Tíðindi

Barnadansistevna 2008

Dansifelag tykkara, verður við hesum boðið at luttaka á barnadansistevnuni, sum í ár verður hildin í Sandoynni, tann 5.apríl 2008.

Byrjað verður í Samljóð í Skopun kl.09.30 við felags dansi.
Síðani verður farið til Skálavíkar, har døgurði verður á Keldu.
Vit enda dagin í Eiriksgarði í Dali, við felags dansi, kaffi/saft og onkrum góðum afturvið.

Vit halda tað vera umráðandi at geva børnunum høvi at knýta vinabond, og fara tí at vera saman allan dagin. Umstøðurnar eru frálíkar til barnaspæl rundanum bygdarhúsini, so tey, ið ikki orka at dansa alla tíðina, kunnu spæla á Fifa-vøllunum, í mølini o.s.f.

Hava tit eitthvørt, ið tit ætla at kvøða ella framføra, kunnu tit siga okkum frá, so pláss verður gjørt fyri tí í skránni.

Ætlanin er so vítt gjørligt, at lata luttakararnar ferðast
ókeypis. Tí verða feløgini biðin um at samskipa túrin til Gomlu Rætt við
t.d. grannafeløg.

Boðast skal frá luttøku í seinasta lagi 9.mars 2008

Eru spurningar hesum viðvíkjandi, eru tit hjartaliga vælkomin at venda tykkum til:

Atla Dalsgaard                                                Helgu Poulsen
Leikum Fagurt                                                Stígum Fast
Tlf. 217779                                                     Tlf. 217901
T-post: simda@post.olivant.fo                       T-post: helga67@post.olivant.fo

Til Suðuroyarfeløgini! Vit kanna í løtuni møguleikan
at gista umborð á Smyrli í s.v. ferðina í Sandoynna – t.v.s. av Drelnesi
fríggjakvøld, gisting umborð, av Gomlu Rætt leygarmorgun 08.45. Gevið
okkum sum skjótast tykkara luttakaratal, so hetta kann fáast í lag.

Við dansikvøðu

Ida Lón, skrivari

Nýggj brúðarvísa

Á trettanda var markið fyri at lata inn uppskot til nýggja brúðarvísu. Inn komu átta uppskot.

Nevndin, ið vald varð at taka sær av málinum, hevur sín fyrsta
fund leygardagin 26. januar, har posturin verður opnaður og tíðarætlan
løgd, nær arbeiði skal verða liðugt.

Barnlek 2008

Dansistevna fyri børn og ung í aldrinum 8 – 16 ár verður komandi summar í døgunum 2. – 6. juli í Porsgrunn í Noreg.

Fleiri upplýsingar um tilmelding o.a. verða lagdir út seinni.

Sí heimasíðuna: www.barnlek2008.no

Nýtt kvæði

Nýtt kvæði

Jónleif Johannesen úr Dali hevur yrkt kvæði, ið hann nevnir: Deyðastund Sigmundar.
Kvæði
var fyrstuferð prentað í blaðnum Vencil og í sambandi við tiltak, ið
blaðið skipaði fyri fríggjakvøldið 5. oktober var tað eisini fyrstuferð
alment á gólvi.

Deyðastund Sigmundar

1.
Bylgjan brýtur høg og brøtt
brestir upp á landið,
troyttur maður leggur seg
í taran á Sandvíks sandi.

Niðurlag:
Treðum lættliga dansin!
Dagurin skínur so fagurliga,
komið er hægst á summarið.

2.
Troyttur maður leggur seg
niður í tarabrúgv,
Sigmund er hann at navni nevndur,
Føroyum gav kristna trúgv.

3.
Í nátt hann rýmdi borgum frá,
lívið stóð í váða.
Síðsta sjón í eygað brann,
var Turið í hildarloga.

4.
Turið stóð í hildarloga,
børnini royndi verja.
Tað var eingin av Gøtuskeggjum
á hana tordi herja.

5.
„Turið, væna fljóði mítt,
eg beri tungan harm.
Aldri aftur á ævini
eg sovi við tín barm.“

6.
„Í nátt eg havi liðið nógv,
Tóra havi eg mist.
Einari sterka slepti eg av,
tá hann hevði deyðan kyst.“

7.
Tregi og ivi í hesi stund
í hjarta hava búgv:
„Var tað rætt, tá ið eg sleit
við gomlu fedratrúgv.“

8.
„Hvat man deyðin bjóða mær,
eg fari foldum frá,
endi eg í Helheimi
til mikla sorg og trá?“

9.
„Ella man eg í Himni hátt
hoyra klokkur ringja,
ganga inn um gyltar dyr,
har einglar fagurt syngja.“

10.
Tá tók sól at lýsa í,
hon geislar sínar sendi,
Sigmund kendi styrk á sær,
og aftur trúgvin vendi.

11.
Ein dúgva kom av Himni hátt,
seg niður á sandin skeyt,
Sigmund lyftir høvur sítt,
ei longur trúgvin treyt.

12.
„Hoyr meg, sæla sendiboð,
limur í himnaskara;
hvussu er vorðið í Himmiríki,
av góðsku tú mær svara.“

13.
„Væl livst inni í Himmiríki;
bæði við gleði og gavni.
Mangar eru kempurnar,
ið prísa tímum navni.“

14.
„Í morgun komu garpar tveir,
føddir á Føroyalandi,
vátir og illa tuskaðir,
Einar og Tórir frændi.“

15.
„Har situr Ólav Trygvason,
hann lesur í Halgubók.
Hann kom hagar tann lagnudag,
tá Eirikur Ormin tók.“

16
„Har eru aðrar miklar kempur,
Rólant og Ríkin reystur,
umframt mæta keisar Karl,
blant kappar er hann bestur.“

17.
„Um tey, ið eftir á Skúvoy sita,
ongan ótta kenn.
Dóttir tín verður háborin,
og dreingir mætir menn.“

18.
Sigmund kendi mátt á sær,
hendur saman legði:
„Takk havi Guð fyri tíðina,
sum eg á foldum hevði.“

19.
Tað klárnar fyri Sigmunds eygum,
tríggjar mans hann sær.
Tann eini nevndist Torgrímur,
ber stóra øks við lær.

20.
Tala teir við vondum tungum
um ringar, skreyt og skrúð:
„Líkið grava vit í sand,
men ringin bera til búð.“

21.
Lyfta høvur úr tara upp,
øks ger banasár.
Kroppur fellur til jarðar niður,
í hondum høvd og hár.

22.
Hamin gróvu í døkka mold,
ringin tóku teir heim.
Sigmundssál mót himni fór
til gleði og miklan gleim.

Jónleif Johannesen

Frá Eysturoyar Dansifelag

EYSTUROYAR DANSIFELAG

Hin 1.juni 2007.

Skráin 2007-2008

Vanliga dansa vit í Hæddini, Saltangará, fríggjakvøld við hesi skrá:

19.10.2007		Vit práta um dansin í vetur, og so leggur Kathrina, formaðurin, fyri við Norsku løvu, sum fyri skjótt 300 árum síðani, um ársskiftið 1707/08, legði beinini á Lambavík. Jeg ser så mangt et orlogsskib, Danske kæmpev. Hans Poulsen
		Vertir: Nevndin
26.10.2007		Vitja á Ellisheiminum í Runavík kl 19.00, halda so fram í Hæddini. Regin smiður, til 29.ør. Stígum fast. Joen Carl Danielsen. Her nógv er at gera, Sangbók Føroya Fólks. Margretha Knudsen & Kára Rasmussen.
		Vertir: Pálin & Beinta.
02.11.2007		Gudbrandskvæði, Nýggja kvæðabókin 1. Louis Houmann. Jeg ser så mangt et orlogsskib, (endurtøka).
		Vertir: Julianna & Anna T.
09.11.2007		Barnadansur – byrja kl. 20.00. Det er i nat en vågenat, til 18. ørindi, Danske kæmpeviser. Joen Carl. Kom venner, lader os betragte, kopi. Dia Ellindsson.
		Vertir: Sunneva & Elsa.
16.11.2007		Dansifelagið í Havn vitjar. Byrjað verður vanliga tíð, steðgað verður á kl.23.30 at fáa ein bita, og so halda vit fram eina stund. Seyðamaðurin á Sondum, Nýggja kvæðabókin 2. Andras Hansen.
		Vertir: Nevndin.
23.11.2007		Karin Brattaberg úr Vági kemur at kvøða samanvið okkum. Hon fer eisini at práta um at kvøða vísur. Jeg ser så mangt et orlogsskib (endurtøka), og Vågenat, restin.
		Vertir: Poula M. & Karolina.
30.11.2007		Gáturíma, kopi. Hjalmar Juul. Vit taka ymiskar tættir: Strandatátt, Dagur dettur av degi, Barjamutáttin, O, kan du ikke mindes, og fleiri.
		Vertir: Anna Maria & Helena.
07.12.2007		Brestiskvæði, Nýggja kvæðabókin 1. Høgni Debes. Regin smiður 30. – 60. ørindi (framhald).
		Vertir: Simona & Marita P.
12.01.2008		Leygarkvøld í Funningi. Norðstreymoyingar bodnir við. Byrjað verður kl. 20.

18.01.2008		Vit fara til Haraldssunds við bussi úr Hæddini kl. 21.00.

25.01.2008		Hugnakvøld við døgurða, kl. 20. Kostnaður 100 kr. Tekning. Harpuríma, Grør so fagurt. Anna Sørensen & Sanna Hansen.Der går dans på Ribergade, Danske kæmpev. L. Sørensen.

01.02.2008		Aðalfundur kl. 21.00, skrá eftir lógini. Eftir fundin kvøða vit.

Ung í dansi

Tíðindaskriv

Ung í dansi

Seinasta vikuskiftið í septembur, frá 28.09 til 30.09, skipar
Sláið Ring fyri tiltakinum ”Ung í dansi”. Tiltakið verður á
Gjáargarði. Øll ung, sum ganga í framhaldsdeild ella hava aldur til
tess, hava møguleika at tekna seg. Pláss er fyri 60 luttakarum.

Sláið Ring hevur í ár valt at bjóða ungfólki á eina dansistevnu á
Gjáargarði við Gjógv. Ikki nýtist teimum ungu at hugsa um pengapungin
fyri at vera við. Tiltakið er ókeypis, bæði uppihald og flutningur.

Á Gjáargarði er pláss fyri 70 gistandi, og hava vit gjørt av, at
býta tað upp soleiðis, at luttakaratalið verður 60 ungdómar og 10
vaksin, ið koma at hjápla til.

Tiltakið byrjar fríggjakvøldið 28. sep. klokkan 18.00 við
nátturða, dansisøgu og undirhaldi. Seinni fara vit upp á gólv saman við
Eysturoyar Dansifelag. Leygardagin verða tvey skeið á skránni. Tað fyrra
kallast ”Hvussu kunnu vit læra okkum kvæðini”, og tað seinna ber heitið
” Dansisiðir og leiklutur skiparans”. Tað verða Petur Olivar í Hoyvík
og Jónleif Johannesen, sum greiða frá. Eisini fara ungfólkini ein túr í
bygdini. Um kvøldið verður skipað fyri undirhaldi og dansispølum.
Klokkan 21.00 fara vit aftur upp á gólv. Hesuferð saman við
Dansifelagnum á Látrinum.
Sunnumorgunin verður tikið samanum, áðrenn vit fara heim.

Tey ungu, sum hava áhuga at luttaka, kunnu melda seg til á telduposti:
slairing@slaid-ring.fo ella hjá Jónleif Johannesen á tlf : 227534.

Nýggj brúðarvísa

Nýggj brúðarvísa.

Hin fyrsta august sendi Sláið Ring út tíðindaskriv, har boða varð frá um kapping at yrkja nýggja brúðarvísu.

Tíðindini vóru í flestu bløðunum og í Útvarpinum. Eisini hevði teknarin Óli Petersen tey við á baksíðuni í Sosialinum.

Tað hevur víst seg, at flestu fólk eg eri komin í samband við, hava fingið kunnleika til kappingina.

Eg loyvi mær at siga, at øll, eg havi tosað við, eru glað fyri at Sláið Ring fer undir hetta tiltakið.

Tey allar flestu við teirri grundgeving, at brúðardansurin sum
hann er í dag, er tungur og stirvin, og tí er neyðigt við nýggjari
brúðarvísu.

Tað munnu eisini vera tey, ið halda hetta ikki vera neyðugt,
tí tær, vit vanliga brúka í dag, eru nóg góðar; tey hava tokka til
teirra.

Soleiðis vil tað eisini vera og vit skilja hetta væl.

Ætlanin hevur ongantíð verið at troka hinar burtur, men at geva fólki enn ein møguleika at velja.

Vónandi verður hetta átakið við til at virka føroyskum dansi at frama.

Sláið Ring
Rasmus A. Joensen, fm.

Havleikur 2008

Havleikur 2008 verður í døgunum 9. til 12. juli 2008.

Nú er komið so væl áleiðis við fyrireikingunum til Havleik 2008,
at innbjóðingarnar til útlendingarnar eru farnar avstað og higartil hava
fleiri boða frá, at tey eru áhugaði at koma hendanvegin.

Nærri fráboðanir og skráin verða at síggja á heimasíðuni í næstum.

Skrá fyri landsdansistevnuna

1. Sumbiar Dansifelag Stríðið á Húnalondum, 2. partur

2. Eysturoyar Dansifelag Blakman konge

3. Dansifelagið í Havn Geyti Áslakson

4. Stígum Fast Fruntatáttur

5. Vága Dansifelag Tróndarkvæði

6. Tøkum Lætt Jómsvíkingakvæði

7. Dansifelag Kaggans Fípan Fagra

8. Klaksvíkar Dansifelag Eingríms synir

9. Dansifeflagið á Látrinum Hong Hans

10. Norðstreymoyar Dansifelag Villiam Kornus

11. Fótatraðk Ámunds ríma

12. Leikum Fagurt Brúsajøkil

13. Suðuroyar Norð. H. Gunnar á Líðarenda

14. Jómsvíkingar Ormurin Langi

15. Tvøroyrar Dansifelag Brestis kvæði

Landsdansistevna í Suðuroynni

Fríggjadagin 18. og leygardagin 19. mai verður landsdansistevnan í Suðuroynni.

Byrjað verður fríggjakvøldið kl. 20.00 í Framtíðini í Vági, har
Sláið Ring – landsfelag føroyskum dansi at frama, skipar fyri
mentanarligum tiltaki. Fyrst fara børn og kvinnur úr Sumba fara at kvøða
eina vísu og aftaná verða tað børn úr 8. flokki við Vágs Skúla, sum
kvøða Huldugentuna. Síðani verða tríggir fyrilestrar og hugleiðingar.
Eli Poulsen úr Sumba fer at hugleiða um dansin, og hvat hann hevur
fingið og fær burtur úr honum, síðani sigur Poul Arni Holm av Tvøroyri,
fyrverandi sangari í orkestrinum Týr, nakað um føroyska dansin og hvussu
hann kann kveikja í tónleikin. Seinasta fyrilesturin heldur Andrea
Opielka úr Bochum í Týsklandi. Hon skrivar doktararitgerð um føroyskan
dans, við serligum atliti til dansispøl, og fer hon at draga fram ymiskt
úr øllum tí rúgvismika tilfari, hon hevur samlað. Saman við
fyrilestrinum verða eisini dansað nøkur dansispøl. Kvøldið endar við, at
vit fara upp á gólv og dansa til midnátt.

Leygardagin 19. kl. 18.00 verður sjálv landsdansistevnan sett við
ítróttarhøllina í Trongisvági. Tað verður Bjarni Vestergaard,
fyrverandi formaður í Sláið Ring, ið setir stevnuna. Aftaná fer Ketty
Andreasen, formaður í Tvøroyrar Dansifelag, sum umboðar tey fýra
dansifeløgini í oynni, Sumbiar Dansifelag, Jómsvíkingar, Tvøroyrar
Dansifelag og Suðuroyar Norðara Dansifelag, at bjóða vælkomin.

Borðhaldið byrjar kl. 19.00 og eftir borðhaldið verður farið upp á gólv.