Category: Tíðindi

Barnadansistevnan hjá Sláið Ring og
Eysturoyar dansifelag  7.februar 2015  –  at
seta við……

Í
februar 2014 samtykti nevndin í Eysturoyar dansifelag, at vit saman við Sláið
Ring skuldu skipa fyri barnadansistevnuni 2015. So var at finna eitt hús, sum
hóskaði til endamálið. Av tí at vit høvdu dansistevnu fyri vaksin í Runavík
2013, so var upplagt at fara í onkra aðra bygd í oynni við barnastevnuni. Talið
av luttakarum hevur verið uml. 450 í nógv ár, so stórt hús mátti fáast.
Bygdarhúsið í Leirvík er eftir mínum tykki besta hús í landinum av sínum slag,
og tíbetur var tað tøkt hendan dagin, sum vit ynsktu at fáa húsið. 

Fleiri
tey fyrstu árini var barnadansistevnan í apríl, men so bleiv hon flutt, tí
ynski var um at hava hana í dansitíðini. Tíbetur  var veðrið gott tann 7. februar, men
veðurlagið hevur verið so stak vánaligt tað, sum farið er av hesum árinum, at
vit líka so væl kundu havt verið noydd at avlýsa stevnuna fyri veður. Tí mugu
vit hugsa um, um vit aftur skulu hava hana aftaná føstu.

Umleið
500 fólk vóru komin saman í bygdarhúsinum í Leirvík hendan dagin, og tað er tað
mesta, sum nakrantíð hevur verið í húsinum av fólki. Vit plaga at halda veitslu
í bygdarhúsinum 5.hvørt ár – seinast í novembur, tá Eysturoyar dansifelag fylti
45 ár – og eg haldi, fasta starvsfólkið í húsinum við Rasmusi Hansen á odda kom
serstakliga væl frá uppgávuni tann 7. februar, hóast hetta ikki líkist tí, sum
tey vanliga gera. Sum Rasmus alla tíðina hevur sagt um barnastevnuna: ”Hetta
verður spennandi og annaleiðis hjá okkum”. Ongantíð er so nógv kaffi kókað í
húsinum ein dag, og so trongt hevur tað ongantíð verið í lítla sali, har vit
dansaðu.  Í Leirvík síggja tey ikki
sólina í tríggjar mánaðir – frá 8.novembur til 2.februar, tá hon sæst aftur
har, sum útgrevsturin er á Toftanesi – og tí hava tey á hvørjum ári sólarkaffi
í bygdarhúsinum. Í ár skuldi hetta vera dagin eftir barnadansistevnuna tann 8.
Februar.

Yngsti
luttakari á stevnuni, var ein genta fødd um jóltíðir 2014 og elsti mundi vera
uml. 80 ár – “so gongur tann gleðistreymur í ring frá barni til abban gamla”,
sum I.P.Gregoriussen yrkir í brúðarvísuni. Ein fittur myrkhærdur smádrongur um
skúlaaldur var í føroyskum klæðum – penum reyðum vesti og mynstrutari
knappatroyggju.

Rasmus
Joensen setti stevnuna og so byrjaði dansurin uml. kl. 10.15. Fyrsta kvæðið var
Sigmundskvæðið Yngra, sum Karstin í Húsinum skipaði. Dansurin gekk væl, hóast
tað mundu vera 400-450 fólk uppií fyrstu løtuna og tá dansiskráin var liðug
uml. kl. 11.00  helt dansurin fram uttan
at støðgur kom í. Tøkum Lætt hevði valt sær nýggja kvæðið hjá Bergljót av
Skarði  “Risin og kellingin” – hóast
týðiliga yrkt til børn, so er tað eitt ordiligt kvæðið við góðum lag.  Kl. 11.30. fóru fyrstu bólkarnir útferð –
uml. helvtin av fólkinum – meðan hini ótu døgurða. Uml. kl. 13.00 skiftu
bólkarnir um.Fólk vóru væl nøgd við útferðirnar. Ein genta úr Klaksvík – tey vóru
útferð í Gøtu – hevði lurtað væl eftir tí, sum hon hevði hoyrt.  Tá hon var afturkomin og hevði fingið døgurða
, spurdi hon ommu sína um seyðabeinini, sum Árant hevði fortalt um, og hvussu
gomul tey mundu vera.

Stevnan
hevur fingið gott skoðsmál frá øllum, sum vit hava tosað við, og tað gleðast
vit um. Vit vilja fegin takka øllum tykkum, sum so hugagóð fóru til verka saman
við Eysturoyar dansifelag  fyri at fáa
hesa stevnuna at bera til  – Eysturkommunu
fyri fíggjarligan stuðul, Áranti á fornminnissavninum í Gøtu, Kristian Martini
á bátasavninum í Leirvík, Fríðfinni, tit øll í bygdarhúsinum í Leirvík fyri
eitt megnararbeiði, skúlanum  á Toftum
fyri plakatirnar, sum vit sluppu at prenta hjá tykkum og stóra takk fyri tær
uml. 50 køkurnar, sum komu úr øllum heraðshornum. Og stóra takk tit, sum komu á
stevnu úr øllum landinum.

Kathrina,
formaður í Eysturoyar dansifelag

1. mars høvdu vit aðalfund í Vága Dansifelag.

Tveir nevndarlimir stóðu fyri vali: Dánial Jákup Jørgensen, formaður, og Paula Vilhelmsen, næstformaður. Anna Elisa Jacobsen, kassameistari, stóð ikki fyri vali i ár. Paula ynskti at sleppa úr nevndini, og í hennara stað varð Lív Vilhelmsen vald. Elspa Suffía Joensen og Hans Pauli í Horni vórðu vald til varalimir.

Barnadansistevnan 2015 verður hildin í Lorvík leygardagin tann 7.februar 2015 frá kl. 10 – uml. kl. 15. 

Vit halda til í bygdarhúsinum í Lorvík og vitja bátasavnið og víkingaútgrevsturin á Toftanesi. Í ár er tað Eysturoyar Dansfelag, sum vegna Sláið Ring skipar fyri barnadansistevnuni.

Tey, sum luttaka, verða  skipað í bólkar, sum dansa, eta og fara túr eftir tørni.

Tilmeldingarfreistin er í seinasta lagi mikudagin 28.januar 2015. 

Tá tit melda til, verða tit biðin um at siga frá, hvussu mong koma frá tykkum – bæði børn og vaksin.  Sig okkum eisini, hvat tit ætla at skipa. Tað er tó eingin treyt at øll skulu skipa. Eysturoyar Dansifelag fer at at kvøða fyrstu 13 ørindini av Lorvíkspáll.

Nærri kunning kemur á heimasíðuna hjá Sláið Ring og Eysturoyar Dansifelag www.eystdans.dk .

Vit ætla at kvøða fyrstu 13 ørindini av Lorvíkspáll.

Er okkurt at spyrja um, kunnu tit Seta tykkum í samband við Kathrinu ella Jens.

Verið vælkomin á barnadansistevnu.

Blíðar heilsur frá  Eysturoyar Dansifelag

Kathrina Hansen, formaður. Tlf. 422167/265076  teldupostur: kath_han@hotmail.com 

Jens Dalsgaard, skrivari

Tlf. 577765   teldupostur: j.dalsg@gmail.com 

Aftur í ár skipar Tøkum Lætt fyri tí vælumtókta 13. kvølds dansi, sum í ár verður leygarkvøldið tann 10. januar. Sum vant dansa vit í Sjónleikarahúsinum, byrjað verður kl. 22. Smurt breyð, kaffi og te og smákøkur verða at fáa um 1 tíðina. Tað vísir seg, at hesin dansurin er blivin ein traditión hjá nógvum. Fleiri meina, at hann minnir nógv um tann góða gamla navigatiónsdansin:)

Haraldssund er
gomul Kyndilsmessubygd. Í ár verður Kyndilsmessudansurin fríggjadag tann 30. Januar.
Byrjað verður kl 22:00. Kostnaðurin fyri dansin er  100 kr, og tá er matur í roknaður.

Vit vita ikki
nær tað var byrja at dansa í Haraldssundi á Kyndulsmessu, men helst er hesin
siður gamal, tí Haraldssund er gomul bygd. Fólk eru komin ár 1584 til bygdar.
Tá tá sat ein maður við festinum, sum æt Laurits Joensen. Bygdin vaks spakuliga
fram til 1920.  Í 1921 kom ferð á
fólkavøksturin. Tá kom tað fyrsta húsi í nýggja býlinginum suður á Bakka. Í
1935 var fólkatalið komi uppá 61 fólk. Øll hesu fólk vóru ættað av Skarði,
Kunoy, og Klaksvík. Kyndilsmessa verður hesa tíðina hildin við nógvum fólki.

Bygdarfólkið
gleddi seg til Kyndilsmessu og gjørdu klárt at taka móti gestunum, sum komu úr
teimum nærmastu bygdum, slekt, vinir og kenningar.  Fólk kom við rórabátum, og til gongu, og væl
vóru tey mótikin. Har var etið, prátað og spurt um tíðindir. Dansað bleiv á
einum neystalofti, sum bøndurnir áttu. 
Ikki var ókent, at skiparar áttu sítt kvæði, sum teir tók hetta kvøldið.
Tað bleiv dansað út a náttina.

Eitt ári, tá ið
Kyndilsmessudansur var, bleiv so mikið ringt veður, at fólki slapp ikki avstað
aftur. Tey lógu veðurføst og máttu sova í bygdini. Gestirnir lógu, har tað bar
til at liggja, runt um í øllum húsinum. Tey, sum komu fyrst upp, máttu ansa
eftir hvar tey stigu, fyri ikki at traðka á nakran.

Men tíðin
broyttist, og dansurin var niðurlagdur á Kyndilsmessu, men í nýggjari tíð er
kyndilsmessudansurin tikin uppaftur í Haraldssundi. Dansurin í ár er tann
níggindi í røðini. Tað er at takka dansifeløgunum fyri, at tey koma hagar at
dansa. Vónandi síggja vit nógv fólk aftur í ár. Bæði ungdómar og tey eldru. Vit
vóna, at tey koma at seta dám á kvøldið við góðum føroyskum dansi.

Hjartaliga væl
komin á Kyndulsmessu tann 30 januar 2015 í Bygdarhúsinum í Haraldssundi.

Dansifelagið Stígum Fast skipar fyri almennum føroyskum dansi nýggjársdag 2015.

Dansurin verður tíðliga um kvøldi,
soleiðis at fólk av øðrum oyggjum kunnu koma til Dals at dansa og sleppa
heimaftur.

Dansurin byrjar kl. 18.30. Teistin
fer av Gomlurætt kl. 17.15 og úr Skopun kl. 22.30. Til hesar túrar koyrir
bussur ókeypis í samband við tiltakið.

Kostnaðurin fyri dansin er  100
kr. Tá er bussur, suppa, kaffi/ te og smákøkur írokað prísin.

Tað hevur verið fastur siður at hava
nýggjársdans í Dali. Í 2010 var fyrstu ferð at Stígum Fast skipaði dansin fyrr
um kvøldi. Hetta vísti seg at bera væl til, og fleiri fólk, eisini av øðrum
oyggjum komu í dansin. Eitt nú kann nevnast at dansifelagið Tøkum Lætt úr Havn
hevur verið vælmannað í Dali seinastu nýggjársdansirnar.

Stígum Fast
hevur síðani brúkt hendan leistin í sambandi við nýggjársdansin, og vil felagið
bjóða øllum hjartaliga vælkomnum í almennan dans í Eiriksgarði tann 1 jan. 2015
frá kl. 18.30.

Stígum Fast