Category: Tíðindi

Har, ið merkini veittra, veittri
eisini mítt ………….

Til Nordlek
á fyrsta sinni.

Havi dansað
føroyskan dans, síðani eg var barn, men ongantíð verið við til Nordlek, so nú
skuldi tað vera.

Eg fari at
taka fram  nakrar stjørnuløtur frá
túrinum, sum vardi 17 dagar og sum bæði var ein søguligur túrur ígjøgnum Noreg
heilt frá Kristiansand til Steinkjer, sum liggur norðanfyri Tróndheim og eisini
føroysk luttøka á Nordlek, sum er ein norðurlendsk fólkadansarastevna, sum bleiv
hildin á fyrsta sinni í Stockholm 1920.

Í Hundtorp í
Gudbrandsdalinum kom føroyavinurin Tor Stallvik í bussin at vera ferðaleiðari.
Fyrsti steðgurin var í túninum við garðin hjá Gudbrandi í Gudbrandsdali – Dale
Gudbrand, sum norðmenn siga. Myndin á vegginum talaði fyri seg hjá okkum, sum
duga Gudbrandskvæði , – hon vísti løtuna, tá teir bera Tóra Viðagud inn á
tingið, meðan sólin rísur og Kolbein sterki stendur klárur at  smekka til. Sjálvandi kvóðu vit nøkur ørindi
av gudbrandskvæðnum.

Tað var ein
rørandi løta, tá stevnan bleiv sett og øll fløggini – eisini hjá Grønlandi,
Álandi og Føroyum, sum enn ikki eru sjálvstøðug lond, men her á jøvnum føti við
hini stóru londini – blivu borðin inn.

Við sjálva
setanina høvdu norsku fyrireikararnir tillutað okkum føroyingum eina serliga
uppgávu.  Vit sluppu sum einastu gestir á
pall at kvøða lítlu vísuna “Norden  for
Trondhjem”, – ikki smávegis heiður fyri okkara lítla land.

Mikukvøldið 11.
juli var vesturnorrønt kvøld á skránni  á
Stiklastøðum, har vit saman við íslendingum og norðmonnum hugleiddu um felags
søgu   og kvóðu  m.a. brot úr Grettis kvæði og allan Ormin
langa. Hetta gekk fyri seg í einum nakað nýbygdum langhúsi, sum var sera
vælegnað at dansa í. Sanniliga ein stór uppliving, – og vit í føroyskum klæðum,
sjálvandi.

Umleið 2000
gestir vóru komnir til Nordlek í Steinkjer, sum Noregs Ungdomslag, sum er
avhaldsfelag burturav,  skipaði
fyri.  Umleið 400 sjálvboðin vóru virkin
á stevnuni, og allar hesar 5 dagarnar, sum stevna vardi, sást ikki eitt
menniskja, sum var ávirkað av rúsdrekka.

Kathrina, Eysturoyar dansifelag.          

Søgu-
og Nordlek ferð 2012

Í sambandi við Nordlek 2012 í Steinkjer í Noreg gjørdi
Sláið Ring eina søgu- og Nordlekferð.

Steinkjer liggur norðanfyri Tróndheim og ikki langt
frá Stiklastøðum, so skjótt var tankin har, at hetta verður høvið til eina
serliga Noregsferð.

Lagt varð upp til at vitja nøkur ávís støð. Oslo,
við Bygdoy, Akreshus, Holmenkollen og Vigelandparkina. Gudbrandsdalin við
Gudbrandi í Gudbrandsdali, Hr. Sinklar og Kristin Lavransdatter. Eisini høvdu
vit havt samband við fyrireikararnar av Nordlek, um eitt serligt tiltak á
Stiklastøðum.

Nú vit eru afturkomin, má sannast, at ferðin
eydnaðist serstakliga væl. Vit komu til søguligu støðini og okkara partur á
Nordlek lá ikki eftir. Heldur má sigast, at vit enn einaferð settu serligan dám
á við føroyska dansinum.

Í ferðalagnum vóru ungdómar, 10 ung millum 16 og 26
ár og tveir ferða leiðarar, hesi fóru yvir við flúgvara, tí tey skuldu luttaka
á summarlegu hjá Noregs Ungdomslag, og 22 vaksin, sum fóru við Norrønu og høvdu
buss við úr Føroyum. Vit komu øll heimaftur við Norrønu.

  Stígum  Fast  á 40 ára veitsludegnum.

Dansifelagið Stígum Fast varð stovnað í 1971. Hetta árið var eisini bygd dansistova í bygdini Dali. Flest allir dalbingar vóru við í hesum átakinum. Jógvan Adolf Johannessen var høvuðsmaðurin  fyri at stovna Stíðum Fast.  Felagið fekk skjótt nógvar limur í allari oynni  og aðrastaðni við. Hetta gjørdi, at dansurin tók dik á seg eina tíð. At dansurin í Dali hevur havt tað gott hesa tíðina, eru útvarpsupptøkurnar frá 1980 gott dømi um. Eitt nú eru upptøkurnar av Eingríms synum og Ívint Herintson millum perlunar í Kvæðasavni kringvarpins.

Leonia Johannesen( fødd 1923 )sigur frá skúlagongdini, at tá dansaðu tey í fríkorturinum og eisini okkurt kvøld, tá ið veðrið var gott. Hon minnist, at tey kundu dansa í skúlatúninum, og tað var meir enn so, at vaksnir menn komu uppí ringin.  Hettar sigur nakað um, hvussu væl øll ættarlið kendu seg  heima í dansinum sigur Leonia. Tað gevur styrki til dansin at læra skúlabørnini kvæði. At dansurin hevur sítt sjálvsagda pláss innan skúlagátt er sera týðandi fyri framtíð hansara. Eydnast hetta, er vón fyri, at føroyski dansurin áhaldandi verður ein livandi mentunar arvur.

Tá eg hoyrdi, at dansifelagið skuldi halda 40 ára veitslu tann 28. apríl 2012, var eg so spentur at sleppa at vera við, tí Dalsbygd er nakað heilt serligt fyri meg. Hon er mest sum ein heimbygd hjá mær. Í 1983 teknaði eg meg sum lim í felagnum. 

Á veg suður koyrdi eg gjøgnum Velbastað og fram við húsinum Sólarmagn, og kom at hugsa um tann eina túrin, sum felagið varð bjóðað til eina veitslu á Velbastað. nú eru tað nøkur ár síðani, tað var ein hugnalig ferð.

Tá eg kom suður til Dals hendan dagin 28 apríl , vóru fløggini vundin a stong. Dansifelagið hevði bjóðað Sumbingum í veitslu, og vit fingu ein góða veitslu,  og har til góða dansinátt. Nú er felagshúsið Eiriksgarður blivið størri og rúmari, og vóru umstøðurnar sera góðar.

Eg vil við hesum fáu orðum takka fyri alla hesa tíð, sum eg havi verið hjá felagnum í hesi lítlu bygdini.

Dalur stendur  ikki í vøkstri tíðanverri, men enn telist hon millum frægu dansbygdir okkara. Ikki minst dansifelagum Stígum Fast fyri at takka.

Hjartaliga tillukku við 40 – ára degnum

Andrass Jacobsen

Haraldssund

Brúðarvísuskeið á Háskúlanum í Tórshavn 2. juni 2012

Tiltakið er alment. Øll við áhuga fyri brúðarvísum kunnu møta.

Ætlanin við skeiðnum er at tosa um og viðgera evnið og hugtakið brúðarvísur og brúðardansur og at geva teimum, ið arbeiða við brúðarvísum, íblástur og møguleika fyri at samskifta um vísur/yrkingar.

Tað er ikki neyðugt at vera yrkjari ella at hava nýyrkta vísu við, men er tað so, at onkur hevur eina vísu, er viðkomandi vælkomin at senda hana til Sláið Ring ella hava hana við sær á skeiðið, og verður tá høvi at tosa um vísuna saman við teimum, ið koma at hava innleggini. Annar møguleiki er eisini, at hinir luttakararnir kunnu verða til steðar undir umrøðuni. Hetta kemur at geva degnum nógv meiri ítøkiligt innihald.

Tey, ið koma við innleggum og vera við til umrøður eru:

Bergljót av Skarði, kvæðakønur studentaskúlalærari

Carl Johan Jensen, rithøvundur

Hanus Kamban, kvæðakønur rithøvundur      

Theodor Olsen, prestur

Rasmus Joensen greiðir frá, hví hann metir, at neyðugt er við alternativum brúðarvísum.

Jónleif Johannesen, ið sjálvur hevur yrkt kvæði, greiðir stutt frá sínum tankum um kvæðayrking,

Endamálið við skeiðsdegnum er at fáa viðgjørt brúðarvísuyrkingar til brúdleyp í 2012. Endamálið er eisini at fáa yrkjarar at yrkja alternativar brúðarvísur. Yrkjarar kunnu senda yrkingar inn til Sláið Ring áðrenn 1. juli 2012. Ætlanin er at geva eitt hefti út í oktober 2012. Hefti kemur væntandi at innihalda uml. 5 vísur, sum hóska seg til brúðardans.

Vit høvdu eina sera góða løtu í Skálanum leygardagin.

Ungdómarnir hugdu nærri eftir tilboðunum á Sommerlejren og meldaðu seg til fleiri tiltøk. Eisini kvóðu vit nakað og dansaðu nøkur dansispøl.

Tey ungu møtast aftur sunnudagin 6. mai kl. 16.00 á Effostøðini í Skálafirði.

Tey eldru, ið fara til Nordlek møtast í Húsinum hjá Effo á Óðinshædd 3, hósdagin 19. april kl. 19.00.

Sí annars Summarlega inni á Facebook.

Sommerlejren 2012 verður í Steikjer í sambandi við Nordlek. 12 ungdómar og 2 leiðarar fara úr Føroyum

Vit koma saman nakrar ferðir undan stevnuni fyri at venja og læra hvønnannan at kenna. Fyrsta venjingin verður í Skálanum í Klaksvík nú leygardagin 14.04. kl.10.00.

Statoil Færøyene, felagið, ið leitar eftir olju við Føroyar, og sum fer at bora seinni í ár, hevur latið stuðul til ferðina og verða teir høvuðsstuðlar saman við Sláið Ring. Vit takka Statoil Færoyene fyri stuðulin.

Sunnudagin
11. mars skipar Vága Dansifelag fyri Grækarismessu haldi í Miðvági. Haldið verður
við standmyndina av Mikkjali á Ryggi yvir av kirkjuni.

Hans
Jørgensen, skúlastjóri við Miðvágs- Sandavágs skúla, fer at halda røðu, og
Vágakórið fer at syngja nakrar sangir.

Aftan
á er opið í Beitinum, sum er felagshúsið hjá Vága Dansifelag og húsið, har
Mikkjal á Ryggi varð føddur og vaks upp. Har verður møguleiki fyri at fáa ein
kaffimunn, eitt prát, og kanska verður onkur sangur eisini sungin.

Í
eini av sendingunum í røðini Álvarann í útvarpinum í vetur, var í einum
fyrilestri nevnt, at Brúðarvísan varð tikin, eftir at liðugt var at telja
jólini. Kannað varð eftir, um hesin siður var kendur, og hvar hetta kundi vera.
Komið varð fram til, at hetta varð gjørt í Sumba, og kendi kvøðarin, Eli
Poulsen, visti at siga í sendingini, at hann hevði verið við til at tikið Brúðarvísuna
á føstulávint.

Um
dagarnar ringdi Eli Poulsen til redaktiónina og fortaldi, at hann hevði tosað
við sumbing, sum visti at siga frá øðrum gomlum sumbingi, Dánjali Jacob í
Kálgarðinum, at grundin til, at endað varð við Brúðarvísuni á føstulávint, var
tann, at Brúðarvísan vanliga varð tað fyrsta, sum tikið varð aftur um heystið,
tá dansitíðin byrjaði.

Um
heystið vórðu brúdleypini vanliga hildin, tá kjøtið var ræst. Og við teimum
fylgdi eisini Brúðarvísan. Tí varð hildið í Sumba, at hóskandi var at enda
dansitíðina, sum hon byrjaði. Við Brúðarvísuni.

“So
var ringurin sluttaður”, sigur Eli Poulsen.