Vága dansifelag skipaði í summar fyri stóra tiltakinum »Nordisk Folkedanserfestival 2023«, og Sláið Ring stuðlaði hesum tiltaki. Her endurgeva vit eina frásøgn av stevnuni.
Nordisk Folkedanserfestival 2023 (her eftir NF 23) varð hildin í Føroyum í døgunum fimta til
níggjunda juli 2023. Vertur fyri tiltakinum var Vága Dansifelag, og festivalurin varð staðsettur á Skúlaheiminum í Marknagili í Tórshavn.
Orsøkin til, at stevnan varð hildin í Tórshavn og ikki í Vágum, sum undanfarnu stevnur hava verið, var tann, at í Vágum eru ikki høli til at hýsa meira enn 100 fólkum samstundis.
Nordisk Folkedanserfestival er norðurlendsk dansistevna, har eitt lokalt dansifelag umboðar hvørt land. Stevnan er gomul, og Vága Dansifelag hevur verið føroyska umboðið í samtakinum síðan einaferð í 1980 árunum. Stevnan verður hildin upp á skift í teimum einstøku luttakaralondunum. Nevnast skal, at Ísland og Grønland hava ongantíð verið við í hesum samtakinum, og at Åland ikki var við í Føroyum í ár. Til NF 23 vóru tilmeldaðir 104 luttakarar úr Finnlandi, Svøríki, Noreg og Danmark, umframt 24 úr Føroyum. Samlaða luttakaratalið var sostatt gott stórthundrað.
Eftir vanligari “skipan” skuldi NF 23 ikki verið hildin í Føroyum. Seinasta stevnan av slagnum var í Svøríki í 2019. Ymsar umstøður, serliga korona farsóttin, gjørdu, at tiltakið var um at detta niðurfyri. Tí varð gjørt av í Vága Dansifelag, at vit taka tiltakið uppaftur “uttan fyri skrá”, og halda stevnuna í Føroyum í juli 2023. Fráboðanin fekk góða móttøku, og NF 23 gjørdist ein tann størsta í longri tíð.
Skráin fyri stevnuna varð løgd tætt at teimum vanligu, ið hava verið frammanundan, har stórur dentur hevur verið lagdur á samanhald og hugna, eins og útferðir við framførslum av ymsum dansum hevur verið fastur partur.
Skúlaheimið varð valt at hýsa stevnuni, tí har vóru møguleikar at hýsa 100 sovandi gestum. Roknað varð í byrjanini við, at øll, eisini føroysku luttakararnir, kundu búgva á staðnum, meðan stevnan var. Men tá tilmeldingarfreistin var úti – nakað væl eftir, at leigumálið var avtalað – vísti tað seg, at áhugin uttanlands var væl størri, enn mett og fráboðað varð frammanundan, og plássið rakk akkurát til at hýsa útlendsku luttakarunum.
Í samskiftinum við útleigaran langa tíð undan stevnuni varð lagt upp til, at alt virksemið skuldi vera á Skúlaheiminum. Men hesar fortreytir broyttust munandi, stutt áðrenn stevnan skuldi byrja. Tá varð boðað frá, at ymsar broytingar vóru gjørdar innanhýsis á Skúlaheiminum, sum millum annað gjørdu, at ikki var pláss fyri vanligu hugnatiltøkunum, sum eru ein stórur, berandi partur av festivalinum.
Við stuttum skotbrái og stórari vælvild frá leiðsluni á á Skúlanum á Fløtum varð skipað so fyri, at hesin parturin varð fluttur oman í Skúlan á Fløtum – í Fuglaskálan og ítróttarhøllina við tilhoyrandi hentleikum – at vera. Her varð dansað og spælt øll kvøldini, meðan stevnan var. Ein partur av hesi samveruni er, at feløgini hvørt sær læra frá sær av teimum dansum, tey dansa.
Eftir at allir útlendsku luttakararnir vóru komnir, varð stevnan sett mikukvøldið fimta juli klokkan 20:00 av Heðini Mortensen, borgarstjóra í Tórshavnar kommunu. Setanin var eftir “føstum” leisti, har tjóðsangirnir hjá luttakarunum hvør sær vórðu sungnir, og feløgini hvørt sær dansaðu eina til tiltakið gjørda skrá. Síðan var, sum vanligt, “hugni fyri rest”.
Morgunmatur og døgurði vórðu etin á Skúlaheiminum, og til útferðirnar, ið gjørdar vórðu, meðan stevnan var, gjørdu luttakararnir hvør sær sínar matpakkar at hava við.
Hósdagin sætta juli varð farið útferð í Norðoyggjar. Steðgað varð í Norðragøtu við standmyndina av Tróndi í Gøtu, og hildið fram til Kunoyar og Haraldsunds, har matarsteðgur var. Haðani varð farið til Klaksvíkar at vitja Christianskirkjuna, Nólsoyar Páls húsið og Føroya Bjór. Lokal frásøgufólk søgdu frá ymsu støðunum, og víst varð runt.
Fríggjadagin sjeynda juli varð farið vestur í Vágar, har vitjað varð við frásøgufólki í Miðvágs
kirkju, Krígssavninum, Beitinum og á Fiskastykkinum.
Dansiframsýningar vóru á Ellisheiminum og í ymsu bygdunum í oynni. Um kvøldið beyð Vága
kommuna døgurða í Bygdarhúsinum í Miðvági, har høvið sjálvandi eisini beyðst at síggja nakrar fremmandar dansir.
Leygardagin áttanda juli høvdu fólk frí fyrrapartin, sum varð nýttur at hyggja seg um í Tórshavn.
Seinnapartin var dansur í Vágsbotni, har øll luttakandi feløgini fingu høvi at vísa sínar dansir.
Umleið ein hálvan tíma hvør. Skipað varð soleiðis fyri, at meðan tvey av útlendsku feløgunum dansaðu, varð upp á skift farið útferð út í Tinganes og á Reyn við hinum báðum gestafeløgunum.
Stevnan endaði formelt leygarkvøldið við døgurða á Skúlaheiminum, og hugna á Skúlanum á Fløtum aftaná.
Undir borðhaldinum í samband við fráfaring vórðu røður hildnar, og heilsanir bornar fram. Her boðaði umboðið fyri Ølholm Folkedanserforening í Danmark frá, at Nordisk Folkedanserfestival næstu ferð verður hildin í Ølhom í Miðjyllandi í juli 2025.
Sunnudagurin níggjundi juli var heimferðardagur. Fyrstu gestirnir fóru av Skúlaheiminum klokkan fimm á morgni fyri at náa flogfarið klokkan gott átta. Farið varð so avstað so við og við út eftir degnum.
Saman um tikið vóru bæði gestir og fyrireikarar nøgdir við eina væleydnaðan stevnu.
Afturmeldingar og heilsanir frá útlendsku gestunum hava verið sera positivar.
Vága dansifelag takkar hjartaliga øllum tykkum, sum stuðlaðu stevnuni.
