðin at hoyra pápa Borghild –
skopuningin Jógvan í Oyrargarði – kvøða sitandi.

Tá
húsagongdin var liðug, fingu vit góða fiskasuppu í Eiriksgarði, og so var
almennur dansur. Stóra takk fyri tit í Dali, sum tóku so væl ímóti hesum, og
stóra takk skulu tit ungu eisini hava. Tað er bara at dríva á – vit eldru skulu
hjálpa, um brúk er fyri tí.

Eg vóni at
“Upp á stovugólv” fer at vera eitt afturvendandi tiltak. Tað eru ikki so nógvar
bygdir, har hetta ber til á sama hátt sum í Dali, tí hetta krevur eina ikki ov
stóra bygd, har nøkur fólk kunnu og vilja taka ímóti gestum uppá hendan mátan.
Nólsoy, Sumba og Tjørnuvík eru støð, har hetta er møguligt eftir mínum tykki. Kanska
onkur onnur bygd eisini, sum eg ikki komi í tankar um. Livst so spyrst.

Kathrina,
Eysturoyar dansifelag.

Barnadansistevna í Havn  11. februar 2017  –  at
seta við….

Hetta er
fimtu ferð at barnadansistevnan er í høvuðsstaðnum. Tær báðar fyrstu barnadansistevnurnar,
sum Dansifelagið í Havn skipaði fyri, vóru á Háskúlanum í 2004 og 2005.  Í 2011 tók Tøkum Lætt sær av stevnuni, meðan
Rasmus skipaði fyri 10. stevnuni, sum var í Norðurlandahúsinum í 2013.
Dansifelagið í Havn og Tøkum Lætt hjálptu til. Í ár skipaðu Dansifelagið í Havn
og Tøkum Lætt fyri í felag,  og tað
riggaði stak væl. Dansur og drekkamuður vóru í Sjónleikarhúsinum, og vit fingu
døgurða í KFUM. Tað bar væl til, tí tað er stutt at ganga ímillum. Hesaferð
fingu vit sodavatn, sum Føroya Bjór hevði latið til stevnuna. Tað er spennandi
at koma á stevnu hvørja ferð, tí hóast skipaðar eftir sama leisti, so eru
stevnurnar kortini so ymiskar alt eftir umstøðum og møguleikum á staðnum.

Hesaferð
vóru tvær útferðir at velja ímillum – Kringvarpið og Brandstøðin. Vit í
Eysturoyar dansifelag sluppu í Kringvarpið saman við m.a. Leikum Fagurt. Johan
Mortensen, sum í fleiri ár hevur havt sendingina “Dansival” í útvarpinum
hóskvøld í dansitíðini, var bæði blíður og týður. Vit byrjaðu har, sum
sjónvarpsupptøkurnar til “dag og viku”, “3-2” og “Gekk” verða sendar. Gekkahjólið
fekk av at vita frá børnunum. So sluppu vit eisini inn hagar, sum beinleiðis
útvarp verður sent. Johan segði okkum, at uml. 80 fólk arbeiða í kringvarpinum,
sum nú alt er undir einari lon. Tey, sum vóru á brandstøðini, lótu eisini væl
at.

Dansurin gekk
væl. Væl klárað, at uml. 400 fólk kunnu dansa við sama stevi so leingi. Vit
kvóðu eftir raðfylgju, sum var gjørd frammanundan. Haldi kortini, at børnini
skuldu sloppið at skipa meir sjálvi. Sumbiar dansifelag kvað  “Kellingin við grúgvustein” , sum var
forkunnugt at hoyra við niðurlagnum “ der går en dans for Dúnoy , forgloym ikki
meg”. Tað plagdi mamma onkuntíð at brúka til “Torkils døtur”.

Fyriskipararnir
stóðu nógv av tíðini uppi á pallinum í Sjónleikarhúsinum og hugdu at. Tað sá út
fyri mær, sum yngra fólkið í Dansifelagnum í Havn hevur tikið við nú. Gunnar og
Birgir vóru í sving, meðan Niels stóð so fattur og hugdi at. Tað skal vera
honum væl unt. Hann hevur tænt føroyska dansinum væl – sera væl.

Kunning um
Barnlek var eisini á stevnuni – sjónvarp frá øðrum barnleksstevnum var at
síggja og ørk blivu býtt út. Barnlek er norðurlendsk barnadansistevna, sum
verður hildin 3. hvørt ár upp á skift í Norðanlondum. Í 2014 var hon í
Reykjavík.

Ætlanin er,
at Leikum Fagurt og Stígum Fast skulu skipa fyri barnastevnuni 2018 í
Sandoynni.

Vit takka Dansifelagnum
í Havn og Tøkum Lætt hjartaliga fyri ómakin.

Kathrina,
Eysturoyar dansifelag.

Leygardagin 11. februar 2017, kl. 10:00-15:00 skipa Tøkum lætt og Dansifelagið í Havn vegna Sláið ring fyri barnadansistevnuni 2017 í Sjónleikarhúsinum í Havn.

Stevnan verður sett kl. 10:00 í Sjónleikarhúsinum – og endar kl. 15:00. Sum vanligt verða útferðir og døgurði verður at fáa í hølunum hjá KFUM. Heitt verður á luttakarar, ið koma við bili, um at royna at parkera inni í skúlagarðinum hjá Sankta Frans skúla (Nonnuskúlanum). Skúlagarðurin liggur ovast í Niels Finsens gøtu/Villumsgøtu.

Skráin fyri stevnuna er lýst niðanfyri.

Vegna fyriskipararnar

Gunnar Restorff (tlf. 292563)

Bólkar

Bólkur A : (106 fólk)

Klaksvíkar Dansifelag
Sumbiar Dansifelag
Tøkum Lætt

Bólkur B: (125 fólk)

Tvøroyrar Dansifelag (- útferð)
Vága Dansifelag
Frískúlin í Havn

Bólkur C: (115 fólk)

Jómsvíkingar
Norðstreymoyar Dansifelag
Dansifelagið í Havn

Bólkur D: (99 fólk)

Eysturoyar Dansifelag við kvøðarar úr Gøtu
Dansifelagið á Látrinum
Leikum Fagurt
Skúlin á Argjahamri

Skrá

Kvæðaskrá

Setan
og felagsdansur 1 Kl. 10:00-10:45

øll luttaka

Tøkum
lætt (A) Tá er verði stórur

Eysturoyar
Dansifelag + Gøta (D) Eg møtti ein ríkmann

Jómsvíkingar
(C) Brestis kvæði (17 ø)

Norðstreymoyar
dansifelag (C) Burtur á heiði og Veturin kom

Dansifelagið
í Havn (C) Flóvin Bænadiktsson

Dansur
1 Kl. 10:45-10:15

Bólkur B, C, D luttekur

Eysturoyar
Dansifelag (D) Í Gøtu ein dag

Vága
dansifelag (B) Leivs kvæði (24 ø)

Eysturoyar
dansifelag + Gøta (D) Kongaríkið í Bábylon

Vága
dansikvøld (B) Per Jákup Mikael

Leikum fagurt (D) Nú liggur ein kavafonn tindi á

Dansur
2 Kl. 11:15-11:45

Bólkur C, D luttaka –
bólkur D fer at eta kl. 11:30

Eysturoyar
Dansifelag + Gøta
(D) Sigmunds kvæði, yngra
(33 ø.)

Norðstreymoyar
dansifelag (C) Mús uppá korn

Jómsvíkingar
(C) Ormurin
langi (25 ø)

Dansifelagið
í Havn (C) Øskudólgur
og sópingarkona

Eingin
dansur Kl. 11:45-12:30

Øll
eru burturstødd – eta ella útferðir

Dansur
3 Kl. 12:30-13:00

Bólkur
A luttekur

Klaksvíkar
dansifelag (A) Í Gøtu ein dag

Sumbiar
dansifelag (A) Bjerget ligger langt ud i skoven

Klaksvíkar
dansifelag (A) Nú liggur ein kavafonn tindi á

Tøkum
lætt (A) Barnagarðurin

Dansur
4 Kl. 13:00-13:30

Bólkur
A, B luttaka

Tvøroyrar
dansifelag (B) Sigmunds kvæði, yngra (35 ø)

Vága
dansifelag (B) Einar suðuroying

Sumbiar
dansifelag (A) Kellingin við grúgvustein

Klaksvíkar
dansifelag (A) Stolt Signhild

Steðgur Kl.
13:30-14:00

Kakur
og drekka verður at fáa í Sjónleikarhúsinum

Felagsdansur
2 og endi Kl. 14:00-15:00

Frískúlin
í Havn (B) Ólavur riddararós

Eysturoyar
dansifelag (D) Mallebro

Tøkum
lætt (A) Risin og kellingin

Dansifelagið
í Havn (C) Ormurin langi

 Upp á stovugólv

1. Fólk koma til Dals, har tey verða býtt upp í tríggjar bólkar.
2. Hesir
   bólkarnir fara so í hvør sítt hús, har ið ein vertur er í hvørjum húsi.
   Vertinir greiða so frá onkrum kvæði, sum tey hava valt og síðani verður
   tað (ella bara eitt brot av tí) kvoðið
   í húsunum. Síðani ‘rotera’ bólkarnir, og tað verður uml. 1 tími í
   hvørjum húsi.
3. Almennur dansur verður aftaná húsavitjanirnar

Vertir: 

Skráð:

Prísur: 

Gisting:

Landsdansistevnan
fyri børn 2017



Dansifelag tykkara verður við hesum boðið at koma við á landsdansistevnuna fyri
børn, ið verður hildin í Sjónleikarhúsinum í Havn leygardagin 11. februar 2017.
Byrjað verður kl. 10 og vit enda uml. kl. 15.

Stevnan verður skipað eftir tí vælkenda leistinum:
Felagsdansur, útferðir og dansur, døgurði, dansur og útferðir og vit enda við
felagsdansi. Kaffi, køkur og saft kemur at standa frammi.

Tilmeldingarfreistin er í seinasta lagi 28. januar 2017.

Feløgini melda til við at senda tal av børnum og tal av vaksnum til Gunnar
Restorff á gunnarr@setur.fo. Sigið eisini
frá hvat tit ætla at kvøða (eini 2-3 ynski).

Sjálv stevnan er ókeypis og Sláið Ring endurrindar helvtina av ferðakostnaðinum
ímóti kvittan. Gistingin hjá suðuroyingum verður goldin sum vanligt.

Fyri at halda útreiðslunum niðri, er tað okkara ynski, at
ferðingin til og frá við bussum, verður samskipað mest møguligt. Vit fara tí at
heita á feløgini um at tosa saman og annars venda sær til Andreas Sigustein
(tlf. 214242), tá tey skulu brúka bussar, hann kemur at samskipa busskoyringina.

Um tit hava spurningar, so kunnu tit venda tykkum til Gunnar,
Birgir ella Andreas

Gunnar Restorff
tlf. 292563
email: gunnarr@setur.fo

Birgir Djurhuus
tlf. 222000

Andreas Sigurstein
tlf. 214242