Filmsýning og føroyskur dansur í skúlanum í Leirvík
Mikukvøldið 7. juni 2023 kl. 19:00 verður tiltak viðvíkjandi føroyskum dansi í skúlanum í Leirvík. Á skránni verður forkunnug frumsýning av sending um føroyskan dans og føroysk dansispøl í Eysturoynni, ein drekkamunnur og eisini føroyskur dansur.
Í 1977 var Egil Bakka, professari í fólkadansi, í Føroyum og gjørdi forkunnugar filmsupptøkur av føroyskum dansi og føroyskum dansispølum. Saman við Mortani Nolsøe, Eyðun Andreassen, Herluf Berthelsen, Paula Nielsen og Árna Hansen, ferðaðist hann kring landið og vitjaði í Havn, heima á Sandi, í Klaksvík, í Sumba, við Gøtugjógv, á Velbastað og í Nólsoy og gjørdi upptøkur. Sláið Ring hevur fingið talgildað hesar upptøkur og er í gongd við at gera átta sendingar burtur úr hesum, har tosað verður við ymisk fólk um upptøkurnar og dansin tá, og har vit sjálvandi sleppa at síggja upptøkurnar.
Fyrstu fimm sendingarnar vóru frumsýndar í lokaløkinum, har tær vóru tiknar upp, og tær eru seinni eisini vístar í Kringvarpinum.
Í sætta parti síggja vit filmsupptøkur við Eysturoyar dansifelagi frá Gøtugjógv – talan er um sjey filmsbrot við dansispølum – og vit hoyra forkunnugar frágreiðingar frá Sofus Foldbo og Andreu Opielka. Við á upptøkunum frá Gøtugjógv í 1977 eru m.a. Tórgerð og Josva Rasmussen, Anna Rasmussen og Sjúrður Dahl, Edda Joensen og Herluf Berthelsen, Sanna í Bartalsstovu og Johan Simonsen, Ragnhild Simonsen og Hans í Køkinum, Elspa Garðshorn og Johannus Jacobsen, Jonetta og Reynhold Rasmussen, Petra og Sjúrður Hentze, Eyðna Poulsen og Poul Georg Poulsen, Katrin og Sofus Foldbo, Sofía og Tórir Thomsen, Jóna á Horni og Kaj Høgnesen, Karin Joensen og Kjartan Ranghamar, Anna Katrin og Sámal Hansen, og Ólfríð og Tórbjørn Niclassen.
Aftaná frumsýningina av hesi sending, ið er á leið trý korter til longdar, verður ein steðgur við drekkamunni og aftaná verður høvi at fara upp á gólv.
Tiltakið er ókeypis, og øll eru hjartaliga vælkomin!
De dansede ud, og de dansede ind alt i den elverfærd, da sad favren ungersvend og støtted sig på sit sværd. – Siden jeg hende først så.
Soleiðis kvøða vit í donsku vísuni »Elverhøj«, um hvussu sveinurin gerst so rúnabundin av álvagentunum, ið dansa út og inn úr álvaheygginum, at var hann ikki vaktur av hananum, so hevði hann ongantíð komið aftur í hendan heim.
Her í Havn hava vit eisini okkara egna, heilt serliga álvaheygg, ið eisini hevur rúnarbundið manga sál á slíkan hátt, at tíð og stað eru púra burturgloymd, og hugurin hevur fingið frælsi at sveima víða: Norðurlandahúsið, sum í hesum døgum hátíðarheldur 40 ára dag sín!
Longu frá fyrsta degi var føroyski dansurin – ið ónoktandi er ein hornasteinur í upprunamentan okkara – hugsað inn í húsið, og er tað ikki av tilvild, at »Dansistovan« er í hjartanum á húsinum.
Fyrsta veturin byrjaði almenna tiltakið »Barnadansurin í Norðurlandahúsinum«, og fyllir hetta tiltak soleiðis eisini 40 ár í ár – barnadansurin, ið er hvørt fríggjakvøld í dansitíðini kl. 20-21. Hetta hevur verið borið av skiftandi eldsálum, og hóast tiltakið í dag er skipað í samstarvi við Dansifelagið í Havn, so er hetta »Barnadansurin í Norðurlandahúsinum« – eitt alment, ókeypis tiltak hjá Norðurlandahúsinum, har øll dansihugað eru vælkomin, ung sum gomul óansæð um tey hava tilknýti til eitthvørt dansifelag ella ikki. Mong eru tey, sum í barnadansinum hava lært stev og fingið lagt eina góða grund fyri dansin og sum hava dýrabar minni um føroyskan dans við systkjum, foreldrum, ommum, abbum og øðrum frá barnadansinum í Norðurlandahúsinum.
Vit í Sláið Ring hava havt nógv gott og fjølbroytt samstarv við Norðurlandahúsið hesi 40 árini, so ikki ber til at nevna alt her, men vit fara at tríva í okkurt úr rúgvuni. Afturvendandi tiltak var nógv ár »Dansináttin í Norðurlandahúsinum«, sum tó fyri nøkrum árum síðani mátti lúta í kappingini við festivalarnar og øll tey mongu tiltøkini, ið nú eru um summarið. Í staðin fyri at avtaka tiltakið varð tað tillagað til eitt kvæðatiltak við forkunnugum fyrilestrum, dansi, filmsýningum o.ø. um heystið, og hetta tykist hava áhuga millum fólk. Nógv onnur tiltøk hava verið millum ár og dag: barnadansistevna, landsdansistevna, kvæðaráðstevna, norðurlendsku dansistevnurnar HAVLEIKUR 2008 og HAVLEIKUR 2022 fyri bert at nevna nøkur úr rúgvuni.
Musée canadien de l’histoire í Gatineau (fyrr: Musée de la civilisation)
Í lestrarørindum í Kanada vitjaði eg kenda savnsskálan »Musée de la civilisation« í Gatineau, ið er býur á áarbakkanum yvir av høvuðsstaðnum Ottawa. Hesin vakri skálin hevur bert rundar kurvar, og arkitekturin Douglas Cardinal skal hava sagt, at hetta varð gjørt, so eingin skuldi kunna seta søguna og mentanina hjá upprunafólkinum í ein krók: tí har er eingin krókur. Hetta skal hann hava sagt, tí hann ferð eftir ferð hevði sæð, at tann sokallaða hámentanin ofta við tíðini trokaði upprunamentanina burtur, tí hon var ikki fín nokk.
Føroyski dansurin við kvæðunum, vísunum og tættunum, er partur av grundbulinum í føroyska mentanarliga samleikanum, og hevur hann givið ringvirkningar á bæði ein og annan hátt út í allar lista- og mentanargreinar okkara. Men føroyski dansurin er viðbrekin. Tað er bert í Føroyum í øllum heiminum at hann enn er livandi. Tá Norðurlandahúsið lat upp í 1983 varð mett, at eini 2500 føroyingar møttust regluliga fyri at fara upp á gólv. Hendan metingin í dag liggur nærri 500, og er í støðugari minking. Kortini mega vit við takksemi minnast til, at uttan megnar arbeiði, sum dansifeløg, eldsálir og mentanarstovnar sum t.d. Norðurlandahúsið hava gjørt fyri dansin, so hevði hann ikki verið til í tí líkinum, sum vit kenna hann í dag.
Tí er tað okkara bøn og vón, at Norðurlandahúsið eisini tey komandi 40 árini fer at duga líka væl at hava eina góða javnvág millum tær alskyns lista- og mentanargreinar, sum verða hýstar í húsinum, so tað bæði verður pláss fyri føroyska dansinum og øllum hinum, og at dansurin aldrin verður settur í ein krók.
Hjartaliga til lukku við 40-ára degnum, takk fyri gott samstarv og við vón um eitt framhaldandi gott samstarv!
Leygardagin 22. apríl 2023 skipar Eysturoyar dansifelag vegna Sláið Ring fyri barnadansistevnuni 2023 í Runavík
Skráin er henda:
10:00: Stevnan verður sett í Løkshøll og felags kunning 10:15: Felags dansur 10:45–12:00: Útferðir og dansur, sí dansiskránna 12:00–13:00: Døgurðasteðgur 13:00–14:15: Útferðir og dansur, sí dansiskránna 14:15: Felags dansur 14:45: Takk og farvæl
Tvær útferðir eru á skránni. Onnur er inn til Lamba at hoyra um Norsku løvu, Magnus Rasmussen sigur frá. Hin útferðin er út til kanónina á Nesi, har Alfred Olsen fer at siga frá um kanónina og ymist í samband við 2. veraldarbardaga.
Øll fara aðra útferðina. Fyrireikararnir skipa fyri, hvør fer hvar.
Døgurðin er í Skótahúsinum og í kantinuni í skúlanum við Løkin. Nærri kunning um hvør etur hvar kemur, tá ið vit vita endaliga talið av luttakarum. Ein drekkamuður og okkurt afturvið fæst allan dagin í kantinuni í skúlanum við Løkin.
Bussarnir fara frá skúlanum við Løkin kl. 15:00, er onnur avtala ikki gjørd frammanundan.
*Minnist til at boða undirritaðu frá endaliga tali av luttakarum og teimum, sum skulu vit bussi til og úr Runavík í seinasta lagið mikudagin klokkan 20.
Føstulávintsvikuskifti vitjaði Klaksvíkar Dansifelag á Viðareiði.
Hetta er triðja árið á rað, at Klaksvíkar Dansifelag hevur gjørt hesa útferð, og eydnaðist túrurin stak væl. Veðrið var av tí fagrasta. Kalt, men stilt og turt. Dansifelagið hevði bílagt Hotel Norð, og áttu vit hotellið fyri okkum sjálvi. Vit vóru gott 30 luttakarar.
Vit møttust á Hotellinum kl. 15:00 leygardagin. Avgreiddu formligu viðurskiftini og fingu okkum ein kaffimunn, áðrenn vit fóru ein gongutúr í bygdini. Vit høvdu eina avtalu við Róa Absalonsen, bónda, um at vitja hansara fjós kl. 16:00. Rói tók væl ímóti og greiddi meistarliga frá virkseminum í einum stórum nýmótans fjósi við yvir 100 mjólkineytum. Áðrenn vit fóru av fjósinum, fóru vit upp á gólv og kvóðu veðratáttin.
Heimaftur komin á hotellið fóru vit at sláa tunnu. Tunnan var so passaliga styrkt, og tá klokkan var 19:00 slóð Karl Høgnesen køttin niður og gjørdist kattakongur 2023.
Síðani varð farið til borðs. Hotellkokkurin borðreiddi við góðum trírættaðum døgurða. Sangur, hugni, talur og spæl var undir borðhaldinum, sum var avbera gott.
Klokkan 22:00 fóru vit uppá gólv. Á Viðareiði hava uml. 10 ungfólk javnan dansað í vetur. Serliga hava tey lagt seg eftir at dansa dansispøl. Tey komu at dansa saman við okkum fram til kl. 0:30. Vit dansaðu dansispøl og kvóðu vísur og kvæði av tí lættara endanum. Vit endaðu við at telja jólini. Vit kvóðu Santa Simeon og mær gav Santa Mortan. Náttin helt á við dansi, sangi, práti og tónleiki.
Sunnudagin stóð morgunmatur fyri okkum kl. 9:00.
Tá morgunmaturin var etin, fóru flestu okkara í kirkju á Viðareiði, har Hanus á Gørðum prædikaði. Klokkan nærkaðist 14:00, tá vit settu leiðina aftur móti Klaksvíkini eftir ein frálíkan túr. Slíkir túrar hava nógv at siga fyri samanhaldið í einum dansifelagi.
Jónleif Johannesen, form.
Sita væl til borðsDansa dansispølVitja í fjósinumSo er tunnan sligin niður – Karl bleiv kattakongur
Ein frásøgn frá høvuðsfyriskiparunum av kvæðastevnuni, lærararnir Elin Maria Olsen og Einar Martin Hjalt Jacobsen:
Kvæðastevna fyri næmingar í miðdeild fólkaskúlans
Føroyski dansurin er partur av okkara dýrabara mentanararvi, ið flestu okkara eru errin av. Tí var skipað fyri kvæðastevnu fyri næmingar í miðdeild fólkaskúlans í Norðurlandahúsinum. Endamálið var at stuðla uppundir kvæðaundirvísingina í fólkaskúlanum, umframt at geva næmingunum góðar og jaligar kvæðaupplivingar, ið kunnu kveikja hug teirra til føroyskan dans og harvið at bera livandi mentan okkara víðari.
Sjálvandi dansaðu vit føroyskan dans, men dentur var eisini lagdur á spennandi søgurnar handan kvæðini, har vit høvdu serkøn fólk inni at siga frá Ólavi Riddararós og Sinklars vísu. Hetta var undirbygt við borðspælinum Kvæða-quiz, har næmingarnir skuldu svara spurningum úr kvæðunum fyri at vinna.
Næmingarnir høvdu somuleiðis møguleika at royna seg í dansispølunum, bandadansi og edilingi, har Ung í dansi stóðu fyri undirvísingini. Hesi dugnaligu ungu hava framført nógv dansispøl, ikki bert í Føroyum, men eisini uttanlands, og vóru tey til uppgávuna fús – ein sonn fragd at síggja hesi dugnaligu ungu bera læruna víðari til børnini, sum dansaðu við stórum áhuga.
Næmingarnir hava vant kvæði til dansistevnuna – og tey sýndu góðar dygdir, tá tey upptraðkaðu fyri royndum dómarum í KvæðaTALENT, har vinningurin var bowling fyri flokkin. Tey blivu millum annað dømd eftir dansilag og kvæðaevni. Næmingarnir í 6. flokki í Vágs skúla vístu seg frá síni bestu síðu, og fóru avstað við vinninginum.
Eisini var roynt at flyta aldargomlu mentan okkara yvir á pallar, har tey ungu ferðast, við at spæla kvæða-kahoot. Har vóru tað næmingar úr 6. d úr Skúlanum á Fløtum, sum vóru stinnast og vunnu karamellur til allan flokkin.
Endað var við einum braki, tá Hamradun framførdu fleiri av sínum vælkendu kvæðaløgum. Hetta var sera væl móttikið av næmingunum – og tað vóru enntá nakrir, ið fóru upp á gólv undir framførsluni.
Alt í alt ein sera væleydnaður dagur, har næmingar og lærarar hugnaðu og stuttleikaðu sær.
Vit takka fyri góða hjálp frá dansifeløgunum og stuðul frá Mentanargrunni Landsins, Norðurlandahúsinum, Tórshavnar Kommunu, SMS, Bakkafrost, BankNordik, Sláið Ring, MBM, Bowlinghøllini á Hálsi og NÁMi. Uttan hesi var eingin stevna møgulig.
Nú er tíð til at tilmelda seg til Barnlek, sum verður í Lerum beint uttanfyri Gøteborg í Svøríki 12.-15. juli 2023.
Sláið Ring rindar stevnugjald fyri allar luttakarar og buss úr Kastrup týsdagin 11. juli og aftur til Kastrup sunnudagin 16. juli, um man ynskir at koma við tí bussinum.
Tey sum hava melda seg til túrin sum Sláið Ring skipar fyri við Atlansflog, skulu ikki melda til av nýggjum.
Bussurin sum Sláði Ring hevur leiga fer úr Kastrup umleið kl. 13 tann 11. juli og verður aftur í Kastrup umleið kl. 14 sunnudagin 16. juli.
Áðrenn tit tekna tykkum er skilagott at vitja heimasíðuna www.barnlek2023.se
Á heimasíðuni eru nógvir upplýsningar um stevnuna.
Undir program síggja tit ma. 2 útferðir, sum man kann tekna seg til (ella lata vera):
Útferð 1 Bland tomtar og troll, kostar 75 SEK. Hon verður mikudagin fyrrapart.
Útferð 2 Nilssons el och teknik museum, kostar 50 SEK .
Seinasta freist at tekna seg er leygardagin 25. februar 2023.
Tit tekna tykkum við at senda meyl til jhe@skulin.fo
Í meylinum SKULU hesir upplýsingar verða:
Fult navn
Adressa
Føðingardagur
Meyladressa
Tlfnr.
Stødd av T-shirt (er við í prísinum)
Um tú skalt á útferð 1
Um tú skalt á útferð 2
Tørv á serligum mati
Um tit hava onkra allergi
Um tit skulu við bussinum
Um tit koma sjálvi til Lerum, so mugu tit siga hvønn dag tit koma og fara avstað aftur
Vit fáa luftmadrassu, dýnu og kodda, men mugu hava seingjarklæðir við sjálvi.
Í vár fara vit at møtast fyri at venja samdansir og tað sum vit fara at vísa fram í Lerum
Hava tit spurningar eru tit vælkomin at skriva til jhe@skulin.fo ella ringja til 236312
Árliga barnadansistevnan verður í Runavík leygardagin 22. apríl 2023. Eysturoyar dansifelag skipar fyri stevnuni, sum verður í skúlanum við Løkin. Stevnan byrjar kl. 10:00 og endar kl. 15:00.
Luttakarar melda til í lokalu feløgunum (sí niðast). Feløgini melda síðani samlað til hjá Eysturoyar dansifelag í seinasta lagi 1. apríl 2023 við at senda mail til palin.olsen@skulin.fo
Upplýsið hetta:
Felag
Tal av børnum
Tal av vaksnum
Hvat tit vilja skipa – trý uppskot
Um tit hava tørv á flutningi til og úr Runavík og tal.
Navnið á einum kontaktpersóni til dagin.
Stevnan er ókeypis. Sláið Ring samskipar busskoyringina til og úr Runavík. Ferðing sjóvegis og møgulig ferðing við bygdaleiðum í Suðuroy og í Sandoy verður eisini goldin av Sláið Ring.
Suðringar hava møguleika at fáa innivist í KFUM í Havn fríggjakvøldið 21. apríl.
Filmssýning og føroyskur dansur í Skálanum í Klaksvík
Sunnudagin 30. oktober 2022 kl. 20:00 verður dansitiltak í Skálanum í Klaksvík. Á skránni verður forkunnug frumsýning av sending um føroyskan dans og føroysk dansispøl í Klaksvík og eisini føroyskur dansur.
Í 1977 var Egil Bakka, professari í fólkadansi, í Føroyum og gjørdi forkunnugar filmsupptøkur av føroyskum dansi og føroyskum dansispølum. Saman við Mortani Nolsøe, Eyðun Andreassen, Herluf Berthelsen, Paula Nielsen og Árna Hansen, ferðaðist hann kring landið og vitjaði í Havn, heima á Sandi, í Klaksvík, í Sumba, við Gøtugjógv, á Velbastað og í Nólsoy og gjørdi upptøkur. Sláið Ring hevur fingið talgildað hesar upptøkur og er í gongd við at gera átta sendingar burtur úr hesum, har tosað verður við ymisk fólk um upptøkurnar og dansin tá, og har vit sjálvandi sleppa at síggja upptøkurnar.
Fyrsta og onnur sendingin vórðu frumsýndar í Norðurlandahúsinum og triðja sending í Virkinum á Sandi herfyri.
Í fjórða parti síggja vit filmsupptøkur úr Klaksvík – talan er um seks filmsbrot við dansispølum og føroyskum dansi – og vit hoyra forkunnugar frágreiðingar frá Edith Klettskarð, Heina Mohr og Óla Dahl. Við á upptøkunum úr Klaksvík í 1977 eru m.a. Jens Juul og Hannemia Sólbjørg, Páll og Edith Klettskarð, Sannilenus og Sunneva Johannesen, Óli og Bina Dahl, Hans Dávid og Dorthea Matras, Sámal Petur og Tórhild Sólheyg, Jákup Emil og Dana Olsen, Marius og Saloma Poulsen, Jógvan og Dagmar Rasmussen, Martin og Malena Eliasen, Sørin S. Sørensen, Bina Christiansen, Jóhan (Skard) og Kristina Petersen, Frits og Sunneva Olsen, Jógvan Pætur og Maja Gilstein, , Jóan Pauli (í Svíni), Frida Hansen, Hjalmar og Ásleyg Jacobsen, Sámal og Anna Høgnesen, Jóhan og Sigrid Ziskason, Karl og Selma Høgnesen.
Aftaná frumsýningina av hesi sending, ið er á leið trý korter til longdar, verður ein steðgur við drekkamunni og aftaná verður høvi at fara upp á gólv.
Í døgunum 12.-15. juli 2023 verður Barnlek í Lerum, sum liggur beint uttanfyri Gøteborg í Svøríki. Barnlek er norðurlendsk barna- og ungdómsstevna og er málbólkurin vanliga 8-16 ár, men av tí at stevnan varð avlýst í 2020 loyva vit ungum upp til 20 ár at luttaka.
Sláið Ring hevur í samstarvi við Atlantic skipað fyri einum túri, har vit flúgva aftur og fram og koyra við bussi til Lerum, busstúrurin tekur um 4 tímar. Vit koma til Lerum týsdag, dagin fyri stevnan byrjar, og fara heim aftur sunnudag, dagin eftir stevnan endar.
Ferðaskráin við Atlantic er hendan: Fráferð úr Vágum 11. juli 2023 kl. 8:20 Fráferð úr Kastrup 16. juli 2023 kl. 22:05
Sláið Ring letur ein munagóðan stuðul, soleiðis at kostnaðurin fyri luttakarar á Barnlek 2023 verður 2000 kr. Íroknað er ferðing, gisting og stevnugjald.
Vit hava 80 pláss við Atlantic, so tað er “Først til mølle”.
Onnur sum vilja við, men ætla at ferðast aðrar dagar kunnu bíleggja sær pláss við bussinum frá og til Kastrup.
Luttakarar, sum ferðast á annan hátt, fáa stevnugjaldið og bussin goldnan av Sláið Ring (um tey koma við sama bussi sum hini).
Seinasta freist at tekna seg til stevnuna við flogferð er 1. desembur.
Tekning til stevnu og flogferð fer fram við telduposti til sr@sr.fo og við at gjalda 400 kr. í depositum á konto 9181–437.614.7 í Betri banka. Viðmerkið navn og dansifelag. Depositum fæst ikki aftur, um ferðin verður avlýst av luttakara sjálvum.
Væl av fólki var møtt til aðalfundin hjá Sláið Ring, ið varð hildin 17. september 2022 í Sjóvinnuhúsinum á Vestaru bryggju í Havn. Fleiri mál vóru uppi og vendu og fingu umrøðu – alt frá korona, HAVLEIK 2022, sjónvarpsupptøkur til luttøku á BARNLEK 2023 í Lerum í Svøríki og nógv annað.
Gunnar Restorff, Kathrina Hansen og Hendrik Egholm sótu í nevndini, og Gunnar og Kathrina stóðu fyri vali. Kathrina valdi ikki at stilla uppaftur til nevndarval og Eydna í Homrum úr Norðstreymoyar dansifelagi varð vald inn fyri hana, meðan Gunnar varð afturvaldur. Kathrina hevur við sínum góða ordan og trúfesti verið felagnum ein hollur stuðul sum trúfastur kassameistari síðani hon kom í nevndina í 2010, tá táverandi kassameistari, Birgir Djurhuus segði seg úr nevndini.
Eftir nevndarvalið segði Gunnar nøkur orð og so varð Kathrina heiðrað við gávu, blómum og lógvabrestum. Nevndin í Sláið Ring takkar Kathrinu inniliga fyri hennara virki og eru vit serliga glað um, at Kathrina hevur játtað at hjálpa okkum fyrstu tíðina við at umsita tað fíggjarliga til alt er komið í rættlag.
Nevndin skipaði seg við Gunnari Restorff sum formanni, Hendriki Egholm sum næstformanni og kassameistara og Eydnu í Homrum sum skrivara.
Eisini tóku nevndarlimir og fundarfólkið formannin á bóli, tá tey takkaðu honum fyri hansara leiklut, tá dansistevnan HAVLEIKUR 2022 varð hildin fyrr í ár. Keypt var ein gáva, sum var eitt ur úr føroyskum grótið myndprýtt við búmerkinum hjá HAVLEIKI 2022. Eisini Gunnar varð heiðraður við blíðum orðum og lógvabrestum og takkaði fyri gávuna.
Eftir aðalfundin var kvæðatiltak í Norðurlandahúsinum, har fitt av fólki var møtt at síggja frumsýning av tveimum teimum fyrstu av átta sjónvarpssendingum um føroyskan dans og føroysk dansispøl við útgangsstøði í filmsupptøkum hjá Egil Bakka frá 1977.
