Barnadansistevnan 2009

 

Skráin fyri barnadansistevnuna
2009

 

Kl.
9.00
Vit møtast á Krambatanga
og gera eina dansigongu til skúlan/ítróttarhøllina í
Trongisvági.

 

Kl
9.40
Í ítróttarhøllini setir
formaðurin í Sláið Ring, Rasmus Joensen, stevnuna. Aftaná kunnar Nita Næs um
dagin, og  møguleiki er fyri einum
drekkamunni.

 

Kl.10
Farið verður upp á gólv, og dansað verður fram til døgurða. Kvøðið verður m.a.
Sigmundskvæði yngra, Gullbrandskvæði, Flóvin Bænadiktsson, Torkils døtur,
Ormurin Langi, Bjerget, Nykurs vísu, Stolt Signhild, Mallebro, Ólavur
Riddararós. Næmingar úr St. Frants skúla vísa fram dansispøl.

 

Kl.12.30 Bólkur 1 etur døgurða

 

Kl.13.00 Bólkur 2 etur døgurða

 

Kl.13.30 Bólkur 1 fer bussferð suður eftir oynni, tað verður
steðgað í Vági og í Sumba

             
Bólkur 2 fer bussferð í norðaru helvt. Tað verður steðgað í Fámjin, í
Hvalba og í Sandvík.

             
Staðkend frásøgufólk eru í bussunum.

 

Bólkur 1: Sumbiar dansifelag, Tøkum Lætt, Jómsvíkingar, Vága
Dansifelag

            
   Leikum Fagurt,
Stígum Fast

 

Bólkur 2: Dansifelagið í Suðuroyar norðaru helvt, Klaksvíkar
Dansifelag, Eysturoyar Dansifelag

               
Dansifelagið í Havn

 

Bólkur 1: Vitja og dansa í 
Jómsborg.

Bólkur 2: Vitja og dansa í 
Vesturhøll.

 

Bólkur 1: Vitja og dansa í Dansistovuni í
Sumba.

Bólkur 2: Vitja og dansa í Roynhøllini í
Hvalba.

 

Kl.
17.00
Fráferð úr Sumba og
Hvalba

 

Øll savnast á kaiøkinum, har vit sláa ring, áðrenn farið
verður umborð.

 

Heitt verður á børnini at vera ílatin eftir veðrinum og at
hava matpakka við.

Kvæðir í námsfrøðiligum búna

 Við at brúka leitiorðið “kvæði” í
leitiskipanini, fann eg fram til fýra ljóðfílar. Teir vóru Sigmunds kvæði yngra,
Leivskvæði, Grindavísan og Brestis kvæði. Føroya Skúlabókagrunni ætlar at
útbyggja hendan partin munandi. Umframt at leggja kvæðir út sum ljóðfílar,
filmklipp og tekstir, ætlar Føroya Skúlabókagrunnur at gera og savna
undirvísingar tilfar til kvæðini, soleiðis at lærarin kann fara inn á alnótina
og taka góðar kvæðauppgávur niður og printa tær út. Til hvørja kvæðauppgávu
verður ein námsfrøðilig metan gjørd. Metanin fevnir um aldursbólk, tíðarbil,
arbeiðshátt, endamál, o.a.

 

Føroya Skúlabókagrunnur vil fegin frætta frá
lærarum, sum liggja inni við uppgávum til ymisk kvæði. Lærarar nýtast ikki at
bera ótta fyri at stavivillur o.a. kemur út á Snar, tí Føroya Skúlabókagrunnur
viðgerð, snøggar og rættlesur uppgávurnar, áðrenn tær verða lagdar út. Føroya
Skúlabókagrunnur vónar at fáa tilfar frá fleiri lærararum, soleiðis at Snar
verður ein sterkur og fjølbroyttur stuðul 
hjá teimum, sum fáast við kvæðaundirvísingin. Sláið Ring stuðlar átakinum
av fullum huga.

 

Er tað so at onkur tykkara liggur inni við góðum
tilfari, sum tit halda kann brúkast, eru tit vælkomin at seta tykkum í samband
við Jónleif Johannesen næstformann í Sláið Ring.

Heiðursrøða

 Tann 25 januar fekk Martin Tórgarð Heiðurgávu landsins. Í tí sambandi var heiðursrøða borðin fram. Les heiðursrøðuna her

Heiðursrøða
Martini Tórgarð til Heiðurs

 

Fram gekk ein av dvørgunum,
frá man
frættast víða:
Ert tú komin at leika her,
ella ert tú komin at
stríða?”

 

Martin Torgarð og hansara ættarlið, ið nú reikar um
kempualdur hava vunnið eitt megnarstríð og tað eiga vit Føroyingar at vera
takksamir fyri.

 

Hesir menn og hesar kvinnur megnaðu at stríðast fyri at
dansinum var lív laga. Fyrst royndu teir við telgimuddi at krivja
harmonikubjólgarnar. Tað vísti seg ikki at vera mátin. Síðani tóku seg saman í
Dansifeløg. Nú gekst betur. Besta vápnið í hesum stríði var dansigleði.

 

Tað
var á hesum fronti at Martin Torgarð vísti seg at vera kempa mikil. Hvør liður,
hvørt eygnabrá, hvør tóni og hvørt orð hjá Martini er fylt av dansigleði.
Hann dansar
so lætta, kvøður so reinan og livir so inniliga, meðan hann
skipar.

 

Tað er ein søga um Martin og Abba
mín Jens Ludvík.
Martin skipaði
Runsivalstríðið. Dansurin gekk væl og frásøgnin var livandi. 

 


ið endurtøkurnar komu fyri gekk dansurin javnt, Tá Langalív fall og Dosmar Spaki
fór foldum frá, var dansurin trestur, malskur og rungandi, tá ið
Tolvjavningarnir fullu syrgjandi. Og væl livdu teir við.


ið ørindi, har Karlamagnus sær Rólant sita deyðan, kemur fyri møtast Martin og
Jens Ludvík í ringinum.

 

”Harra Guð Farðir av Himmiríki

meti keisarans neyð,

Hann sær hvar í Rólant situr

 undir
steini deyður”

 

Martin skal byrja, men einki orð kemur fram. Teir hyggja
inn í eyguni hvør á øðrum, men einki ljóð hoyrist. Hóast tøkn merkja øll í
ringinum, at her er ein syrgilig rørandi løta. Dansilagið, rørslunar,
anlitsbráðini vístu tað. Her var einki at ivaðist í: Keisarin kendi mikla neyð.

 

Martin tók síðani aftur niðurlagið og kvæð víðari. Tað
var ikki tikið afur í aftur ørindi. Ørindi var sagt uttan
orð.

 

Umframt ein livandi dans átti Martin og hansara ættarlið
eina rúgvu av kvæðum. Kvæðini eru í dag komin á skrift og tónarnir festir á bløð
og fløgur.

Martin Tórgarð eigur sín stóra lut í hesum arbeiði. Við
eini rødd, einum minni, einum nótafesti, sum fáum er beskori, hevur Martin
Torgarð kvøðið

Og
sungið fleiri 1000 ørindi inn á band.

 

 Í øðrum
londum er tað óhugsandi at duga slíka ørindamongd. Men her heim hjá okkum eru
enn fólk, sum duga kynstri. Enn finnast kvæðakempur í Føroyum, sum lyfta arvin
Martin Torgarð og onnur góðu føroyingum í varveistlu.

 

Takk fyri arvagullið. Spurningurin er um vit megna at
varða tað?

 

Flestu okkara, sum luttaka í føroyskum dansi síggja at
dansifeløgini vikna. Dansifeløgini orka ikki einsamøll at varða dansin sum
fólksins ogn. Her má meiri til. Eg havi ein dreym um at dansurin og kvæðamentan
okkara kemur at hvíla á fýra sterkum beinum.

 

Bein eitt eru dansifeløgini.

Dansifeløgini, sum áhaldani mugu vera hjartaslátturin í
tí livandi dansinum.

 

Bein tvey er Mentamálaráðið.

 Mentamálaráðið, sum metur kvæðakempu, sum ein kempu í føroyskum mentanarlívi.
Mugu teir liva upp til sína metan.

 

Bein trý er Kringvarpið.

Kringvarpið, sum má liva upp til sína skyldu, sum
varðveitari og ikki minst mennari í hesum høpi.

 

Tað
fjórða beini er fólkaskúlin.

Fólkaskúlin sum eigur at geva næmingum okkara ein
stoltleika og lærdóm í barmin, kvæðunum og dansinum
viðvíkjandi.

 

Framyvir mugu øll hesi bein
halda.

Svíkur eitt kemur dansurin at  rilla, svíkja tvey fellur
hann.

 

Hann hvílir á okkum øllum. Og hvat annað skal folksins
ogn gera. Sjálvsagt hvílir hon á fólksins herðum.

 

Undan farin ættarlig hava varðveitt ein fjølbroyttan
dans.

 

Frábrygdir bæði í dansi og uppskriftum liva enn í dag,
tó væl minni enn fyrr.

 

Tað
er tødna í fjølbroytta dansinum og í rúgvismikla ørindavalinum sum borið verður
framm á gólvi.

 

Hinvegin kann sigast, at fjølbroytni er størri enn
nakrantíð. Kór, sjónleikir, rockbólkar, songfuglar, spælimenn, ung sum gomul
bera kvæðini fram á ymsan hátt.

 

Er
hetta skapandi ella er hetta oyðandi?

 

Lat
okkum ímynda dansin sum eitt træð.

 

Tann vakri aldargamli bulurin er tann góði gamli
føroyski dansurin við øldum á baki. Hann er vakur, hugvekjandi nærmast
gandakendur. Av og á festur hann bløð. Tá er vakurleikin rámandi, ja,
ævintýrakendur.

 

Bløðini eru tey í náa dagsins menniskjum. Bløðini eru
tey, sum skulu vekja tað kenslu í føroyinginum, at hetta er okkara felags ogn.
Eitt ár sæst kórsangur á krúnuni, okkurt ári Eivør, okkurt ári Týr.

 

Dansurin og kvæðamenntanin, bulurin á træðnum má megna
at bera krúnuna.

Verður krúnan ov stór, so fellur træðið. Fellur træðið
er dansurin farin.

 

Lýta vit aftur um bak og ímynda okkum at dansurin ikki
var livandi, kunnu vit hóma skaðan. Harkaliðið tók útgangsstøðið í kvæðunum,
Enek í Harkaliðinum, Eivør í Enek, Týr í Eivør, Valravn í TÝR og áðrenn vit
vistu av, var arvurin farin av sporðinum. Tí betur hendi hetta ikki. Tí betur
hava øll sum spæla sær við kvæðini tikið útgangsstøðið í dansinum. Hetta má
áhaldandi verða so. Vit mugu leggja okkum í geyma. At størri krúnan er, sterkari
má bulurin verða.

 

Meiri vit tora at brúka dansin og kvæðini, betur mugu
vit fjálga um tann siðbundna dansin og gomlu
kvæðamentanina.

 

Megna vit hetta, verður dansurin sterkari enn
nakrantíð.

 

At
enda vil eg takka fyri tað álit mær var sýnt her í dag,  og vil eg ynskja Martini Tórgarð
hjartaliga tillukku við heirðinum.   

 

Takk
fyri

Góð veitsla í Nólsoy

 

Tann 14. februar í ár komu 50 fólk av Sandoynni til Nólsoyar. Tað
vóru dansarar úr báðum dansifeløgunum Stígum Fast úr Dali og Leikum Fagurt av
Sandi. Úr Nólsoy vóru gott 50 fólk møtt. Gist var hjá privatum. So her var
upplagt til eina góða veitslu.

Borðreitt var var við trimum rættum. Nógvar og góðar vóru
talurnar. Stuttligt var at uppliva góðan og stuttligan frásøguhátt. Sólvit er
ein meistari. Vit høvdu eina stutta skrá við trimum kvæðum so vit kundu
fyrireika okkum. Á skránni var Bømerlandsdronningen, Dvørgamoy 1. og
Grindavísan.  Síðani var eingin skrá. Eisini spældu tvær harmonikur og ein
guitari eina løtu. Eftir harmoniku dansin haldi eg,  at føroyski dansurin
gekk enn betur. Vit fingu morgumat um 3 tíðina. Síðani aftur upp á gólv
niðriundir í Royndarhúsinum. Dansað varð til tann ljósa morgun. Sunnudagin kl
1325 fóru sandoyggjafólk av oynni. Stóra takk skulu tit hava fyri vitjanina.

Royndarhúsið er gott til veitslur. Tó er dansigólvið í neðra hart
og høgt til loftið. So eg ynski eitt enn betri dansigólv til næstu ferð vit
hittast í Nólsoy. Lágt til loftið og eitt dandandi gólv-  Ooiiij-  tað
er gott.

Annars eru vit farnir á Facebook, har liggja nakrar
stuttligar upptøkur við Seyðamanninum, Sigmundi í Lon. Áhugaði er vælkomin at
 melda seg á okkara facebook vangamynd. Leita eftir:  “Nólsoyar
Dansifelag”  –  á 
www.facebook.com

Við dansikvøðu.
Erlendur E. Simonsen,  formaður Nólsoyar
Dansifelag.

Lív í heimasíðuna

 Nevndin í Sláið Ring hevur tikið stig til at blása meiri lív í
heimasíðuna. Í hesum sambandi eru øll vælkomin at senda okkum tilfar.

Eftir áheitan frá aðalfundinum 2008 hevur nevndin í Sláið Ring tikið stig til
at blása meiri lív í heimasíðu okkara. Á nevndarfundi tann 18. mars, har
teldukønir vóru til staðar, varð evnið viðgjørt. Niðurstøðan var hendan:

Sniðbroytingar

Sniðroytingar skuldu gerast, soleiðis at
heimasíðan kemur at vera meiri innbjóðandi. Eitt nú skal onkur markørur flytast,
myndir skuldu koma inn saman við yvirskriftini o.s.fr.

 

Heimasíðurøkt her og nú

Sláið Ring vil fegi hava eina livandi heimasíðu. Í
tí sambandi verður ein skipan gjørd, sum tryggjar at nevndarlimirnir leggja
tilfar á síðuna. Arbeiðið verður skipað á tann hátt, at tað hvørja viku kemur
okkurt nýtt á síðuna. Henda skipan var sett í verk við tað
sama.

 

Heimasíðurøkt framyvir

Arbeitt verður við at gera heimasíðuna
soleiðis, at øll limafeløgnini kunnu fáa ein blogg í part. Á aðalfundinum í
septembur 2009 er ætlanin at samskipa heimasíðutilfar fyri dansiveturin 09/10.
Málið er, at øll limafeløgini
skulu koma við onkrum tilfari.

Annars eru øll vælkomin at senda
nevndarlimunum í Sláið Ring viðkomandi tilfar longu nú.

Væl eydna stevna

 Enn eru vit ikki
volaðir

 

Hurðin klamsaði í tí nógva
vindinum. Hvør øðrum á baki komu lærarar úr øllum landinum inn í gongina. Flestu
huffaðu smílandi um hetta veðrið, sum var. Vindurin lá um 25 m/s henda morgunin.
Kortini var bert ein luttakari, sum setist aftur.

 

Tá luttakararnir høvdu etið
morgunmat leggi Rasums Joensen, form. Í Sláið Ring fyri. Hann bjóðaði vælkomin
og hugleiddi um føroyska dansin og kvæðamentan okkara. Millum annað segði hann
soleiðis:

 

Tá eg tosi við fólk, so siga tey,
at tey halda nógv av dansinum og tí, sum hann hevur við sær. Tey eru hugtikin av
dansinum, skiparanum, dansifólkinum og innihaldinum, men tey duga einki og tí
eru tey ikki við.

 

Tað er hetta seinasta, eg havi
hug at steðga við og vísa á, at skal dansinum vera lív laga, so má undirvísast í
dansinum og øllum tí hann hevur við sær, so fólk fáa tann kunnleika, sum skal
til, fyri at kenna dansimentanina.

 

Enn eru fleiri, sum hava dansin
natúrligan og kunnu skipa eitt kvæði ella eina vísu, so enn eru kreftir, har
dansurin er natúrligur, er fólkaligur, er
fólkadansur.

 

Skulu vit halda dansinum og menna
hann, so hava vit enn nógv fólk, ið kunnu læra okkum at bera førningin
víðari.

 

Tað er mín vón, at dansurin,
kvæðini, vísurnar, dramatiseringin, málið v.m. verður lív laga, og at skúlin
verður ein av hesum mentanarberum.

 

 

Eftir hetta tók Brynolf Lamhauge
( Bynne ), lærari á Sankta Frans skúla, orðið.

Bynne hevur arbeitt við
kvæðamentan í skúlahøpi í nógv ár, og var tað sera áhugavert at lurta eftir
hansara royndum. Bynne segði millum annað, at tað er sera umráðandi at fanga
næmingin. Vekja áhugan í næminginum. Besti mátin var eftir hansara tikki at siga
søgur. Kvæðini eru á tremur av góðum søgum. Brúkið tær vóru m.a. boðini frá
Bynna.

Umframt eina góðan fyrilestur
vísti Bynne okkum ein film, har næmingar í Sankta Frans skúla dansaðu dansispøl
og kvóðu Trølli í Áradali. Filmurin er til keyps og fer peningurin til
uttanlandaferð hjá flokkinum.

 

Síðani fekk Erlendur Simonsen
orðið. Hann greiddi frá hvussu hann, saman við Símuni Hansen og Jón Durhuus, er
vanur at undirvísa í dansi og kvæðum. Erlendur hevur gjørt sær eina uppskrift,
sum hann so við og við útbyggir.

 

Uppskriftin hjá
Erlendi

1.     
at tað skal  vera      stuttligt.

2.     
Og so at fáa allan kroppin
við.

3.     
Greiða frá muninum á at syngja og at
kvøða:
liggur ein kavafonn tindi ááá

4.     
Taka allar smálutir við so
spakuliga: 

a.      
hendur ,  høgra upp og klask niður á vinstru hjá
síðimanni

b.     
fjarða í
knøum,

c.      
hyggja uppá hvønn annan,

d.     
smílast

e.      
skiparin byrjar hvørt
ørindi

f.      
rópa  x   kvøða
siðiliga

g.     
munur á dansi frá bygd til
bygd

h.     
gera alt ov nógv av  og alt ov lítið av

i.       
biðja um ”sangir” frá børnunum ,
Tillukku til tín, Buss Óli, Góðan morgun ketta mín,

5.     
Rósa børnunum fyri so nógv sum
møguligt.

6.     
Siga frá onkrari spennandi
søgu,  Brynhildar Tátt,

7.     
Fyrr einki sjónvarp, søgdu frá søgum í
kvæðum.

8.     
Stuðla børnunum í at
skipa

 

Tá ið Erlendur var liðugur at at
greiða frá, fóru øll uppá gólv. Erlendur undirvísti okkum í føroyskum dansi og
kvæðamentan, sum um vit vóru um átta ára aldur. Hetta var stak stuttligt og
gevandi.

 

Tá vit sessaðust aftur, segði
Regin Debess eina søgu frá sínum barnaárum. Søgan var um hvussu stóra ávirkan
dansurin og kvæðini høvdu havt á hann frá barnsbeini av.

Eftir søguna fóru vit at fáa
okkum ein bita. Jákup Ziskason rokaðist í køkinum, og smakkaði maturin óføra
væl.

 

Meðan maturin sodnaði og flestu
fingu sær ein kaffimunn, sluppu luttakararnir fram at. Ein, sum nýtt hetta
høvið, var Jens Dalsgaard. Jens Dalsgaard hevur í uml. fjøriti ár dansað við
næmingum. Hann oysti av síni vitan og gav hansara ískoyti nógvan
íblástur.

 

Mett og væl sett fóru vit nú
aftur upp á gólv. Hesuferð at dansa dansispøl. Regin Debess leggi okkum lag á.
Tað gekk stak væl. Vit dansaðu bandadans, gomlu ketu og
sandoyardans.

 

Smílandi, tivandi við roða í
anlitinum sessaðust vit at lurta eftir hvat Føroya Skúlabókagrunnur hevði at
bera fram. Niels Petersen greiddi frá ætlanunum viðvíkjandi kvæðatilfari. Í
næstum kemur Snar út á alnótina. Snar verður ein portalur við
undirvísningartilfari. Føroya Skúlabókagrunnur arbeiðir millum annað við at fáa
lagt undirvísingartilfar um kvæðir og dans á henda portalin.

Niels takkaði annars fyri
tiltakið, sum hann helvt vera stak gott.

 

Nú slapp Jónleif Johannesen fram
at. Hann greiddi stutt frá sínum tankum viðvíkjandi undirvísing og dansi. Hann
kom inná, at vit eiga at leggja næmingunum ein stoltleika í barmin. Ein
stoltleika sum hevur týdning fyri samleikan hjá næmingunum eins og t.d. fótbólts
landsliði hevur tað.

Jónleif undirstrikaði at søgan
hevði stóran týdning í arbeiðinum. Lagið er eisini týðandi, tí kenna næmingarnir
ikki lagið, verður ringt at læra seg kvæði við røttu rútmuni. Hevur næmingurin
ognað sær søguna og kennir hann lagið, fellur dansurin lættari. Dansurin er
einkul, men nakrar fáar reglur eru, sum næmingarnir eiga at kennast
við.

 

Reglur fyri
dansin:

·       
Tvey til vinstru og eitt til
høgru,

·       
vinstra hond undir og høgra oman
á,

·       
ikki krossa beinini,

·       
Loyvið skipararinum at byrja
hvørt ørindi,

·       
tig ella kvøð,

·       
ikki fara uppí hjá skiparinum
uttan so, at hann bjóðar tær uppí.

 

 

Jónleif vísti eisini á nakrar
uppgávur, sum hann hevur havt hepnið við at brúka. Hesar uppgávur koma at liggja
á Snar.

 

At enda fekk Símin Hansen úr
Svínoy orðið. Hann er íðin dansari og greiddi livandi frá tí, hann hevur
upplivað í dansihøpi.

 

Tiltakið endaði við at
luttakararnir fóru uppá gólv saman við limum úr Klaksvíkar Dansifelag. Dansurin
gekk væl. Vit kvóðu Sigmunds Kvæði yngra. Meðan vit dansaðu, hugdi eg út yvir
ringin. Eg sá nógvar ungar lærarar, sum livdu við í dansinum, og sum við vakrari
rødd kvóðu av lív og sál. Eg hugsaði við mær sjálvum : “Nei, enn eru vit ikki
volaðir”.

Tíðindaskriv frá Sláið Ring

 

Í
sambandi við at føroyskur dansur er komin á etikettina á nýggjum
rúsdrekka, loyvir Sláið Ring sær at koma við nøkrum viðmerkingum.




Tíðindaskriv frá Sláið Ring –
landsfelag føroyskum dansi at frama.

 

Í sambandi við at føroyskur
dansur er komin á etikettina á nýggjum rúsdrekka, loyvir Sláið Ring sær at koma
við nøkrum viðmerkingum.

 

Sláið Ring dámar sera væl, tá ið
føroyskur dansur verður brúktur í sambandi við tað, ið føroyskt er. Kemur ein
orðabók, skúlabók, sangbók, fløga, ferðavinnubók og líknandi út við dansinum á,
frøðast vit almikið. Tað er so upplagt, at føroyski dansurin og kvæðamentanin
verða brúkt at vísa eitt sereyðkenni úr landi okkara.

 

Hinvegin síggja vit als ikki
sambandið millum rúsdrekka og føroyskan dans, annað enn at í vertskapi eru bæði
umboðað.

 

Limafeløgini í Sláið Ring eru 16
í tali. Flestu teirra dansa hvørja viku frá heystinum og til føstulávint.
Ongastaðni er rúsdrekka partur av dansinum.

 

Hava feløg veitslur, tað verið
seg fótbólts-, hondbólts-, kappróðrar- og dansifeløg, er øðrvísi. Tá kann rúsdrekka vera við sum partur av veitsluni. Hetta er
galdandi fyri flestu feløg og tí ikki serstakt fyri
dansifeløg.

 

Í meir enn hálva øld hava
dansifeløgini hildið rúsdrekka burtur frá dansinum í feløgunum. Sláið Ring vil
taka frástøðu frá, at fólk við peningaligum áhugamálum royna at tvinna dansin og
rúsdrekka saman.

 

Føroyskur dansur er nógv bestur
við edrúum fólki. Tað skuldi verið hvørs manns vitan. At hetta verður misskilt
av fólki, vísir betur enn nógv annað, hvussu ósjónligur dansurin er millum
manna, og hvussu lítla vitan nógv hava um føroyska dansin.

 

Sláið Ring vil við hesum heita á
okkum øll, ikki minst Kringvarpið og aðrar miðlar, dansifeløg og Mentamálaráðið:
Latið okkum varpa ljós á sermentan okkara. Tað er ósømiligt, at kvæðamentanin í
hesum upplýsingartíðum skal verða so mistulkað.

 

Sláið Ring – landsfelag føroyskum
dansi at frama.

Mentanartiltak á Sandi

 

Til øll dansifeløg, sum eru limir í Sláið Ring.

Henda innbjóðing er komin frá B71.




Mentanartiltak niðri á sandinum á Sandi
V/Sandoyar
Ítróttarfelag B71

    Sandur, tann 31. juli 2008

Til øll dansifeløg, sum eru limir í Sláið Ring.
Henda innbjóðing
er komin frá B71.

Innbjóðing:

Leygardagin, tann 23. aug. 2008, fer Sandoyar Ítróttarfelag B71, at skipa
fyri einum “í Sandoyar høpi”  stórum mentanartiltaki. Við á tiltakinum er
føroyskur dansur. Vilja tit hjálpa B71 at fara uppá gólv, fáa tit atgongumerkið
ókeypis. Vónandi verða fleiri, sum taka av. Tilmelding og upplýsningar fáast við
at venda sær til ein av fyrireikarunum.

Skráin verður hendan:

Kl. 14:00 Gestirnir sleppa inn á innhegnaða øki.
” Klovnar ganga
runt
” Harmonikuspælarar sita við inngongina og spæla

Kl. 15:00  Barnatiltak byrjar. (Útisjónleikur har børnini luttaka í
leikinum)

Kl. 16:00 Fallskjólashopparin leypur (Hetta er í samb. við eina
lutaseðlasølu hjá B71. Tann ið hevur seðilin við tí nummarinum á tí teiginum,
har hopparin lendur , hevur vunnið ein bil)
 
 Á
Pallinum:

Kl. 17:00 Ungdómskór úr Skopun  (gospel og country)

Kl. 17:45 Fríðbjørg Jensen

Kl. 18:30    Tey á Kamarinum

Kl. 19:15 Bólkur við lokalum dreingum (Gerhard, Sigurd og Beinur)

Kl. 20:00 Sámal Ravnsfjall  

Kl. 21:00 Týr    (Bálið verður tendra)

Kl. 22:00 Stórur føroyskur dansiringur

Kl. 23:30    Dansur í teltinum (Dansiorkestrið ,  –
nógvir av manningini í Driv – )

Smávegis broytingar kunnu framvegis blíva í skránni.

 
Á innhegnaða økinum verður umframt omanfyri nevnda undirhald, nógv
annað gott.
Vit fara at hava hoppiborgir o.a. til børnini, eisini verður
sølubúð, har matur og drekka
verður til keyps. (t.d. verður pylduvognur,
breyðsøla, ølsøla, kaffi, kakir, kiosk og annað
gott.

Í samb. við framførsluna hjá Týr, er ætlanin at teir enda við Orminum Langa,
og síðani
tekur ein “vónandi stórur” føroyskur dansiringur við.  

Um so er, at áhugi er fyri hesum , men fólk ynskja at sleppa norður aftur
sama kvøld, so er einki í vegin fyri at broyta skránna soleiðis at tað gert
møguligt.  Síðsti túrur er kl. 22:30.  Vit koma at syrgja fyri at
bussur koyrur til Skopunar.

Viðv. kostnaði, kemur tað at verða soleiðis:

Børn  3-14   kr. 100,- (allir aktivitetir eru tá íroknaðir
prísin)
Vaksin   kr. 200,- (alt uttan dansurin í
teltinum)
Dansurin í Teltinum  kr. 150,-
Alt
tiltakið   kr. 300,- (t.v.s. um ein keypur sær atgongd til
dagtiltøkini og     

                                                    
dansin í teltinum samstundis)

Vit vóna at hetta hevur áhuga.

Vinarliga

Vegna fyrireikarirnar av tiltakinum hjá B71
Olga Fossdalsá, Sandur, tlf.
243344, teldupostadr. katohara@olivant.fo
Marin Johannesen,
Sandur, tlf. 253525
Vivian í Soylu, Sandur, 263668

Kalendar
Tíðindi
Limafeløg
Skráir
©Sláið Ring 2018
Vevstjóri
KREA
×