Category: Tíðindi

Barnadansistevnan 2022, ið verður hildin á Eiði 30. apríl 2022, og tað er Dansifelagið á Látrinum, sum skipar fyri.

Stevnan verður hildin í skúlanum – í ítróttarhøllini. Kl. 10:00 verður stevnan sett og endar kl. 15:00.

Á skránni verður umframt kvøðing og dans útferð á Niðaru Fitjar. Eisini fáa vit døgurða, kakur, kaffi og saft.

Dansifelagið á Látrinum ynskir øllum gestunum vælkomnum.

Niðanfyri sæst skráin fyri kvøðing.

Bussurin úr Havn fer ætlandi frá rennibreytini kl. 9:00. Tey, ið annars hava teknað seg at koyra við bussi, fáa boð frá sínum lokala dansifelagið um, nær og hvaðani bussurin koyrir.

Eins og undanfarna ár fór Klaksvíkar Dansifelag til Viðareiðis føstulávintsvikuskifti. Korona spældi ein leiklut, so hóast 40 fólk høvdu meldað til vóru bert 30 av okkum, ið vóru nóg byrg til at fara túrin.

Veðrið var ikki við okkum, so vit máttu gera broytingar í skránni. Ístaðin fyri at fara ein túr í bygdini, vóru vit boðin inn til Miriam Heinesen til eitt hugnaligt prát og stóran blíðskap. Klokkan 16:00 samlaðust vit aftur á Hotel Norð, har vit gistu. Tá var tunnan komin upp og farið var undir at sláa tunnu. Endin var, at Astrid Tóradóttir bleiv kattakongur og fær heiðurin at bera hetta heiti fram til næstu føstulávint. Tá tunnan var niðurkomin, og vit høvdu sungið og dansað eina løtu, var farið til borðs. Góður matur og gott undirhald merktu borðhaldið, sum endaði uml. kl. 23:00. Vit dansaðu frá borði og hildu á at dansa fram móti kl 1:00, tá vit taldu jólini. Jónleif skipaði ”Mær gav Sankta Mortan” og Ólavur Syderbø skipaði ”Stat op Sankta Simeon”. Eftir tað samlaðust vit til sang og fóru at senda drunn millum borðini. Hetta var mikið hugnaligt. Tá klokkan nærkaðist 3:00 fóru fólkini dansitroytt til songar.

Sunnudagin var veðrið nógv betri og fleiri nýttu møguleikan at spáka sær ein túr í góðveðrinum um morgunmatarleitið. Klokkan 11:00 var farið í kirkju. Um 14:00 sankaðu fólk førslu saman og vendu nøsina heima aftur eftir gott og ríkandi dansivikuskifti. Um lív og heilsa verður, er ætlanin hjá Klaksvíkar Dansifelag at gera líknandi túr komandi ár, tí ein sannroynd er tað, at slík upplivilsir geva felagnum tað samanhaldið, sum skal til fyri at leggja góðar lunnar undir eitt virkið dansifelag.

Vegna Klaksvíkar Dansifelag

Jónleif Johannesen, formaður

Árliga barnadansistevnan verður

leygardagin 30. apríl 2022.

Í ár skipar Dansifelagið á Látrinum fyri stevnuni, sum verður í ítróttahøllini á Eiði. Stevnan byrjar kl. 10:00 og endar kl. 15:00.

Á stevnuni verður døgurði at fáa, drekkamuður og kakubiti. Útferðir verða, og so verður sjálvandi dansað!

Feløgini melda til

í seinasta lagi 9. apríl 2022.

við at skriva ein teldupost til rasmus.a.joensen@gmail.com har tit upplýsa 1) tal av børnum, 2) tal av vaksnum, 3) hvat tit vilja skipa – trý uppskot og 4) hvussu nógv koyra sjálvi.

Skráin verður send feløgunum og løgd út á sr.fo.

Stevnan er ókeypis. Sláið Ring samskipar busskoyring til Eiðis. Ferðing sjóvegis og møgulig ferðing við bygdaleiðum í Suðuroy og Sandoy verður eisini goldin av Sláið Ring.

Suðringar hava møguleika at fáa innivist í KFUM í Havn fríggjakvøldið 29. apríl.

Vegna

Dansifelagið á Látrinum og Sláið Ring

Rasmus Joensen
rasmus.a.joensen@gmail.com

Í ár skipar Ung í Dansi aftur fyri Upp á stovugólv, sum verður tann 5. februar 2022. Hesaferð verður tiltakið í Nólsoy og vertirnir verða eftir ætlan Hilmar Joensen, Kristian Hansen og Leif Hansen.

Tiltakið verður í Nólsoy, og tað fer at ganga nakað soleiðis fyri seg:

1. Fólk koma til Nólsoyar, har tey verða býtt upp í tríggjar bólkar.
2. Hesir bólkar fara so í hvørt sítt hús, har ein vertur er í hvørjum húsi. Vertirnir greiða so frá onkrum kvæði, vísu ella tátti, sum tey hava valt og aftaná verður tað (ella bara eitt brot av tí) kvøðið í húsinum. Síðan rotera bólkarnir.
3. Tað verður 1 tími millum at hvør vitjan byrjar.

Møtt verður í seinasta lagi kl. 16:45 í Royndarhúsinum (ella so skjótt sum komið er í land við Ternuni). Har verður goldið og koronakanning eftirhugd (sí niðanfyri) og armband útflýggjað. Húsavitjanirnar byrja kl. 17:15 og enda kl 20:15. Síðan verður okkurt at eta og drekka í Royndarhúsinum og eisini verður skipað fyri almennum føroyskum dansi kl. 21:00.

Tað er avmarkað pláss í húsunum, og tí er neyðugt við tilmelding. Hetta verður gjørt við at ringja ella skriva til ein av hesum:

• Anna Birna Bjarnastein Restorff 586242 / ar2803u8@skulin.fo
• Kristian Jacobsen 272957 / kristianjac1509@gmail.com

Til tann almenna føroyska dansin, ið verður í Royndarhúsinum aftaná, er ikki neyðugt við tilmelding.
💰 Kostnaður fyri tiltakið og dans er kr. 100 (umframt møguliga kr. 25 fyri skundtest, sí niðanfyri).
💰 Kostnaður fyri almennan dans er kr. 50 (umframt møguliga kr. 25 fyri skundtest, sí niðanfyri).
Okkurt til matna er við í prísinum, og so verður onkur leskidrikkur til sølu.

Møguleiki er at taka Ternuna úr Havn kl. 16:20 og úr Nólsoy kl. 22:25.

Tiltakið er rúsfrítt.

Koronafyrivarni:

Í føroyska dansinum koma vit tætt hvør uppá annan, og fyri at øll skulu kunna kenna seg trygg, so eru hesar treytir:

• Fólk, sum hava sjúkueyðkenni, mugu undir ongum umstøðum luttaka.
• Fólk, sum eru smittað ella eiga at vera í sóttarhaldi, mugu undir ongum umstøðum luttaka.
• Øll sum koma, skulu prógva at tey ikki eru smittufarlig við at uppfylla eitt av fylgjandi:
  • Vísa prógv fyri negativari PCR-test, ið er tikin fríggjadagin 4. februar 2022, ella
  • Vísa prógv fyri positivari PCR-test, ið er tikin millum 25. desember 2021 og 29. januar 2022, ella
  • Gjalda kr. 25 og fáa tikið eina negativa skundtest á staðnum (í Royndarhúsinum) – vit veita skundtestina og vegleiða. Hetta tekur vanliga uml. 20 min. og til ber at sita inni, meðan bíðað verður eftir svari 😉
• Tey, sum hava goldið fyri luttøku og uppfylla omanfyristandandi, fáa eitt armband sum prógv 👍

Endiliga sluppu vit aftur at dansa sum vanligt. Tí hava øll dansihugað fólk longst eftir hetta seinasta hálvaannað árið, nú koronafarsóttin hevur gjørt tað heilt ómøguligt at dansa føroyskan dans. Smílini vóru eisini hjartalig og gleðin stór, nú fólk úr øllum feløgum í landinum og úr Fótatraðk, uml. 370 í tali, hittust aftur. Dansifelagið í Havn og Tøkum Lætt skipaðu fyri stevnuni í felag.

Fyrsta landsdansistevnan var vesturi í Vágum í 1983, og hendan, sum er tann 14. í røðini, er tann triðja í høvuðsstaðnum. Hinar vóru í 1989 og í 2001. Tað eru bert 2 ár síðani, at stevnan var á Eiði, hóast tað vanliga hevur verið tŕy ár millum stevnurnar. Orsøkin er, at norðurlendska dansistevnan ”Havleikur”, skal vera í Havn 12.-17. juli 2022. Tað hevði verið ov mikið, at havt tvey so stór tiltøk fyri somu fólk sama summar, og tí bleiv landsdansistevnan hesaferð framskundað eitt ár.

Ein landsdansistevna er ein stór veitsla, sum byrjar við setan og síðani er borðhald við góðum mati. Av fyrstan tíð var ætlanin at seta stevnuna á Vaglinum, men tíverri tók Voxbotn seg framum, so tað bleiv av ongum. Kanska gott tað sama, tí tað fór at regna, so Heðin Mortensen, borgarstjóri, setti stevnuna inni í ”Dansifrøi”, har borðhaldið eisini var.

Nokk av góðum mati frá Magna Garðalíð og hansara fólki. Tað var sjálvtøka, og tað gongur væl skjótari enn servering við føtum.

Á dansistevnuni á Eiði fyri trimum árum síðani gjørdu vit fyrstu ferð tað, at nakrar fáar ordiligar røður vórðu hildnar, heldur enn at umboð fyri hvørt felag segði nøkur orð. So sera skilagott. Á hesari stevnuni talaðu bert Gunnar Restorff, formaður í Sláið Ring, og Hanus Kamban undir borðhaldinum. Hesum skulu vit halda fast í. Sá røðuna hjá Hanusi aftur í Dimmu, sum kom 28. august. Gott, tí vit mugu onkuntíð gera vart við, at vit eru til. Tórður Mikkelsen frá Kringvarpinum var eisini á stevnu, og nøkur brot, har hann prátaði við fólk, hava verið at sæð í sjónvarpinum.

Á umboðsráðsfundi hjá Sláið Ring 1.mai umrøddu vit m.a. ymiskt, sum hoyrir landsdansistevnuni til. M.a. bleiv nógv tosað um dansileistin, sum hevur verið brúktur á øllum stevnum frammanundan hesari. Skjótt var semja um, at royna okkurt annað, tí tað er so troyttandi at bíða alla náttina eftir tørni hjá teimum feløgum, sum er seinast á skránni. Skotið varð upp, at fáa feløg at kasta saman um at kvøða, so planlagda skráin var skjótari frá hondini. Eg haldi, at hugskoti var gott, men at vit kortini fingu ov fá forkunnug kvæði og vísur, tá av tornaði. Tað eigur at vera okkurt av slíkum, tá vit samla elituna í føroyskum dansi. Hetta mugu vit gera okkurt við til næstu stevnu. Vit í Eysturoyar dansifelag kvóðu ”Jákup á Møn” saman við Klaksvíkar dansifelagi. Joen Carl Danielsen og Jóngerð Midjord skipaðu. Á landsdansistevnu fyri 20 árum síðan skipaði Joen Carl ”Kong Hans” í Sjónleikarhúsinum.

Eitt annað gott hugskot frá umboðsráðsfundinum var at lata fólk undir 30 ár sleppa á stevnu fyri kr. 100, meðan hini betaltu 300. Eini 50 fólk undir 30 ár vóru á stevnu. Hetta betala vit í Sláið Ring fegin. Tað er okkara størsta ábyrgd at seta við.

Eg kann ikki lata vera við at nevna Andreu Opielka, sum so fegin kemur til Føroya á landsdansistevnu ferð eftir ferð. Hon hoyrir til hjá okkum nú og hevur givið okkum frálíku bókina um dansispøl.

Eftir ætlan verður landsdansistevna aftur um uml. trý ár, várið 2024 í Vágum.

Norðskáli, septembur 2021,
Kathrina Hansen

»Ung í Dansi« fara at hittast til dans í Kvívík leygarkvøldið 9. oktober 2021. Vit møtast kl. 18 og fáa guidaðan søguligan rundtúr í bygdini. Síðani fáa vit góða fiskasuppu til nátturða áðrenn vit fara oman í Frøishøllina til almennan dans uml. kl. 21. Tiltakið er ókeypis fyri limir í Ung í Dansi, men neyðugt er at tilmelda seg við at skriva eini persónlig boð til Elmu Næs Mortansdóttir antin á facebook ella við telduposti á elma.naes.mortan@gmail.com í seinasta lagi mikudagin 6/10-21

Hugnakvøld við føroyskum dansi 29. oktober 2021

29. oktober 2021 skipar Klaksvíkar dansifelag fyri hugnakvøldi við føroyskum dansi. Tiltakið verður kl. 21.00 – 01.00 í Skálanum, Bøgøta 11, 700 Klaksvík.

Hugnakvøldið byrjar við sangløtu og hugleiðingum. Jóanes Johannesen spælir á harmoniku og frásøgufólk verða:

Ásbjørn Lómaklett, uppvaksin á Syðradali,

Jóngerð Midjord, uppvaksin í Haraldssundi

Jónleif Johannesen, uppvaksin í Dali.

Evnið, hugleitt verður um, er: Bygdin, kvæðini og dansurin.

Tey trý frásøgufólkini eru øll sera áhugað í kvæðamentan okkara og royndir skiparar.

Kostnaðurin fyri tiltakið er 150 kr., og tilmeldingarfreistin er 25. oktober 2021.

Tilmeldingin fer fram hjá Jónleifi Johannesen á telefon 742200 ella við at senda teldupost til: jonleif.johannesen@skulin.fo

Klaksvíkar dansifelag

Nú nærkast, at vit fara til Mikladals

Her kemur ein vegleiðandi skrá.

Fríggjadagur 10. septembur

Vit møtast øll kl. 18:10 við lendingina hjá Sam í Klaksvík, og vit sigla kl. 18:30. Ein bussur bíðar eftir okkum í Syðradali og koyrir okkum víðari til Mikladals. Vit gista í Avhaldshúsinum í Mikladali. Har eru madrassur at sova á, so bert er neyðugt at hava soviposa við. Tá vit koma til Mikladals fáa vit okkurt at eta og so er hugni á skránni.

Leygardagur 11. septembur

Morgunmatur er kl. 9:00, og síðani er ætlanin, at vit fara gongutúr út á Kallin við ferðaleiðara. Vit smyrja matpakka og hava matpakkar við. Klokkan 17 er døgurði og eftir døgurða er aðalfundur. Um kvøldið verður almennur dansur.

Sunnudagur 12. septembur

Vit eta morgunmat, rigga av og møguleiki er at fara í kirkju kl. 12. Bussurin koyrir 13.55 úr Mikladali og báturin fer kl. 14:20 aftur til Klaksvíkar.

Tey, ið ikki hava fart norð til Klaksvíkar kunnu skriva til nevndina – so finna vit eitt pláss til tykkum í einum bili.

At hava við

• Soviposa
• Heit klæðir
• Góðar gangiskógvar